Hasiera

Osoko Bilkuraren akta

link 2010.eko Maiatzaren 5ekoa
Data:2010-05-05
Agiri mota: Osoko Bilkuraren akta
Lasterbideak:
Mamia: 

Lezoko Udaletxeko Biltzar Areto Nagusian, 2010eko maiatzaren 5ean, asteazkena, 19:30etan, eratu da EZOHIKO OSOKO UDALBATZA, egiteko xedez, lehen deialdian, Haritz Salaberria Goikoetxea alkatearen lehendakaritzapean eta ondorengo zinegotzi hauek bertan direla: Haritz Salaberria Goikoetxea, Irati Aranburu Salaberria, Jon Legorburu Arrastua, Iñigo Esnaola Arbiza, María Pilar Legorburu Echegaray, Urko Lopetegi Campano, Jaione Lekuona Irazusta, Kepa Garbizu Azkue, Enrique Figueroa Laboa, Jesús María Martiarena Jaca eta Miguel Antonio Arrizabalaga Brusín.

Roberto Sánchez Sánchez ez da bilerara azaldu.

Bertan da eta egintzaren fede eman du udal idazkaria den Xabier Loiolak.

1.- Lezoko plangintzako arau subsidiarioetako "Maintzine Mendebaldea" A.O.U. 18 eremuan dagoen eraikin bati buruzko hirigintzako hitzarmena, onartzeko diktamena (2010H0360002).

Jon Legorburuk, Hirigintza, obra eta zerbitzuetako zinegotzi delegatuak, Hirigintza Batzordearen diktamena azaldu du eta haren onarpena proposatu. Honela dio diktamenak:

Zabaltxo Eraikuntzak, S.L.k, hain zuzen ere eskrituretan Vitori izenez jasotako etxebizitzaren (Babiloniako harrobiaren ondoan dagoena) jabegoa duenak, Lezoko Udalari hirigintza hitzarmen berri bat izenpetzeko proposamen bat egin dio.

Hitzarmen hau Gipuzkoako Aldizkari Ofizialean 2010ko martxoaren 16an an argitaratu zen eta 20 eguneko Jendaurreko epean bi alegazio aurkeztu dira, hain zuzen ere Etxebeste anai-arrebek izenpeturikoa eta Jesus Garaiar Zuloagak, Zabaltxo Eraikuntzak, S.L.ren izenean.

1.- Etxebeste anai-arreben alegazioan eskatzen dena zehazki ondorengo hau da:

a).- Elias Salaberria etorbidean 2 zenbakian dagoen lursailaren jabeen jabetza eskubideak erabat errespetatzea.

b).- Bere lursailari eragiten dioten proiektu edo ekintzen berri izatea.

c) .- Bere lursaila okupatu nahiko balitz beraiekin hitzarmen bat egitea.

Bestalde eskakizun hauez gain, eta alegazio moduan, aipatu hitzarmenean adierazten den "harrobirako bide zaharra" beraiena dela aldarrikatzen dute. Bide hori ordea udalarena da 1995ko maitzaren 26an izenpeturiko hitzarmenean en baitzen, alegatzaileek dioten moduan, bide hori haien alde laga. Hitzarmen horretan bide hori aparkaleku bezala egokituko zela adierazten da ez besterik

2.- Zabaltxo Eraikuntzak, S.L.ren alegazioak zera dio: Hitzarmeneko bigarren eta bosgarren  klausulatan adierazten diren kopuru ekonomikoak, ordaintzerakoan edo, horrela balitz, itzultzerakoan urteari dagokion  KPIaren handitzea kontutan harturik gauzatuko lirateke.

Aurkeztu den alegazio hau onartzea proposatzen da, zentzuzkoa ez ezik legalki ere derrigorrezkoa dela irizten diodalako.

Hitzarmen honen arabera, batetik Lezoko Udalak, egiten ari den Hiri Antolamendurako Plan Nagusiaren izapideetan, "Maintzine Mendebaldea" AOU 18 eremuaren hirigintzako araudi berezian barne hartuko du,  hitzarmenaren I. Eranskinean adierazitako hirigintzako fitxa. Bertan, 7 etxebizitza eraikitzeko aukera azaltzen da, sestra gainean 665,24 m²-ko (t) aprobetxamenduarekin eta sestra azpian 284,11 m²?ko (t) aprobetxamenduarekin.  

Bestalde, etxebizitzetarako sarbidea partzelaren beheko aldetik jartzea proposatzen da, "harrobiko bide zaharra" deituriko herri bidetik, irisgarritasunari buruzko indarreko araudia betez.

Proposamenak erdisotoa + 4 solairu + teilatupea biltzen ditu profilean, bi isurialdeko estalkiarekin, hegala lurraren gaineko kota berean mantentzen dela, gaur egun duen bezala.

Garajerako erabilitako erdisotoko hormak ez du altueran 26 zk.ko aldameneko etxeko harlangaitzezko horma gaindituko (2,05 m?ko altuera du hormak).

Zabaltxo Eraikuntzak S.L. sozietateak bere gain hartzen du hitzarmen honen lehenengo klausulan adierazitako hirigintzako eraikigarritasun haztatuaren % 15 urbanizazio kargarik gabe Lezoko Unibertsitateko Udalari lagatzeko legezko betebeharra.

Eraikigarritasunaren % 15en lagapen materialaren ordez, Zabaltxo Eraikuntzak S.L. sozietateak dirutan ordainduko du, Lezoko Unibertsitateko Udalari ezin baitzaio orube edo partzela eraikigarririk esleitu.

Halaber, Zabaltxo Eraikuntzak S.L. sozietateak bere gain hartzen ditu Lurzoruari eta Hirigintzari buruzko 2/2006 Legearen 25. artikuluan eta dagokion zuzkidura karga kentzean datzan Lurzoruari eta Hirigintzari buruzko ekainaren 30eko 2/2006 Legea garatzen duten premiazko neurriei buruzko ekainaren 3ko 105/2008 Dekretuaren 3. artikuluan ezarritakoaren arabera dagozkion betebeharrak.

Betebehar hauek bete ezin direnez, Zabaltxo Eraikuntzak S.L.k dirutan ordainduko du. 

Zabaltxo Eraikuntzak S.L.k aipaturiko kontzeptuengatik (hirigintzako eraikigarritasunaren % 15 eta zuzkidura karga kentzea) Lezoko Udalari ordaindu beharreko zenbatekoa hirurogei mila berrehun (62.200) eurokoa izango da.

Zenbateko honen %50a, hau da, hogei eta hamaika mila ehun (31.100) euro hitzarmen hau Gipuzkoako Aldizkari Ofizialean argitaratzen denetik hasita gehienez ere astebeteko epea izango du horretarako. Gainontzekoa hitzarmenaren I. Eranskinean adierazitako eraikina egiteko obra lizentzia ematean ordaindu beharko da.

Udal Arkitekto Aholkulariak egindako txostenaren arabera, adierazitako  bi kontzeptu hauetatik, hau da eraikigarritasunaren gehitzearen %15a eta zuzkidura karga kentzeagatik 62.200 Euroko kopurua ordaindu beharko du.

Hitzarmen honetan aurreikusten den  eraikigarritasunaren gehitzearen %15ko lagapena dirutan egitea proposatzen da. 2/2006 Lurzoruaren eta Hirigintzaren Legearen 27.5 artikuluak xedatzen duenarekin bat dator proposamen hau eta gainera legearen zazpigarren xedapen gehigarriaren 7 atalak aurreikusten duen udal teknikarien balorazio ekonomikoa ere  espedientean dago.

2/2006 Lurzoruaren eta Hirigintzaren Legearen 11.3,b) atalaren arabera Hiri-lurzoru finkatugabea kategorian sartuko da hirigintza antolamenduak lurzoru-mota horri atxikitako lursailak  lehendik zegoena baino hirigintza-eraikigarritasun haztatu handiagoa esleitzen badio antolamenduak.

Horren harira aipatu legearen 27 artikuluak bigarren atalean, 11/2008 Legeak egindako aldaketaren ondoren, zera xedatzen du:

"Eraikigarritasun haztatuaren gehitzeagatik finkatu gabeko hiri-lurzoruan, jabeek hirigintza-eraikigarritasun haztatuaren (aurreko hirigintza-antolamenduak esleitutakoaren) gaineko gehitzearen % 15i dagokion lurzorua laga behar diote dohainik udalari, hirigintza-kargetatik libre, non eta hirigintza-antolamendu horrek egikaritzea gauzatzeko ezarritako mugak gainditu ez diren, edo, halakorik ezarri ez bazuen, lege honetako 189. artikuluan ezarritakoak gainditu ez diren. Kasu horretan, gauzatutako eraikigarritasuna hartuko da kontuan."

Hirigintza, Obra eta Zerbitzuetako batzordeak 2010eko apirilaren  28an  egindako batzarraldian Jon Legorburu, Haritz Salaberria eta  Iñigo Esnaolaren, aldeko botoarekin eta  Jesús Mª Martiarenaren  abstentzioarekin,

DIKTAMINATZEN DU:

BAT: Etxebeste anai-arrebak aurkezturiko alegazioan azaltzen diren eskakizunak onartzea, beti ere txosten honetan adierazten diren ñabardurekin.  Zabaltxo Eraikuntzak, S.L.k aurkezturiko alegazioa onartzea.

BI: Zabaltxo Eraikuntzak, S.L.k, hain zuzen ere Vitori izenez jasotako etxebizitzaren (Babiloniako harrobiaren ondoan dagoena) jabeak proposaturiko Hirigintza Hitzarmena onartzea.

HIRU: Alkatea hitzarmen hau izenpetzeko ahalmentzea.

Kepa Garbizu bi kontugatik kexatu da. Alde batetik, hitzarmenean dioena ez delako betetzen. Hitzarmenak dioenez, etxe zaharra ez zen botatzekoa Plan Orokorraren behin behineko onarpena bitarte eta jada eraitsia dago. Bestetik, Zabaltxo Eraikuntzak egindako alegazioari erantzuterakoan euskarazko eta gaztelerazko diktamenak guztiz kontrajarriak daudela dio, euskaraz KPIaren igotzea kontuan harturik gauzatuko dela jartzen du eta gazteleraz "sin la correspondiente subida anual del IPC" dio.

Jon Legorburuk dio etxea eraitsi egin behar izan dela seguritate kontuengatik. Bestalde KPIren inguruan onartu du diktamenak duen itzulpen akatsa, espedientean diren beste txostenen arabera garbi dagoelako euskarazko testua dela zuzena.

Gaiari buruz Kepa Garbizuk dio hitzarmen honen helburu bakarra dirua biltzea dela, onartze prozeduran dagoen Plan Orokorra egin bitarte ezingo delako obra baimenik eman.

Jesus Mari Martiarenaren iritziz gaia erabat lotu gabe dago, zehaztu gabe dagoelako partzela horretatik gorako bidearen erabilera. Horregatik ez da diktamena onartzearen aldeko.

Besterik gabe bozketa egin da eta diktamena onartu egin da aldeko zazpi botokin eta lau abstentziokin, Kepa Garbizu, Enrique Figueroa, Jesus Mari Martiarena eta Mikel Antxon Arrizabalaga. Lehenengo hirurek botorik ez dutela emango adierazi dute. Idazkariak ohartarazi ditu ez dagoela boto modu hori, baiezkoa, ezezkoa eta abstentzioa direla aukerak eta abstentzio bezala jasoko dela aktan.

2.- 107 poligonoko 3 eta 4 lursailen emakida demanialaren kontratu espedienteari hasiera emateko diktamena (2010H0380003).

Jon Legorburuk azaldu du diktamena. Honela dio:

Lezoko Udala 107 Industri Poligonoko  3 eta 4 lursailaren jabea da.

Lursail hauek jabari publiko izaera dute.

Aipatu lursailak, bakoitzak 810 m²ko azalera dute, hau da guztira, 1620 m². Lezon indarrean dauden Planeamenduko Arau Subsidiarioen arabera lur hiritargarria bezala sailkatuak  eta merkatal erabilerara xedatuak daude.

Administrazio Publikoen Ondarearen 33/2003 Legearen 93 eta hurrengo artikuluak xedatzen dutena kontuan izanik.

Toki Administrazioko ondasunen Erregelamenduko 78 artikuluak eta ondorengoak jasotakoa kontuan izanik jabari publikoko ondasunen emakida esleitzerakoan, adierazitako artikulu horiek eta  kontratu legediaren arabera arautuko dira.

Hori dela eta Arlo Publikoko Kontratuen 30/2007 Legearen  93 eta hurrengo artikuluek zein 122 eta hurrengoek xedatzen dutena kontuan izanda,  Hirigintza, Obra eta Zerbitzuetako batzordeak 2010eko apirilaren  28an  egindako batzarraldian Jon Legorburu, Haritz Salaberria eta Iñigo Esnaolaren, aldeko botoarekin eta  Jesús Mª Martiarenaren  abstentzioarekin,

DIKTAMINATZEN DU:

Ondorengo erabaki hauen onarpena Udal Osoko Bilkuraren esku uztea:

BAT: 107 Industri Poligonoko  3 eta 4 lursailen emakida demaniala Kontratatzeko espedienteari hasera ematea jardunbide ireki eta lehiaketa prozeduraren bidez

BI:  Kontratu hau arautuko duten  administrazio baldintza agiria  onartzea.

HIRU: Kontratu honen behin behineko eta behin betiko esleipena, onartutako pleguetan oinarrituta,  Tokiko Gobernu Batzarraren esku uztea.

Jon Legorburuk euskaraz idatzitako baldintza agiriaren 13. oinarrian zuzenketa egin behar dela dio: hamabost hilabeteko epea aipatzen da eta hamabost eguneko epea beharko luke. Zuzenketa horrekin onartzea eskatu du.

Bozketa egin da eta azken aldaketa honekin diktamena onartu da aldeko zazpi botorekin eta lau abstentziorekin (Kepa Garbizu, Enrique Figueroa, Jesus Mari Martiarena eta Mikel Antxon Arrizabalaga).

3.- Lezoko udalerriko Hirigintza Plan Orokorra behin behinekoz onartzeko diktamena (2007H0310001).

Jon Legorburuk Hirigintza, Obra eta Zerbitzuetako zinegotzi delegatuak Hirigintza Batzordearen diktamena onartzea eskatu dio osoko bilkurari. Honela dio diktamenak:

Lezoko Udalak 2007ko abenduaren 5an buruturiko Osoko Bilkuran, Udalerriko Hirigintza Plan Orokorra formulatzea eta idaztea erabaki zuen.

Halaber, Babes zibil, ingurugiro, kultur ondare eta natur ingurunean eskumenak dituzten Eusko Jaurlaritzaren eta Foru Aldundiaren organoei bere ordenamenduarengatik errespetatuak izan behar duten ingurugiro, kultur ondare eta natur ingurunearen baldintzatzaileen eta egon litezkeen arriskuen berri eskatu. Behar bezalako justifikazio tekniko eta juridikoekin bi hilabete gaindituko ez dituen epearen barruan mango da.

Azkenik, Osoko bilkura honetan  espedientean dagoen Hiritarren Parte Hartze Programa onartzea erabaki zen.

2008ko uztailaren 17ko 08/659 alkatetza-dekretuaren bitartez Lezoko udalak Planeamenduko Arau Subsidiarioen Berrikuspenaren Aurrerakin dokumentua tramitera onartzea eta jendaurrean 3 hilabetez jartzea erabaki zuen, adierazitako epean, elkarteak, norbanakoek eta korporazioek iradokizunak, planeamendu alternatiba desberdinak aurkeztu zitzaten. 2008ko urriaren 24an amaitzen zen epe hau, urte bereko azaroaren 24 arte luzatu zen 2008ko azaroaren 21ko 08/862 Alkatetza Dekretuaren bitartez.

Dagozkion argitarapenak egin ondoren ( Berria 2008-08-05, Diario Vasco 2008-08-19, Gara 2008-08-06, Noticias de Gipuzkoa 2008-08-06 eta Gipuzkoako Aldizkari Ofiziala 2008-07-23), epe horren barruan hogeita bederatzi iradokizunak aurkeztu ziren.

Aurrerakin dokumentuaren kopia mugakide diren udalerriei eta arlokako eskumenak dituzten administrazio publikoei ere igorri zitzaien.

Lezoko Udalak 2009ko ekainaren 10eko Osoko Bilkuran erabaki zuen, Aurrerakin dokumenturi aurkezturiko iradokizunak erantzutea, Ordenazio Ereduaren Helburu Orokorrak eta Oinarrizko Irizpideak onartzea eta erabaki horien berri ematea alegazioen titularrei eta Lezoko Arau Subsidiarioen Berrikuspena idatzi duen taldeari, Hirigintzako Plan Orokorraren hasierako onarpenerako dokumentua idazten hasteko.

2009ko irailaren 16an Lezoko Udalean sarrera eman zitzaion Hirigintza Plan Orokorraren ingurumenaren eraginaren aurretiazko txostenari.

2009ko azaroaren 30ean Lezoko Udalean sarrera eman zitzaion Hirigintza Plan Orokorraren haserako onarpenerako dokumentuari.

2009ko abenduaren 3an Lezoko Udalean sarrera eman zitzaion Hirigintza Plan Orokorraren haserako onarpenerako dokumentuaren Ingurumen eraginaren azterketa bateratuari.

Lezoko Udalak 2009ko abenduaren 23ko osoko bilkuran Udalerri honetako Hirigintza Plan Orokorrari haserako onarpena ematea erabaki zuen.

Osoko bilkura honetan halaber Edozein eratako onarpenak, baimenak eta lizentziak emateko aukera etetea ere erabaki zen , gehienez bi urteko apean, haserako onarpena jaso duen Hirigintza Plan Orokorraren ondorengo eremuetan:

AOU 13 Marrukene, AOU Algeposa 1 AOU 5 Xoxolurra, AOU 36 Gaintxurizketa, AOU17  Maintzine AOU18  Maintzine Mendebaldea eta Lur ez urbanizagarri guztian.

Akordio hau Gipuzkoako Aldizkari ofizialean argitaratu zen 2010eko urtarrilaren 12an, prentsa idatzian berriz, Gara eta Diario Vasco egunkarietan 2009ko abenduaren 30ean  eta Berria egunkarian 2009ko abenduaren 29an.

Espedientea jendaurrean egon den 45 egunetan 18 alegazio aurkeztu dira. Epez kanpo berriz alegazio bakar bat aurkeztu da.

Bestalde Lezoko Udalak haserako onarpena jaso zuen dokumentua igorri zien arloka eskumenak dituzten administrazio publikoei bere ezagutzarako eta txostenak egin ahal izateko.

Horrela, ondorengo administrazio publikoek igorri dute txostena:  "Ministerio de Fomento, Dirección General de Aviación civil", ADIF, "Ministerio de Fomento, Dirección General de Infraestructuras Ferroviarias", Gipuzkoako Foru Aldundiko Bide Azpiegituretako Departamenuak, Eusko Jaurlaritzako Kultura Sailak, Gipuzkoako Foru Aldundiko Kultura eta Euskara Departamentuak, " Ministerio de Medio Ambiente, Medio Rural y Marino, Dirección General de Sontenibilidad de la Costa y el Mar".

Bestalde Lezoko Udalak onarturiko Parte hartze programa nola garatu den adierazten duen memoria dago espedientean.

Aurkezturiko alegazioei talde idazleak egin duen txostena kontuan izanik

2/2006 Lurzoru eta Hirigintza Legearen 90 artikuluak xedatzen duena eta aipatu lege hori garatzen duen 105/2008 Premiazko Neurrien Dekretuaren 32 artikuluak xedatzen duena kontuan izanik, aldi berean, Hirigintza, Obra eta Zerbitzuetako batzordeak 2010eko apirilaren  28an  egindako batzarraldian Jon Legorburu, Haritz Salaberria eta  Iñigo Esnaolaren, aldeko botoarekin eta  Jesús Mª Martiarenaren  abstentzioarekin,

DIKTAMINATZEN DU:

BAT: Aurkezturiko alegazioei talde idazleak idatziriko txostenaren arabera erantzutea.

BI: Lezoko Udalerriko Hirigintza Plan Orokorrari behin behineko onarpena ematea onarturiko alegazioak eta arloka eskumenak dituzten administrazio publikoen txostenen edukiak dokumentuan eragiten dituzten aldaketekin.

HIRU: Akordio hau eta onarturiko dokumentua Euskal Herriko Lurralde Antolaketa Batzordeari dokumentua igortzea txostena egin dezan.

LAU: Akordio hau eta onarturiko dokumentua, Gipuzkoako Foru Diputazioko Garapen Jasangarriko Departamentura bidaltzea, ingurune-inpaktuari buruzko behin betiko txostena egin dezan eskatuz.

BOST: Kostan eskuduntza duen administrazioari dokumentuaren ale bat igortzea  22/1988ko Kostan Legearen 112 eta 117 artikuluetan aurreikusitako txostena egin dezan.

Kepa Garbizuk dio bere taldeak hogeita bi proposamen egin zizkiola dokumentu honen Aurrerapen dokumentuari eta ez dela bakarra ere onartu; beste sei egin dizkiotela hasierako onarpen dokumentuari eta ez dela bakarra onartu. Ondorioz, ez dute bat egiten diktamenarekin, planarekin ez daudelako ados eta horregatik aurka bozkatuko dute. Gogorarazi du kontu honen inguruan egindako bi galdera erantzun gabe daudela oraindik. Honakoak dira aipatu galderak: 1) udalak planaren bideragarritasun txostenik eskatu behar al dio udal kontuhartzaileari? 2) eskatutako toponimia azterketa egin behar al da? Azken horren inguruan akats ugari omen ditu testuak.

Mikel Antxon Arrizabalaga ez dator bat diktamenean proposatutakoarekin. Hasierako dokumentuari aurkeztutako alegazioan jasotako arrazoiak gogoratu ditu. Alde batetik, planak proposatzen dituen etxebizitza kopuru altuena ez delako bideragarria. Bideragarria ez izateko arrazoia honakoa da: jarduera industriala duen Algeposa eremuan aurreikusten da eta eremu hori onartu berri den plan berezi baten bidez kontsolidatu da.  Enpresarekin aurre hitzarmenik gabe bidera ezina dela dio. Bestalde, planari lur gehiago eskatzen dio jarduera industrialentzako, orain arte handitu nahi duen enpresaren herritik aldegiteko joera aldatzeko.

Alkateak esan du ekimen horren epea luzea bada ere eta enpresarekin hitzarmenik ez badago ere, lehen kontaktuak eta azterketak egiten hasiak direla. Eta esan omen dezake onartu berria den plan berezia ez dela horretarako oztopo izango.

Oraingo eta aurreko legealdian planaren tramitazioak aldatzeaz eta jendearen partehartzearen inguruko eztabaidan jardun dute zinegotziak.

Besterik gabe, diktamena bozkatu egin da eta onartu egin da aldeko zazpi botorekin eta aurkako laurekin (Kepa Garbizu, Enrique Figueroa, Jesus Mari Martiarena eta Mikel Antxon Arrizabalaga), hau da, diktamena osoko bilkura osatzen duten zinegotzien gehiengo osoaren aldeko botoarekin onartu da.

   

Aktaren amaiera.

Beste aztergairik geratzen ez denez, alkate-lehendakariak 20:30ean eman dio buru bilkurari. Eta nik, idazkari naizen aldetik, akta     .etik      .ra arteko zenbakiak dituzten orri ofizialetan jaso eta horren guztiaren fede ematen dut, eta bilkuran izan diren zinegotzi guztiek izenpetu egin dute akta hau.

link 2010.eko Apirilaren 21ekoa
Data:2010-04-21
Agiri mota: Osoko Bilkuraren akta
Lasterbideak:
Mamia: 

Lezoko Udaletxeko Biltzar Areto Nagusian, 2010eko apirilaren 21ean, asteazkena, 19:30etan, eratu da OSOKO UDALBATZA, OHIKOA egiteko xedez, lehen deialdian, Haritz Salaberria Goikoetxea alkatearen lehendakaritzapean eta ondorengo zinegotzi hauek bertan direla: Haritz Salaberria Goikoetxea, Jon Legorburu Arrastua, Iñigo Esnaola Arbiza, María Pilar Legorburu Echegaray, Urko Lopetegi Campano, Jaione Lekuona Irazusta, Kepa Garbizu Azkue, Enrique Figueroa Laboa, Jesús María Martiarena Jaca eta Miguel Antonio Arrizabalaga Brusín.

Ez dira bileran izan Irati Aranburu Salaberria eta Roberto Sánchez Sánchez.

Bertan da eta egintzaren fede eman du udal idazkaria den Xabier Loiolak.

Alkateak dio aste santua tarteko ohiko plenoa gaur arte atzeratzea erabaki zuela. Erabakiaren berri zinegotzi guztiei eman zitzaiela dio alkateak eta, eragozpenik ezean, gaurko plenoan aktak, kontu emateak eta erregu galderak izango direla.

1.- Egoki irudituz gero, 2010eko otsailaren 3ko eta martxoaren 5eko aktak onartzea.

Bi aktak onartu dira inolako zuzenketarik gabe.

2.- 110 poligonoko   "Aserraderos de Lezo"  deritzon hiri eremurako Hiri Antolaketa Plan Bereziaren behin betiko onarpena emateko diktamena (2009H0400001).

           

            Jon Legorburuk, Hirigintza, Obra eta Zerbitzuetako zinegotzi delegatuak diktamena azaldu eta onartzeko eskatu du. Honela dio diktamenak:

"Aurrekariak

José María Echarri Barberíak, Echemar S.L.ren izenean  "Aserraderos de Lezo"  deritzon hiri eremurako Hiri Antolakea Plan Berezia aurkeztu du.

Tokiko Gobernu Batza­rrak 2009ko abenduaren 1ean egindako bileran «Aserraderos de Lezo» deri­tzon hiri eremuko Hiri Antolaketa Plan Bereziari haserako onarpena ematea erabaki zuen.

Akordio honen iragarkia Gipuzkoako Aldizkari Ofizialean Argitaratu zen 2010eko urtarrilaren  19an. Prentsa idatzian ere argitaratu zen.

Espedientea jendaurrean egon den epean alegazio bakarra aurkeztu da, hain zuzen ere, Echemar,S.L. entitatearena.

Alegazioaren edukia laburbilduz ondorengo hau da:

- Haserako onarpena jaso duen  Plan Berezian  ibilgailuen aparkaleku erabilerara xedatu nahi den udal jabegoko lursailean  100 m² sabai izango lukeen eraikin bat aurreikustea proposatzen da aparkaleku erabileraren osagarri.

- Adierazitako lursaila Echemar, S.L.k darabilenez emakida kontratua duelako2003ko apirilaren 24tik, aurreikusten den eraikinaren gainean emakida zabaltzea eskatzen du, eraikina gauzatzea bere kontu izango litzatekeelarik.

 

 

Azterketa juridikoa

2/2006 legearen bigarren xedapen iragankorra arabera  egiturazko antolamendu eta antolamendu xehatuko zehaztapenei buruz lege horretan ezarritako erregulazioa aplikatzekoa izango da, legea indarrean sartzen denetik aurrera, hau da 2006ko irailaren 20a,  indarrean dauden arau eta planetarako.

Horrela aipatu legearen 53 eta 56 artikuluek xedatzen dute egiturazko antolaketa eta antolaketa urbanistiko  xehekatua.

Aurkeztu den alegazioan proposatzen denak, hau da, eraikigarritasun fisikoa handitzea 56. 1 artikuluaren e) atalean txertatu daiteke, beraz alde horretatik alegazioa onartzeko ez legoke inongo eragozpenik.

Eraikin berrira emakida zabaltzeari dagokionean, ez da hirigintza planeamendu onarpen prozesu batean erabaki daitekeen eskaera beraz emakidaren kontratua aztertu eta horren baitan erabaki beharreko espediente baten aurrean gaude.

Udal arkitekto aholkulariaren txostena kontuan izanik  eta 2/2006 Legearen 95 eta 96 artikuluak xedatzen dutena kontuan izanik, Hirigintza, Obra eta Zerbitzuetako batzordeak 2010eko apirilaren 14an  egindako batzarraldian Jon Legorburu, Haritz Salaberria eta  Iñigo Esnaolaren, aldeko botoarekin eta  Jesús Mª Martiarena eta Roberto Sánchezen  abstentzioarekin,

DIKTAMINATZEN DU:

BAT: Echemar, S.L.k  aurkezturiko alegazioa partzialki onartzea.

BI:  "Aserraderos de Lezo"  deritzon hiri eremurako Hiri Antolaketa Plan Berezia behin betikoz onartzea onarturiko alegazioak planean suposatzen duten moldaketekin.

HIRU: Plan Berezia aurkeztu duenari agintzea Testu Bateratu bat egiteko, onartutako aldaketa horiekin.

LAU: Erabaki hau Gipuzkoako Aldizkari Ofizialean argitaratzea, aurreko atalean aipatutako Testu Bateratua Lezoko Udalean aurkeztu ondoren".

  

Bozketa egin da eta diktamena onartu egin da aldeko bederatzi botoekin eta abstentzio batekin, Mikel Antxon Arrizabalagarena.

 

3.- Hirigune Historikoaren Birgaitze Plan Bereziaren behin betiko onarpena emateko diktamena (2008H0400001).

 

Jon Legorburuk, Hirigintza, Obra eta Zerbitzuetako zinegotzi delegatuak diktamena azaldu eta onartzeko eskatu du. Honela dio diktamenak:

"Eusko Jaurlaritzako Etxebizitza eta Gizarte Gaien Sailak Lezoko Kasko Zaharra Birgaitze Eremu Integratua izendatzeko espedientea haste erabaki zuen Lezoko Udalak horrela eskatuta.  317/2002 Dekretuaren 17., artikuluak xedatzen duena kontuan izanda, Izendapen hau gauzatzeko ordea,  derrigorrezkoa da Kasko Zaharraren Birgaitze Plan Berezi bat onartzea. Hori dela eta Lezoko Udalari dagokio aipatu Plan Berezi hau formulatzea eta izapidetzea.

Rosario Marijuan de la Asunción eta Javier Erkizia Olaziregi arkitektoak idatziriko aurrerapen dokumentua aurkeztu zuten Lezoko Udalak horrela aginduta. Aurrerapen dokumentu honen parte da  Ingurumenaren gaineko eraginaren baterako ebaluazio dokumentua ere.

Lezoko Udalak 2005ko azaroaren 3ko, 495. alkatetza-dekretuaren bitartez parte zaharreko Birgaitze Plan Bereziaren irizpideak, helburuak eta irtenbide orokorrak jasotzen dituen dokumentua onartu eta jendaurrean erakustea erabaki zuen.

Erabaki honen iragarkia Gipuzkoako Aldizkari Ofizialean argitaratu zen 2005ko azaroaren 9an. Aurrerapen dokumentua  30 egunez egon zen jendaurrean eta epe horretan zenbait iradokizun aurkeztu ziren.

Iradokizun hauei buruzko txostena idatzi zuen Parte Zaharreko Birgaitze Plan Berezia idazten ari den taldeak.

Horrela Lezoko Udalak, 2006ko martxoaren 17an Alkatearen 235 Dekretuaren bitartez parte zaharreko Birgaitze Plan Bereziaren irizpideak, helburuak eta irtenbide orokorrak jasotzen zituen aurrerapen dokumentua berretsi zuen eta plan honen haserako onarpenerako dokumentua idazteko ere agindu zuen.

2008ko maiatzaren 20ko Tokiko Gobernu Batzordean Lezoko Udalak haserako onarpena eman zion Parte Zaharreko Birgaitze Plan Bereziari.

Akordio hau Gipuzkoako Aldizkari ofizialean argitaratu zen  2008ko ekainaren 3an. Halaber, akordio hau prentsa idatzian ere argitaratu zen.

Akordio honen berri ere eman zitzaien arlokako eskumenak dituzten herri-administrazioei, proiektuaren kopia batekin, txostena egin zezaten.

Plan Berezi hau hiru hilabetez egon zen jendaurrean eta epe honetan bi alegazio aurkeztu ziren, hain zuzen ere Gesolnor, S.L.k eta Claudio Arregik aurkeztua. Bestalde epez kanpo beste hiru alegazio ere aurkeztu dira, Agustina Pontestak, Amaia Errastik eta Gurutze Santuaren Plazako 7 zenbakian dagoen eraikineko bizilagunenak.

Alegazio guzti hauen inguruko txostena egin  du Plan Berezia idatzi duen arkitektoak

Bestalde Lezoko Udalak izapidetu ostean Gipuzkoako Foru Aldundiak  2010ko otsailaren 2an buruturiko Diputatu Kontseiluan, Planeamenduko Arau Subsidiarioen Aldaketa, kasko zaharrean ( kasko zaharreko egoitza gunea, UAD 2, 1 sistema orokorraren zatia, 6,7,9 , 10 eta beste sistema orokorrak eta hirigintza arauetako 11 eta 13 artikuluak), Dokumentuari behin betiko onarpena eman zion.

Dokumentu  honen xede nagusien artea dago, Arau Subsidiarioak Lezoko udalak formulatu zuen Parte Zaharreko Birgaitze Plan Bereziaren (PERCH bezala ezagutzen dena) edukietara egokitzearena. Arau Subsidiarioetan kasko zaharrak duen mugaketa ez baitator bat PERCHak duenarekin eta azken hau da kontuan hartu beharrekoa, hain zuzen ere Lezoko Kasko Zaharra Birgaitze Eremu integrala izendatzeko prozeduran onarturiko mugaketarekin bat datorrelako.

Hori dela eta Parte Zaharreko Birgaitze Plan Bereziaren behin betiko onarpenerako Hirigintza, Obra eta Zerbitzuetako batzordeak 2010eko apirilaren 14an  egindako batzarraldian Jon Legorburu, Haritz Salaberria eta  Iñigo Esnaolaren, aldeko botoarekin eta  Jesús Mª Martiarena eta Roberto Sánchezen  abstentzioarekin,

DIKTAMINATZEN DU:

BAT: Aurkezturiko alegazioak Rosario Marijuan arkitektoak egindako txostenaren arabera erantzutea.

BI:  Parte Zaharreko Birgaitze Plan Berezia behin betikoz onartzea onarturiko alegazioak planean suposatzen duten moldaketekin.

HIRU: Onarturiko moldaketa hauekin, Plan Berezia aurkeztu duenari Testu Bateratu bat osatzeko agindua ematea.

LAU: Akordio hau Gipuzkoako Aldizkari Ofizialean argitaratzea, aurreko atalean adierazten den  Testu Bateratua Lezoko udalean aurkeztu ondoren."

 

            Jendartean Gurutze Santuaren Plaza, 6 zenbakiko etxebizitzetako bizilagunak daude eta haiei eman die hitza alkateak. Bizilagunak diote onartzera doan planak kaltea eragiten diela. Gurutze Santuaren Plaza 7ko eraikinari handitzen utziz gero, beraien etxebizitzetako argitasun eta bisten kaltetan izango dela urte dute. Udalak eragin omen du arazoa eta udalak irtenbidea aurkitu beharko duela diote.

 

Bai Jon Legorburuk, bai alkateak berak erantzun diete: bizilagunek egindako alegazioaren ondorioz egindako txosten teknikoarekin bat datoz. Bere egunean Udalak Gurutze Santuaren 7ko eraikinekoekin sinatutako hitzarmena medio, Piku Kale eta Atzekoateko gunea eskuratzen zen. Beraz, interes orokorrak medio, alegazioa ez onartzea bozkatuko dutela diote. Edonola, bi bizilagun komunitatearekin bitartekari lanak egiteko prest daude eta bide horretan eginak dituzte lehenengo bilerak.

Diktamena bozkatu eta ahobatez onartu da, hau da, bilkuran diren hamar zinegotzien aldeko botoarekin.

 

4.- Izaera iraunkorra duen kontratazio mahairako partaideen izendapena egiteko diktamena.

Honela dio onartzea proposatzen den diktamenak:

"Herri Administrazioen Kontratuei buruzko 30/2007 Legea partzialki garatzen duen maiatzaren 8ko 817/2009 Errege Dekretuaren 21. artikuluan xedatutakoari jarraiki, aurrerantzean prozedura ireki, mugatu edo hitzartuaren bidez eta legegintzaldi hau amaitu arte Lezoko Udalak egoki deritzon publikotasunarekin izapidetzen diren kontratutan kontratazio organoan egon beharko duten kontratazio mahaiko kide iraunkorrak, jarraian adierazitakoak, izendatzea proposatzen da.

Kontratazio Mahaiaren osaera:

Mahaiburua: Haritz Salaberria Goikoetxea. Ordezkoa: Jon Legorburu Arrastua.

1. Mahaikidea: Jon Legorburu Arrastua. Ordezkoa; Iñigo Esnaola Arbiza.

2. Mahaikidea: Udal Idazkari Xabier Loiola Aristi edo haren ordezkoa.

3. Mahaikidea: Udal Kontuhartzaile Pedro Etxarri Ollokiegi edo haren ordezkoa.

4. Mahaikidea: Joseba Eizagirre Manzisidor. Ordezkoa, Josu Xabier  Ponce González.

Idazkaria: Aitor Iztueta Garaikoetxea. Ordezkoa: Karlos Etxezurieta Sarasola.

Honako erabaki hau proposatu da eta  Hirigintza, Obra eta Zerbitzuetako batzordeak 2010eko apirilaren 14an  egindako batzarraldian Jon Legorburu, Haritz Salaberria eta  Iñigo Esnaolaren, aldeko botoarekin eta  Jesús Mª Martiarena eta Roberto Sánchezen  abstentzioarekin,

DIKTAMINATZEN DU:

BAT: Aurrerantzean prozedura ireki, mugatu edo hitzartuaren bidez eta legegintzaldi hau amaitu arte Lezoko Udalak egoki deritzon publikotasunarekin izapidetzen diren kontratutan kontratazio organoan egon beharko duten kontratazio mahaiko kide iraunkorrak, goian aipatutakoak, izendatzea.

BI: Erabaki honen berri ematea Gipuzkoako Aldizkari Ofizialean eta Lezoko Udaleko Kontratatzailearen Profilean."

Alkateak zehaztu du Kontratazio mahai iraunkor hau Hirigintza, Obra eta Zerbitzuetako kontratazio prozeduretan arituko dela soilik.

Alkateak egin duen zehaztapen horrekin diktamena bozkatu eta onartu egin da aldeko sei botokin eta lau abstentziokin, Kepa Garbizu, Enrique Figueroa, Jesus Mari Martiarena eta Mikel Antxon Arrizabalagarenak.

5.- Diktamena, 2010eko lan postuen zerrendan aldatzeko. (2009PE290001).

Jon Legorburuk diktamena onartzea proposatu du. Honela dio diktamenak:

"Udal Osoko Bilkurak, 2009ko abenduaren 2an egindako bilkuran,  2010 urteko plantila organikoa eta udal lan postuen zerrenda onartu zituen.

Lan postuen zerrendan ez zen jaso baldintza ezinbestekotzat elektrizista lan postua eskuratzeko B klaseko gidatzeko baimenaren jabe izan behar zenik.

Ulertzen dugu baldintza hau sartu beharrekoa dela elektrizista lan postuan aritzeko. Horiek horrela, alkatetzak Barne Batzordeari proposamena aurkeztu dio.

Haritz Salaberria, Jon Legorburu eta Urko Lopetegiren aldeko botoarekin eta Jesús Mª Martiarena eta Roberto Sánchezen abstentzioarekin, Barne Batzordeak behean heldu dena diktaminatu du osoko bilkurak onar dezan:

BAT: 2010eko lan postuen zerrendan, "B klaseko gidatzeko baimenaren jabe izatea" baldintza sartzea elektrizista lan postua eskuratu ahal izateko.

 

 

 

BI: Erabakiaren aurkako errekurtsoak:

a) Auzitara jo aurretik, eskatzaileak, hala nahi izanez gero, erabakia berraztertzeko errekurtsoa aurkez dezake 30/1992 Legearen arabera.

  • Horretarako, hilabeteko epea dauka, erabaki honen jakinarazpena jaso eta biharamunetik hasita.
  • Errekurtsoa aurkeztekotan Osoko Bilkurara jo behar da.

b) Bestela, administrazioarekiko auzi-errekurtsoa aurkez dezake zuzen-zuzenean.

  • Horretarako, bi hilabeteko epea dauka, erabaki honen jakinarazpena jaso eta biharamunetik hasita.
  • Errekurtsoa aurkeztekotan, EAEko Auzitegi Nagusiko administrazioarekiko auzitarako Donostiako epaitegira jo behar da."

Kepa Garbizuk dio nahiz eta baldintza hau jartzearekin ados egon, elektrikari lanpostua sortu eta betetzeko erabakiaren aurka emandako arrazoi berdinengatik ez dutela alde bozkatuko. Gogoratu du ez zaiela normala iruditzen lanpostua sortzea, bakarrik ezingo duelako lan egin, laguntzaileren bat beharko duelako. Bestalde, udalak ezin omen ditu gremio eta behar guztietarako langile propioak izan, eta ondorioz zuzenago iruditzen zaio kanpoko enpresa baten laguntza izatea lan hauetarako.

Diktamena bozkatu eta onartu egin da aldeko sei botokin eta lau abstentziokin,  Kepa Garbizu, Enrique Figueroa, Jesus Mari Martiarena eta Mikel Antxon Arrizabalagarenak.

6.- Diktamena, Altamira auzoan aparkaldi mugatua arautzen duen ordenantza behin betikoz onartzeko (2009UD290001).

Jon Legorburuk diktamena azaldu du. Honela dio diktamenak:

"2010eko otsailaren 3ko osoko bilkuran haserako onarpena eman zitzaion Altamira auzoan aparkaldi mugatua arautzen duen ordenantzari.

Espedientea jendaurrean izan da eta erreklamazioak jaso dira.

Barne Batzordean, Udaltzainburuak, EAJ/PNVko Lezoko Udal Taldeak Altamirako aparkaldi mugatua arautzeko ordenantzari aurkeztutako erreklamazioen berri eman du, eta informatu ditu.

Horiek horrela, eta aurkeztutako erreklamazioak aztertu ondoren, Haritz Salaberria, Jon Legorburu, Urko Lopetegi eta Jesus Mª Martiarenaren aldeko botoekin eta Roberto Sánchezen abstentzioarekin, Barne Batzordeak behean heldu dena diktaminatu du osoko bilkurak onar dezan:

BAT: Aurkeztutako 5 erreklamazioetatik 4 ontzat ematea:

 

1.- "6. artikulua, 1. Zonaldea: T. Garbizu kalea" atalean, "... auzotarrek" kendu eta "... udal baimena dutenek soilik..." jarri.

2.- 8. artikuluan "c) Ibilgailu bakoitzak txartel bakarra izango du" erantsi.

3.- "Txartelen ezaugarrien" atalean erantsi "'Serie zenbakia' inprimategiak txartel bakoitzari emango diona."

4.- "7. artikulua". Lehen parrafoaren ondoren, erantsi "Udaltzaingoak txartelen errejistroa egingo du, baimen zenbakien arabera".

BI: Erreklamazio bat ukatzea,  2d) atalekoa (8. artikuluari zuzendutakoa) eta erroldatu bakoitzak txartel bakarra izateari buruzkoa.

Kotxe matrikula bakoitzak eduki lezake txartela eta ez erroldatu bakoitzak txartel bakarra.

HIRU: Ordenantza behin betiko onartzea.

LAU: Altamira auzoan aparkaldi mugatua arautzen duen ordenantzaren testua Gipuzkoako Aldizkari Ofizialena argitaratzea."

Kepa Garbizuk lehenik alegazio tarteratu izanaren arrazoiak eman ditu: 1) jendaurreko epea bukatzear zela onartutako testuan ikusi zituen kontraesanak argitzeko, 2) bilkurako aktaren zuzenketaren bidez egin baino eraginkorragoa iruditu zitzaiolako alegazioaren tresna eta 3) onarpen eta argitalpen automatikoak ekidin nahia. Nahiz eta egindako alegazioa osorik ez onartzea diktaminatu, alde bozkatuko omen dute. Dena den, onartzen ez den alegazio hau ez dela ondo ulertu dio. Hau da, aparkatzeko txartela eskuratzeko baldintzetan, 8. artikuluari d) baldintza gehitzeak, "erroldatu bakoitzak txartel bakarra izango du", bi kotxe edo gehiago dituen pertsonari txartel bakarra izatea suposatuko lioke.

Neurri honen egokitasunari buruz eztabaidatu ondoren, azken alegazio hori ere araudian sartzea proposatu du alkateak eta horrela bozkatu da, hau da, diktamina gehi 8. artikulurako d) baldintza berriarekin, alegazioan proposatu bezala. Diktamena onartu egin da bilkuran diren zinegotzi guztien aldeko botoarekin.

 

7.- 2010/2011 ikasturterako, Tomás Garbizu Musika Eskolako tasak eta hobariak onartzeko diktamena (2010KO290002).

Alkateak diktamena onartzea proposatu du. Honela dio diktamenak:

"Xanti Espina Anduezak, Tomas Garbizu udalaren musika eskolako zuzendari gisa, 2010/2011  ikasturterako tasak eta hobariak onartzeko idazkia aurkezten du.

Kontu eta Hazienda Batzordeak, 2010/04/14an egindako bilkuran, Haritz Salaberria, Jon Legorburu eta Urko Lopetegiren botoa alde dela eta Kepa Garbizu  eta Roberto Sánchez zinegotzien abstentzioarekin

DIKTAMINATZEN DU:

BAT: Tasen aldaketa hastapenez onartzea Tomas Garbizu udalaren musika eskolarako, 2009/2010  ikasturterako.

 

 

 

 

 

 

 

BI:  Aplikatuko diren tarifak,  hauek dira:

Musika Eskola 2010-2011

ASIGNATURA

TASAK

Lezokoak

Kanpokoak

Tresna + Talde

275,00 €

455,40 €

1go Maila

138,00 €

227,70 €

Tresna +Talde + Osagarri 1

342,00 €

564,30 €

2 Tresna + Talde

551,00 €

909,70 €

Osagarriak, Musika Mintzaira eta Hezkuntza Musikala dira

HIRU: Hobariak, Tomas Garbizu Lezoko Udalaren Musika Eskolako matrikula tasen ordainetan.

Eskatzaileek aldez aurretik bete beharreko baldintzak:

1.- Lezon erroldatuta egotea eskatzen den urteko urtarrilaren 1a baino lehen.

2.- Udal zerga eta prezio publiko guztiak ordaindurik edukitzea.

 

Matrikula tasen ordainketan hobaria honako hauek izango dute:

1.- Aplikazio arauetan dagoen taulan ageri diren diru sarrerak gainditzen ez dituzten ikasleak. Hobaria: tasa horien %75.

2.- Famili ugariak. Kide bakoitzaren hobari eskubidea: %25.

Aplikazio arauak:

1.- Kideen zenbatekoa erabakitzeko Biztanleen Udal Erroldaren azken eguneratzean jasorik dagoen dokumentazioa hartuko da kontuan.

2.- Tasen hobari eskabideak Musika Eskolako Bulegoan aurkeztuko dira matrikula egiterakoan eta dokumentazio hau bateratuko zaie:

2.a) Bizikidetzaren ziurtagiria.

2.b) "Sarrera ekonomikoengatik" eskatuz gero, Errentaren azken deklarazioaren kopia aurkeztu beharko dute edota Foru Diputazioaren ziurtagiria esanez ez dutela deklarazioa egiteko obligaziorik.

2.c) Errenta Deklarazioa aurkeztean "guztira osagarri positiboak" zehazpena begiratuko da.

2.d) Obligaziorik ezaren ziurtagiria aurkeztuz gero, Deklarazio hori ez egiteko Foru Diputazioak gehieneko sarreratzat hartutako baremoak edukiko dira kontuan. Obligaziorik ezaren agiria bateratu (ogasuna) eta 10-T (enpresa) edo etekin gordinen ziurtagiria (Errotaburu). Tlf: 902-100040

2.e) Famili ugarien kasuan, famili ugariaren liburua, eguneratuta.

3.- Hobari eskubidea duten pertsonei, matrikula ordaintzerakoan aplikatuko zaie hobaria.

4.- Hobariek metatze-izaerarik ez dutenez, onuradunak gehien interesatzen zaiona aukeratu ahal izango du

5.- Hobaria ematea gertatzean, hori eskatu den ekitaldirako bakarrik izango da.

6.- Tasa-hobarietarikoren baten onura jasotzeko proposatzen diren baldintzak ikasle batek betetzen baditu, baina aurreko ikasturtean klaseetara asistentzia %85 baino gutxiagokoa izan badu, beste gabe automatikoki ukatu egingo zaio eskaera.  

Sarrera ekonomikoengatiko hobariari dagokion taula.

Sarrera ekonomikoengatiko hobariari dagokion taula.

Familiakide-kopurua

Sarrera ekonomikoak

€

Hobariak

1

14.826

% 75

2

25.308

% 75

3

34.352

% 75

4

40.796

% 75

5

45.598

% 75

6

49.224

% 75

7

52.810

% 75

LAU: Jendaurrean jartzea GAOn eta udaletxeko iragarki oholeko iragarki bidez, hilabeteko epean espedientea aztertu eta alegazioak aurkeztu ahal izateko. Epe horretan alegaziorik ez bada jasotzen, araudiak behin betiko onarpena izango luke.

Epe horretan alegaziorik ez bada jasotzen, araudiak behin betiko onarpena izango luke".

Kepa Garbizuk diktamenaren helburua ez dela argi agertzen esan du. Berak suposatzen du gastua gutxitzeko igoko direla prezioak. Ez dago ados azken urteetan musika eskolako prezioek izan duten igoerarekin: herritarrentzat %14a eta kanpokoentzat %25a.

Alkateak dio gastuak gutxitzea baino helburua gastuei muga bat jartzearena dela.

Diktamena bozkatu eta onartu da aldeko sei boto eta lau abstentziokin, Kepa Garbizu, Enrique Figueroa, Jesus Mari Martiarena eta Mikel Antxon Arrizabalagarenak.

 

 

 

 

8.- Ludoteka ordenantza fiskalaren aldaketarako diktamena (2010K0290002).

Alkateak diktamena azaldu du, tasen jaitsiera proposatzen omen da, zerbitzuari bultzada eman nahian. Honela dio diktamenak:

"Kultura sailak, ludoteka zerbitzuaren ordenantza fiskalaren aldaketari buruz aurkeztutako proposamena eta horri buruz kontuhartzaileak egindako txotena ikusirik,

Kontu eta Hazienda Batzordeak, 2010/04/14an egindako bilkuran, Haritz Salaberria, Jon Legorburu eta Urko Lopetegiren botoa alde dela eta Kepa Garbizu  eta Roberto Sánchez zinegotzien abstentzioarekin

DIKTAMINATZEN DU:

BAT: Ludoteka zerbitzuaren Tasen aldaketa hastapenez onartzea.

 

BI:  Aplikatuko den tarifa,  hau da:

  • Urteko kuota: 30€
  • Ordainketa modua: Ikasturte hasieran".

 

Kepa Garbizuk dio Iñigo Esnaolak proposamenarekin batera bidalitako datuak ez direla zuzenak, han agertzen diren prezioak ez direlako indarrean daudenak, aurreko urtekoak baizik. Kepa Garbizuk azken urtetako prezioen merketze bilakaera azaldu du.

Bai Iñigo Esnaolak eta bai alkateak diote ludoteka zerbitzuan erabiltzaile gehiago izateko beste apustu bat dela proposamena. Oarsoaldea mailan egindako aisialdiaren azken azterketaren emaitzak eta irizpideak jarraituz, eta euskara erabiltzeko eta jendeak erabili dituen guneak izaten jarraitzeko, prezioa merketzearen aukera ere aprobetxatu nahi dela diote.

Diktamena onartu egin da aldeko sei botokin eta lau abstentziokin, Kepa Garbizu, Enrique Figueroa, Jesus Mari Martiarena eta Mikel Antxon Arrizabalagarenak.

9.- Aurrekontuaren aldaketaren diktamena (2010KO020001)

Alkateak azaldu du diktamena. Honela dio:

"Kreditu Aldaketaren espedientea egiten ari denez, 2010eko aurrekontuko gastuen aurrekontuko partiden arteko kreditu transferentziaz, 2010eko martxoaren 9ko  D10/00182 dekretuaren bidez hasia, Ogasun eta Kontuetako Batzordeak, 2010eko apirilaren 14an egindako bilkuran,  Haritz Salaberria, Jon Legorburu eta Urko Lopetegi   zinegotzien aldeko boto ponderatuekin eta  Kepa Garbizu zinegotziaren  abstentzioarekin, behean heldu den proposamena diktaminatu du osoko bilkurak onar dezan:

BAT: Kreditu Aldaketarako espedientea onartzea, gastuen aurrekontu partida batzuen artean kreditu-transferentziarengatik identifikazio zk. 30001/2010, 2010-03-09koa eta zenbatekoa 310.682,45€."

 

Diktamena bozkatu eta onartu egin da aldeko sei botokin eta lau abstentziokin, Kepa Garbizu, Enrique Figueroa, Jesus Mari Martiarena eta Mikel Antxon Arrizabalagarenak.

10.- Oarsoaldea S.A.ko 2010eko kudeaketa plana eta aurrekontua onartzeko diktamena (2010KO320022).

Alkateak esan du udalek Oarsoaldeko Garapen Agentziaren kudeaketa plana eta aurrekontuak ezagutu eta bozkatzeko aukera izateko egin dela Ogasun batzordean aurkezpena eta diktamena. Honela dio diktamenak:

 

"Alkate Lehendakariak, Oarsoaldea SA-ko 2010eko Kudeaketa Plana eta Aurrekontuari buruz aurkeztutako proposamena eta horri buruz kontuhartzaileak egindako txotena ikusirik,

Kontu eta Hazienda Batzordeak, 2010/04/14an egindako bilkuran, Haritz Salaberria, Jon Legorburu eta Urko Lopetegiren botoa alde dela eta Kepa Garbizu  zinegotziaren abstentzioarekin

DIKTAMINATZEN DU:

BAT: Oarsoaldea SAko 2010eko Aurrekontua eta Kudeaketa Plana onartzea, zenbatekoa 327.682,45€."

Diktamena bozkatu eta onartu egin da bilkuran diren zinegotzi guztien aldeko botoarekin.

 11.- Alkatearen, Organo Kolegiatuetako udal-ordezkarien eta Delegatuen txostenak.

Jon Legorburu, Hirigintza, Obra eta Zerbitzuetako zinegotzi delegatuak hainbat konturen berri eman du:

  • - Inbertsioetarako Zapatero planaren bidez egindako obrak bukatu, ordaindu eta dirulaguntza jasota dagoela. Kudeaketa horretan aritu diren teknikariak zoriondu ditu.
  • - 2010. urterako "Zapateroren bigarren planerako" lau obrak egiteko eskaera onartu dela dio: Itturrin poligonoko argiteria, Andreone Kultur Etxeko eta Udaletxeko zaharberritzeak, eta Pysbe eta San Pedro auzoko argiteria berritzea.
  • - Jauregialdeko obrak maiatzean hasiko direla dio.
  • - Markesane parkean, Aranzadi Zientzia Elkarteak gidatutako eskola tailerretako lanetan Lezoandia Jaunaren 1go dorretxearen aztarnak azaldu direla dio. Azterketa arkeologikoa egin ondoren berriz estaltzea erabaki dutela dio eta bitartean eskola umeak bisitak egiten ari direla.
  • - Udaltzainen gaueko zerbitzua Oiartzunekin batera ematearen esperientzia ondo doala, normaltasun osoz.

Iñigo Esnaolak, Kultura eta Gazteria gaietarako zinegotzi delegatuak kontu hauen berri eman du:

  • - Kiroldegiko urteko memoria egina dagoela eta pasako zaiela zinegotziei.
  • - Mendekoste jaiak prestatzen ari direla, eta nobedade bezala igandean Atarratzetik etorritako taldeak emango duen pastoral zati bat ikusi ahal izango dela.
  • - Danborrak erosteko herriko elkarteei emango zaien dirulaguntzaren berri eman du.
  • - Udalak hiru liburu berri aurkeztuko dituela datozen egun eta hilabetetan: Polentzi Gezalaren biografia, San Joan inguruan aurkeztuko dena; Lezo airetik, azkeneko 30 urteetan herriak izan duen bilakaera jasotzen duena; eta, Elias Salaberriaren Historia, Aranzandi Zientzia Elkarteak landutakoa.
  • - Herriko gazteekin gazte plana lantzen hasi direla.
  • - Musika eskolako gastuak azken urteetan nahi baino gehiago igo direnez (289.000 € 2000 urtean eta 418.000 € 2009 urtean), haren dimentsioa mugatzeko planteamendua lantzen ari direla dio.

Alkateak kontu hauen berri eman du:

- Ogasun arloan: aurrekontuetan hainbat kreditu aldaketa egin direla esan du, Madrilgo gobernuaren, Zapateroren 2. planaren, dirulaguntzak direla eta. Bestalde, likidazioa bukatzear dagoela eta haren berri aurreko astean egindako batzorde berriemailean eman zela.

- Gizarte zerbitzuetan, Eusko Jaurlaritzak izan duen arazo informatikoa medio atzerapenarekin bada ere, larrialdietarako dirulaguntzak banatzen ari direla dio. Eusko Jaurlaritzak urte guztirako diru kopurua ez duela ziurtatu ere esan du.

- Eguneko zentroaren inguruan dio, Gipuzkoako Foru Aldundiko teknikariekin batera obra ikusi dutela, aurreratua aztertu dutela eta beharbada urte honetan Gipuzkoako Foru Aldundiak ekipatzeko moduan izango dela.

- Apartamentu babestuen ekipamenduaren horniketarako lehiaketa baldintzak prestatzen ari direla eta Tokiko Gobernu Batzarrean onartuko direla dio. Ekaineko ohiko plenoan apartamentu horien araudia aurkeztuko omen dute.

- Euskara gaiei dagokionez dio, Oarsoaldeatik komunikazio kanpainaren esleipen prozedura martxan dagoela.

- Herritarren sarea osatzeko ekimena abiatu dela eta asteartean izan omen zuten lehen bilera.

- Udalak aldizkari bat kaleratu duela eta udal marka berri bat sortu dela, ez orain arteko marka ordezkatzeko, komunikazio ardura indartzeko baizik.

- Portuaren inguruan Gipuzkoako Foru Aldundiak plan bereziaren onarpenaren tramiteekin aurrera jarraitu duela adierazi du. Alkateak kritika egin du, portu inguruko herrien soberania eta autonomia aintzat hartzen ez duelako; Lezoko herritarren gehiengoak eskatzen duena jasotzen ez duelako eta nabarmen delako beste interes batzuk lehenesten dituela.

 

12.- Galde-eskeak.

 

1.- Kepa Garbizuk beste 18 galdera aurkeztu ditu idatziz, udal erregistroan. 115 galdera erantzun gabe daudela esan du. Horietatik 36k urte bat baino gehiago daramate erantzunik gabe.

2.- Kepa Garbizuk galdetu du ea Langileen Komiteak edo Udaltzainek eskatutako batzorderik osatu den. Alkateak dio bi bilera egin direla, gaietan orain ari direla sartzen baina oraindik ez dagoela komitearen proposamen zehatzik.

3.- Kepa Garbizuk galdetu du marka berriak eragiten dituen gastuak zenbatekoak diren. Alkateak dio iaz 15.000 €tako esleipena egin zela. Aldizkariak berriz, 5.000 €tako gastua izan duela dio. Mikel Antxon Arrizabalagaren iritziz ez da beharrezkoa gastu hori.

Aktaren amaiera.

Beste aztergairik geratzen ez denez, alkate-lehendakariak 20:55etan eman dio buru bilkurari. Eta nik, idazkari naizen aldetik, akta 828.444.etik 828.456.ra arteko zenbakiak dituzten orri ofizialetan jaso eta horren guztiaren fede ematen dut,  eta bilkuran izan diren zinegotzi guztiek izenpetu egin dute akta hau.

link 2010.eko Martxoaren 5ekoa
Data:2010-03-05
Agiri mota: Osoko Bilkuraren akta
Lasterbideak:
Mamia: 

Lezoko Udaletxeko Biltzar Areto Nagusian, 2010eko martxoaren 5ean, ostirala, 19:30etan, eratu da OSOKO UDALBATZA, EZOHIKOA egiteko xedez, lehen deialdian, Haritz Salaberria Goikoetxea alkatearen lehendakaritzapean eta ondorengo zinegotzi hauek bertan direla: Jon Legorburu Arrastua, Iñigo Esnaola Arbiza, María Pilar Legorburu Echegaray, Urko Lopetegi Campano eta Jaione Lekuona Irazusta.

Irati Aranburu Salaberria beranduago sartu da bilerara, deialdiko bigarren gaia tratatzen hasi direnean.

Ez dira bilerara azaldu Kepa Garbizu Azkue, Enrique Figueroa Laboa, Jesús María Martiarena Jaca, Miguel Antonio Arrizabalaga Brusín eta Roberto Sánchez Sánchez.

Bertan da eta egintzaren fede eman du udal idazkaria den Xabier Loiolak.

1.- Proposamena,  345/08 Administrazio auzi-helegitean atzera egiteko.

Alkateak azaldu du gaur goizeko Hirigintza Batzordeak diktaminatutako proposamena. Honela dio:

"2008ko otsailaren 19an Gipuzkoako Foru Aldundiko Diputatuen Kontseiluak hasierako onarpena eman zion "Pasaiako Portuko zerbitzugunearen antolamendurako Plan Bereziari". Horri dagokion administrazioarekiko auzi-helegitea Euskal Autonomia Erkidegoko Auzitegi Nagusiko Administrazioarekiko auzien Sala bideratzen ari da 345/08 zenbakiarekin.

Bestalde, Pasaiako Portu Agintaritzak 2009ko apirilaren 22an plan berezi horren berridazketa onartu zuen eta  Gipuzkoako Foru Aldundira igorri bere izapidetzerako.

Ondoren, Gipuzkoako Foru Aldundiko Diputatuen Kontseiluak 2009ko ekainaren 23an Pasaiako Portu Agintaritzak berridatziriko Plan Bereziari haserako onarpena ematea erabaki zuen.

Izan ere, 345/08 zenbakia duen helegitearen gaia ondoren berridatzi den Plan Bereziaren aurrekari huts bilakatu da. 345/08 helegiteak jada ez du xederik Gipuzkoako Foru Aldundiak haren behin behineko onarpenean atzera egin zuelako. 2008ko otsailaren 19an haserako onarpena jaso zuen plan berezia 2009ko ekainaren 23an haserako onarpena jaso zuen berridatziriko plan bereziak ordezkatu du.

Halaber bi prozedurak onartzeko egoerak ere oso desberdinak dira.

Hori dela eta, gure iritzian ez du zentzurik Plan Berezi baten haserako onarpen akordio baten aurkako helegitean jarraitzeak, ondorengo beste haserako onarpen batek ordezkatu duenean.

Horregatik, Hirigintza, Obra eta Zerbitzuetako batzordeak 2010eko martxoaren 4ean egindako batzarraldian Jon Legorburu, Haritz Salaberria eta Iñigo Esnaolaren aldeko botoarekin eta Jesus Mº Martiarenaren abstentzionarekin DIKTAMINATZEN DU:

LEHENA: Atzera egitea Gipuzkoako Foru Aldundiak "Pasaiako Portuko Zerbitzugunearen Antolamenduko Plan Berezia" onartzearen aurka jarritako administrazioarekiko auzi-helegitean. Helegite hori Euskal Autonomia Erkidegoko Auzitegi Nagusiko Administrazioarekiko auzien Sala bideratzen ari da 345/08 zenbakiarekin."

Diktamena bilkuran diren zinegotzi guztien aldeko botoarekin onartu da.

Irati Aranburu zinegotzia sartu da osoko bilkurara. Berarekin zazpi dira bilkuran diren zinegotziak.

2.- Mozioa, Emakumeen mundu martxarekin bat egitearen aldekoa.

Pili Legorburu zinegotziak irakurri du mozioa. Honela dio mozioak:

"Aurtengo honetan Euskal Herriko mundu martxa eta Martxoak 8 eguna eskutik helduta datozkigu.  Emakumeon eskubideen aldeko aldarrikapen eta borrokarako eguna mundu osoan eta baita Euskal Herrian ere.  Euskal Herriko mundu martxa indartzea eta edukiz betetzea izango da aurtengo apustu nagusia. Zentzu horretan 4 izango lirateke landuko diren aldarrikapenak:

  • Emakumeon aurkako indarkeria jendartean gertatzen den giza eskubideen urraketa larrienetakoa eta hedatuenetakoa da.
  • Emakumeon eskubide sexual eta erreproduktiboak ez daude bermatuta. Emakumeon sexualitatea, genero aginduek arautzen jarraitzen dute.
  • Prekarietateak oraindik ere emakume aurpegia du. Egun, sexuaren araberako lan banaketan oinarritzen den eredu ekonomiko kapitalista, liberalista eta patriarkara dugu.
  • Elikadura burujabetza, herriek beren nekazaritza eta elikadura politiken gainean erabakitzeko eskubidea da.

Emakumeon eskubideen aldeko borroka ezin da egun edota aste batera mugatu, are gehiago, egungo marko juridiko politikoak bigarren mailako herritarrak izatera behartzen gaituenean. Emakumeok pairatzen dugun zapalkuntza estrukturala da eta egungo markoak zapalkuntza hau mantentzeaz gain emakumeok gure buruaren jabe eta dagozkigun eskubideen jabe  ez izatera kondenatzen   gaitu. Horregatik da beharrezkoa marko aldaketa, emakume eta gizon askez osatutako Euskal Herri aske  batean bizi nahi dugulako. Aldaketa politikoa lortzera bideratutako fase honetan emakumeontzat ezinbestekoa da aldaketa soziala ere bultzatzea, berdintasuna, askatasuna eta elkartasunean oinarritutako jendarte eredu bat nahi dugulako.

Beraz, Irekitzera goazen fase berri honetan emakumeok subjektu politikoak izan behar dugu, prozesu demokratikoaren fase ezberdinetan aukera berdinetan parte hartzeko. Erabaki gune guztietan emakumeen  parte hartzea bermatu behar dugu. Bestalde, ildo honetan mugimendu feministak subjektu gisa jokatu beharreko paper aktiboa bultzatuko dugu.

Hau guztia kontuan izanik ondorengoa eskatzen zaio Lezoko udal batzarrari:

  • 1. Erronka handia dugu aurrean baina gure konpromisoa sendoa da, emakumeen eskubideen gutuna erreferentzi bezala hartuta lanean jarraitzeko konpromisoa berrestea.
  • 2. Emakumeen Euskal Herriko mundu martxaren baitan zein Martxoak 8an antolatutako ekimenekin bat egitea.
  • 3. Ekimen guzti hauetan parte hartzeko deia luzatzea Lezoar orori eta bereziki emakumeei."

Mozioa ahobatez onartu da.

Alkateak gogoratu du aipatutako martxa datorren ostegunean izango dela eskualdean, eta ongi etorria eta harrera egitea gonbidatu ditu zinegotzi eta herritarrak, arratsaldeko zortziretan Altamirako errotondan eta gero, Errenterian egingo den ekitaldian.

3.- Mozioa, Jose Lorenzo Aiestaranen atxiloketaren inguruan.

Alkateak irakurri du mozioa. Honela dio:

"Lorentxo Aiestaran Fanekas askatu!

Aurreko igandean Frantzia iparraldeko Cahan herrian Lorentxo Aiestaran Fanekas Lezoarra atxilotu zuten.

Frantziako poliziak lege antiterrorista aplikatu eta inkomunikazio egoeran izan dute. Modu berean, terrorismoaren aurkako Parisko epaitegitik pasa dute.

Honek guztiak sortu duen egonezin eta eskubide zapalketarekin.

Fanekas 1976an izan zen lehenengo aldiz atxilotua, beste 5 Lezoarrekin batera,  eta hilabete batzuk pasa zituen Martuteneko espetxean. 1978ko abenduan Ipar Euskal Herrira ihesi joan behar izan zuen. Bertan,  1985ean Frantziako Poliziak atxilotu eta Venezuelara deportatua izan zen. 2000 urtean lan istripu batean hanka puskatu zuen eta bihotzekoak eman zion. Eta 2002an Espainiako gobernuaren presioaren ondoren Venezuelako gobernuak atxilotze agindua zabaldu zuen. Azkenik 2006 urtean Venezuelan naziotasuna eskatu zuen beste 3 errefuxiaturekin batera, baina ukatua izan zitzaien.

Guztira 31 urte pasa ditu Fanekasek Herritik urrun, familiatik urrun eta ihesean.

Fanekasena  ez da kasu bakarra hala ere. Hau bezalako kasuak ugariak dira eta luzeegi jo du gatazkak.

Eta Lezoarrok ondo baino hobeto dakigu errepresioaren bidea ez dela konponbide bidea. Errepresioak ez dio gatazkari konponbidea ekarriko, guztiz kontrakoa, sufrimendua dakar. Gatazka gainditzeko errepresioaren aldeko apustuak gainditu behar dira.

Gatazkaren konponbidea demokraziaren aldeko apustu bat eskatzen du, guztion aldetik. Gatazkaren muin politikora jo eta konponbide demokratiko bat eman behar zaio gatazkari. Euskal herritarroi hitza eta erabakia zor zaigu, gure etorkizuna askatasun osoz eta egitasmo politiko guztien artean erabakitzeko eskubidea errespetatzean datza konponbidea.

Egoera bereziki larria da testuinguru politikoa ezker abertzaleak Zutik Euskal Herria ebazpenean jasoriko iniziatibarengatik baldintzaturik dagoelako. Prozesu Demokratikoa lehenbailehen errealitate bihur dadin bere jarduera guztia indar metaketaren eta herri aktibazioaren mesedetan jartzeko konpromiso berretsi du ezker abertzaleak. Nazioartean zein Euskal Herrian ebazpen honek oniritziak jaso ditu.

Baina, eta agerikoa da hau, ezinezkoa da Euskal Herrian konfrontazioa termino politiko hutsetan emango den eskenatoki demokratikori berri bat sortzea ezker abertzaleak soilik urratsak emanda. Honela, eragile guztion ekarpena ezinbestekoa izango da. Halaber, estatu espainolak errepresio bideari uko egin behar dio.

Hori guztia dela eta, honako mozio hau aurkezten dugu Udal Osoko Bilkurak eztabaida eta onar dezan:

  • 1. Fanekasen atxiloketa eta gainontzeko atxiloketa guztietan beharrezko ikusten dugu ondorengo neurriak betetzea:
  • Inkomunikazioaren amaiera eta berau onartzen duten arauen desagerpena.
  • Atxilotuen eskubideak murrizten dituzten arau guztien desagerpena. Zehazki Prozedura Kriminaleko Legearen 520 eta 527. artikuluen ezabaketa.
  • Entzutegi Nazionalaren eskumenen desagerpena eta epaile naturalaren eskubidea bermatzea.
  • Atxilotu guztiek konfiantzazko mediku baten bisita pribatua edukitzeko eskubidea, bai komisaldegian zein auzitegian.
  • Atxiloketa aldi osoa irudi eta soinu bidez grabatua izatea, eta grabazio horiek defentsako abokatuen eskura egotea.
  • Atxilotu guztiek beraiek izendatutako abokatu bat izateko eskubidea bermatu eta errespetatzea eta honekin elkarrizketa pribatu bat izateko eskubidea bermatzea.
  • 2. Gatazka politikoa gainditzeko bide polizial-judiziala guztiz antzua da. Horren aurrean, alternatiba bakarra prozesu demokratikoa da. Euskal Herritarren gehiengoaren nahiari eta eskariari erantzunaz, herri honen hitza eta erabakiaren errespetuan oinarritutako prozesu demokratiko baten eraikuntzan indarrak biltzeko garaia dela aldarrikatzen dugu.
  • 3. Honela, eszenatoki demokratiko eta prozesu demokratikoaren aldeko urratsak eman eta indarrak bilduz konpromisoak hartzeko deialdia luzatu nahi diegu euskal herritarrei. Garai bateko makinaria juridiko eta errepresiboa indargabetzeko unea iritsi da, alderdien legea barne. Hori egin ezean prozesu demokratikoa garatzea ezina izango delako.
  • 4. Proiektu politiko guztiak defenda daitezkeela aldarrikatzen dugu. Bide demokratiko eta politikoak erabiliz, baldintza berdinetan, proiektu politiko guztiak garatzea bermatu eta ahalbideratuko duen prozesu demokratikoaren aldeko apustua egiten dugu.
  • 5. Azkenik, onartutakoaren berri herritarrei eta komunikabideei jakinaraztea erabakitzen dugu."

Jendartetik atxiloketaren inguruko azken berriak eman dituzte: Paris inguruko kartzelara eraman dutela; 2 hilabetetan bakartuta egongo dela, ez dei ez bisitarik. Epaitu bitarte bakarrik juezak baimendutako bisitak izan ahalko dituela. 86 urteko bere ama afektatua dagoela oso.

Aktan jasotzea nahi dute bilera etorri ez diren zinegotziei luzatzen dieten kritika: 31 urte herritik kanpo dagoen lezoar baten egoeraz kezkatzeko azaldu ez izana. Adibide txarra omen da hori, hitza bidez gatazka konpondu nahi izateko ematen den mezuarekin.

Mozio, bilkuran diren zinegotzi guztien aldeko botoarekin onartu da.

Aktaren amaiera.

Beste aztergairik geratzen ez denez, alkate-lehendakariak 20:00etan eman dio buru bilkurari. Eta nik, idazkari naizen aldetik, akta     .etik      .ra arteko zenbakiak dituzten orri ofizialetan jaso eta horren guztiaren fede ematen dut,  eta bilkuran izan diren zinegotzi guztiek izenpetu egin dute akta hau.

link 2010.eko Otsailaren 3ekoa
Data:2010-02-03
Agiri mota: Osoko Bilkuraren akta
Lasterbideak:
Mamia: 

Lezoko Udaletxeko Biltzar Areto Nagusian, 2010eko otsailaren 3an, asteazkena, 19:30etan, eratu da OHIKO OSOKO UDALBATZA egiteko xedez, lehen deialdian, Haritz Salaberria Goikoetxea alkatearen lehendakaritzapean eta ondorengo zinegotzi hauek bertan direla: Irati Aranburu Salaberria, Jon Legorburu Arrastua, Iñigo Esnaola Arbiza, María Pilar Legorburu Echegaray, Urko Lopetegi Campano, Jaione Lekuona Irazusta, Kepa Garbizu Azkue, Enrique Figueroa Laboa, Jesús María Martiarena Jaca eta Miguel Antonio Arrizabalaga Brusín.

Ez da bilerara azaldu Roberto Sánchez Sánchez.

Bertan da eta egintzaren fede eman du udal idazkaria den Xabier Loiolak.

1.- Egoki irudituz gero, 2009ko abenduaren 2 eta 23ko aktak onartzea.

Bi aktak aho-batez onartu dira inolako zuzenketarik gabe.

2.- Lezoko AA.SS.en 27 zenbakidun aldaketari hasierako onarpena emateko diktamena. Papresa, S.A.U.aren instalakuntzak handitzeko lur hiritargarri industriala klasifikatzeko eta kalifikatzeko  (2009H0310003)

 

Jon Legorburuk diktamena azaldu du. Gogoratu du Papresako enpresa komitearen gestio bidez hasitako gaia dela hau. Onartzea proposatzen duen diktamenak honela dio:

Lezoko Udalak 2009ko uztailaren 3an buruturiko Osoko  Bilkura, Lezoko Arau Subsidiarioen 27 zenbakidun aldaketa, Papresa SAUren instalazioak handitzeko lur hiritargarri industriala klasifikatzeko eta sailkatzeko formulatzea eta idaztea erabaki zuen  Papresa SAU  aurkezturiko dokumentua kontuan izanik

Halaber, Babes zibil, ingurugiro, kultur ondare eta natur ingurunean eskumenak dituzten Eusko Jaurlaritzaren eta Foru Aldundiaren organoei bere ordenamenduarengatik errespetatuak izan behar duten ingurugiro, kultur ondare eta natur ingurunearen baldintzatzaileen eta egon litezkeen arriskuen berri eskatzea ere erabaki zen, behar bezalako justifikazio tekniko eta juridikoekin bi hilabete gaindituko ez dituen epearen.

Azkenik, Osoko bilkura honetan  espedientean dagoen Hiritarren Parte Hartze Programa onartzea  ere erabaki zen.

Lezoko Udalak 2009ko uztailaren 7an Gipuzkoako Foru Aldundiari Planeamenduko Arau Subsidiarioen 27. aldaketari buruzko erreferentzi txostena eskatuz idatzia igorri zion  aldaketaren inguru eraginaren ebaluazio konjuntoaren hasiera komunikazioaren ale bat bateratuz

2009ko irailaren 16an Gipuzkoako Foru Aldundiko Garapen Iraunkorreko Departamentuak idatziriko espediente honi dagokion Erreferentziazko Txostena jaso ondoren Papresa S.A.U.ren instalazioak handitzeko lur hiritargarri industrialaren klasifikazioa eta sailkapenari dagokion lezoko planeamenduko arau subsidiarioen 27 zenbakidun aldaketaren lehen planeamendu  dokumentoa eta  inguru eraginaren ebaluazio bateratuaren azterketa bidali zizkion Lezoko Udalak 2009ko azaroaren 25an Gipuzkoako Four Aldundiari, (euskarri grafikoan eta C.Dan) dagokion ingurumen eraginaren autariko txostena eskatuz.

183/2003 Dekretuaren 18 artikuluak xedatzen duena kontuan izanik Ingurumen-organo eskudunak  ingurumen gaineko eraginaren atariko txostena emango du bi hileko epea. Epe hori toxena egin gabe igarotzen bada, prozedurak aurrera jarraitu ahal izango du.

2/2006 Lurzoru eta Hirigintza Legearen 90 artikuluak eta 103 eta hurrengo artikuluek xedatzen dutena eta aipatu lege hori garatzen duen 105/2008 Premiazko Neurrien Dekretuaren 30 eta hurrengo artikuluek xedatzen duena kontuan izanik. Hirigintza, Obra eta Zerbitzuetako batzordeak 2010eko urtarrilaren 27an  egindako batzarraldian  Haritz Salaberria, Jon Legorburu eta Iñigo Esnaolaren, aldeko botoarekin eta Jesus Mari Martiarenaren abstentzioarekin,

DIKTAMINATZEN DU:

BAT: Lezoko Arau Subsidiarioen 27 zenbakidun aldaketari haserako onarpena ematea, Papresa SAUren instalazioak handitzeko lur hiritargarri industriala klasifikatzeko eta sailkatzeko.

BI: Lezoko Arau Subsidiarioen 27 zenbakidun  aldaketa dokumentua jendaurrean jartzea, Gipuzkoako aldizkari ofizialean eta lurraldean hedadura gehien duen egunkarian edo egunkarietan argitaratuz. Plana berrogeita bost (45) egunez egongo da jendaurrean, azken argitalpenetik kontatzen hasita.

HIRU: Akordio hau arloka eskumenak dituzten administrazio publikoei jakinaraztea bere ezagutzarako eta txostenak egin ahal izateko.

LAU: Dokumentuaren kopia mugakide diren udalerriei igortzea.

Kepa Garbizu eta Mikel Antxon Arrizabalagaren galderei erantzunez alkateak argitu du Aldundiak ez duela bidali, horretarako dituen bi hilabeteko epean, Ingurumenaren inguruko aurretiazko azterketa. Hala ere, alkateak dio Plan Orokorrari Aldundiak egindako ingurumen azterketan, eremu horri buruz ez zuela apartekorik esaten. Plan Orokorrak eta gaur proposatzen den aldaketak eduki bera dute eremu honetarako.

Kepa Garbizuk dio kontra bozkatuko duela EAJ-PNV udal taldeak, uztailaren 3ko osoko bilkuran azaldutako arrazoiengatik.

Mikel Antxon Arrizabalagak dio abstenitu egingo dela jendaurreko epearen ondoren, behin behineko erabakia hartzerakoan zehaztuko duela bere iritzia.  

Diktamena onartu egin da aldeko zazpi boto, aurkako hiru (Kepa Garbizu, Enrique Figueroa eta Jesus Mari Martiarena) eta abstentzio batekin (Mikel Antxon Arrizabalaga).  Hau da, osoko bilkura osatzen dutenen gehiengo osoaren aldeko botoarekin onartu da.

Irati Aranburuk alde egin du.

3.- Altamira auzoan aparkaldi mugatua arautzen duen ordenantza hasieraz onartzeko diktamena (2009UD290001).

Jon Legorburuk diktamena eta araudiaren zergatiak azaldu ditu. Altamirako auzotarrek egindako eskaeren ondorioa dela esan du. Bertan bizi ez direnen kotxe asko aparkatzen omen dira eta bertakoentzat tokirik ez dela izaten.

Proposatutako ordenantzari aldaketa batzuk egin zitzaizkion Barne Batzordean diktaminatu aurretik eta gaurko bilkuran ere beste batzuk onartzea proposatu du Jon Legorburuk. Horrela, 8. artikulua kentzea proposatu du, iraupen mugatua eta haren txartela arautzen duena. Bere iritziz ez du merezi auzoan aparkaleku librerako tokiak gordeko direnez egun baterako aparkamendu mugatuak arautzen hastea.  8. artikulua kentzeak ondorengo artikuluen zenbakiak eta horien barnean artikulu zenbakiei egiten zaizkien erreferentziak zuzendu beharra ondorioztatzen du. Ordenantza jendaurrean egongo omen da eta epe horretan hobetzerik izango dela dio Jon Legorburuk.

Kepa Garbizu ados dago proposatutako aldaketarekin eta beste aldaketa batzuk proposatu ditu: Altamiraren auzo izaera eta Tomas Garbizuren kale izaera zuzen jasotzea testuan; 7. artikuluko 2. lerroaldean aipatzen diren egoera berezien adibideren bat jasotzea testuan; azken xedapenean araudiaren artikulu kopuruari egiten zaion erreferentzia zuzentzea; ibilgailuko txartel bakarra banatzea eta txarteletan serie edo erregistro zenbakia jasotzea.

Mikel Antxon Arrizabalagak dio abstenitu egingo dela behin betiko proposamena zein den jakin arte.

Alkateak egindako aldaketak diktaminatutako testuari gehitzea eta haiek guztiak batera bozkatzea proposatu du. Aldeko bederatzi boto eta abstentzio bakarrarekin (Mikel Antxon Arrizabalaga) erabaki hauek hartu dira:  

BAT: Altamiran aparkaldi mugatua arautzen duen araudi berriari hasierako onarpena ematea osoko bilkurak egindako aldaketekin.

BI: Jendaurrean jartzea G.A.O.n eta udaletxeko iragarki oholeko iragarki bidez, hilabeteko epean espedientea aztertu eta alegazioak tarteratu ahal izateko.

Epe horretan alegaziorik ez bada jasotzen, araudiak behin betiko onarpena izango luke.

HIRU: Erabaki hau tramitezkoa denez ezin da bere aurka errekurtsorik jarri.

4.- Norbaitek eskaturik ematen zaizkion dokumentuak tramitatzearen gaineko tasaren aldaketa onartzeko diktamena (2009KO290001).

Alkateak dio Altamira auzoan aparkatzeko eman behar diren txartelen prezioa xede duen Ogasun Batzordeak ordenantza aldatzeko onartutako diktamena aldatu egin behar dela egun bakarreko baimena kendu egin baita arauditik, eta, beraz, ez da txartel mota hori behar.

Aldaketa horrekin diktamena bozkatu eta onartu egin da, aldeko bederatzi boto eta abstentzio batekin (Mikel Antxon Arrizabalaga), ondoko erabakiak hartuz:

BAT: Hasierako onarpena ematea, norbaitek eskaturik, ematen zaizkion dokumentuak tramitatzearen gaineko tasaren aldaketari, ondorengo atala gehituz:

Altamira auzoan aparkaldi mugaturako baimenak eman eta tramitatzea.

a.- Urteko baimena emateagatik aplikatuko den tasa: 10,00 €.

BI: Informazio publikorako hilabeteko epea irekitzea, Gipuzkoako Aldizkari Ofizialean eta iragarki oholtzan iragarkia argitaratuz, alegazioak aurkez daitezen.

Epe horretan alegaziorik ez bada jasotzen, araudiak behin betiko onarpena izango luke.

5.- Diktamena, eguneko zentroan buruz Gipuzkoako Foru Aldundiarekin lankidetza hitzarmena sinatzeko (2010GZ360001).

Alkateak Gizarte Zerbitzu Batzordeak aurkeztutako diktamena onartzea proposatu du. Zehaztu du diktamenarekin banatutako euskaraz idatzita dagoen hitzarmenaren bertsioa dela onartzera ekartzen dena, gaztelerazkoan azken itzulpenak egiteko daudelako oraindik. Alkateak esplikatu du beste herrietan egiten ari diren antzera eta eguneko zentroen eskumena Foru Aldundiena delako, Lezon eraikitzen ari den eguneko zentroaren gestioa Aldundiak bere gain hartzeko lankidetza protokoloa onartzea proposatzen dela. Protokolo hau onartu ondoren etorriko omen dira lokalaren lagapenak eta behar diren erabakiak.

Honela dio onartzea proposatzen den diktamenak:

12/2008 Legeak, abenduak 5koa, Gizarte Zerbitzuei buruzkoak, eguneko zentroaren eskumena Foru Aldundien gain uzten du. Horren arabera, Aldundien esku geratu da zerbitzua, bai ekipamenduari eta bai kudeaketari dagokionez.

Hori dela eta, Lezoko Udala eta Gipuzkoako Foru Aldundia Lankidetza protokoloa lantzen ari dira, Lezoko eguneko zentroaren kudeaketaren eskualdatze prozesua zehazteko.

Lezoko Udalak Gipuzkoako Foru Aldundiak proposatutako protokoloaren lehen zirriborroari aldaketa batzuk egin dizkio, zentroa irekitze epeei buruz, plazen kopuru eta izaerei buruz eta kudeaketaren jarraipenerako.

Ekarpen hauetako batzuk onartu ditu Aldundiak eta Lezoko Udalari bigarren zirriborro bat bidali dio.

Haritz Salaberrria, Jon Legorburu eta Pili Legorbururen botoa alde dela, Gizarte Zerbitzuetako Batzordeak behean heldu dena diktaminatu du osoko bilkurak onar dezan:

BAT: Lezoko Eguneko Zentroari buruz Gipuzkoako Foru Aldundiarekin Lezoko Udalak sinatu nahi duen lankidetza protokoloaren bigarren zirriborroa onartzea.

BI: Alkatea ahaltzea dokumentu hori edo bera gauzatzeko sinatu beharrekoak sinatzeko.

Kepa Garbizuk dio aspalditik datorren soka dela eguneko zentroarena Lezon. Aipatu ditu azken urtean eguneko zentroaren irekierari buruz egunkarietan argitaratutakoak. Bere irudikoz zerbitzua lehenagotik martxan jarri ez izanaren eskasia estali nahi da hitzarmen honekin eta beraiek ez daude ados. Protokolo testuari buruz dio eskasa dela, ez delako ziurtatzen zerbitzua ematen noiz hasiko den. Gogoratu du eguneko zentroaz gain, udala apartamentu babestuak ere egiten ari dela eta horientzat, nahiz eta udalaren konpetentzia izan, ez dagoela aurtengo aurrekontuetan inongo aurreikuspenik.

Mikel Antxon Arrizabalagak abstenitu egingo dela dio, testua ez zaiolako nahikoa iruditzen.

Alkateak dio udalak jo duela Aldundiarengana zerbitzuaren arduraz galdetzera. Aldundiak ardurak onartuz hitzarmen proposamena egin zuen eta batzordean arestian azaldutako ekarpenak egin zaizkiola esan du, horietako batzuk onartu direlarik.   

Diktamena onartu egin da aldeko sei boto, aurkako hiru (Kepa Garbizu, Enrique Figueroa eta Jesus Mari Martiarena) eta abstentzio batekin (Mikel Antxon Arrizabalaga).

6.- Diktamena, Oiartzungo udalarekin hitzarmena egitea onartzeko udaltzaingoko gaueko txanda zerbitzua emateko (2010PE290001).

Alkateak Barne Batzordearen diktamena aurkeztu du. Proposatu du batzordeak onartutako diktamenari zuzenketa batzuk egitea: udal plantillaren aldaketari eta haren onarpen prozedurarako proposatzen diren erabakiak (diktameneko bata eta hirua)  ez hartzea, udal plantilla organikoan aldaketarik beharrezkoa ez delako.

Alkateak dio horrelako erabakiak hartzera behartzen dutenak arrazoi ekonomikoak direla, udalaren diru sarrerak nabarmen jaitsi direlako eta, ondorioz, gastua ere murriztu egin behar delako. Aurreko urtetako gastu aurrekontuaren IV. eta II. Kapituluetan aurrezteko ekimen eta erabaki ugari hartu dituztela dio alkateak. Horrela, azpikontratatutako zerbitzuak errepasatu eta jaitsi direla dio. Baita ere, kale garbitzaile eta zabor biltzaileen zerbitzu eta kontratua %20a murriztu da, eta kopuru berdinean eskola garraioa, udal eraikinen garbiketa, e.a. Dirulaguntzen banaketan ere antzerako irizpidea erabili dela dio. Eta neurri horiek guztiak nahiko ez direlako aurten, 2010. urtean, udaleko pertsonal gastuei, aurrekontuen I. kapituluari, erreparatu behar izan omen diote. Horregatik udal langile guztien lan ordu kopurua igo egin dute,  32 orduko lan astetik 35 orduko lan astera pasatzera erabakiz abenduaren 3an egindako osoko bilkuran.

Beste neurri batzuk ere aztertzen ari direla dio. Eta neurri horien artean sortu omen da aukera gaueko patruila beste udal batekin (Oiartzungoarekin) bateratzeko. Alkateak ulertzen du neurri horrekin zerbitzu kalitatea jaitsi egiten dela, baina ezer baino hobea dela dio: lehen bi udaltzain aritzen ziren Lezon gauero eta orain bakarra arituko da Oiartzungo beste batekin bi herrietan. Zerbitzuaren antolaketa bi udaltzainburuak prestatua dutela dio. Herrizaingo Sailari baimena eskatu omen zaio eta haren idatzizko baimena oraindik iritsi ez bada ere, lankidetza hitzarmena egoki ikusten dutela esan digute hitzez eta aurrera jarraitzeko bidea eman diela dio alkateak.  Argitu du hitzarmen bukaeran aipatzen den zerbitzu aldiaren figura ez dela beharrezkoa eta, hasieran esan bezala, ezta ere lanpostuen zerrendaren aldaketa, horregatik proposatu dizkio aldaketak diktamenari.

Alkateak dio hitzarmena onartzen bada, ondoren hari egokitutako lan egutegiak onartuko direla eta hitzarmena indarrean sartuko dela.

Jendartean, besteak beste,  Oiartzun eta Lezoko udaltzain batzuk daude eta haietako batek, Lezoko udaltzaina eta enpresa batzordeko lehendakari denak, hitza eskatu eta gaiari buruzko bere iritzia eman du.  Irakurri asmo duen idatzia banatu die alkate eta zinegotzi guztiei. Bihar udal erregistroan aurkeztuko duela eta orduan espedienteari gehituko zaio. Guztiz aurka azaldu da proposatutakoarekin, aurrekaririk gabeko irregulartasun guztiak dituen prozedura negargarria dela dio. Legala ez den prozesu honekin ez segitzeko eskatu die bilkurako kideei, Lezoko udaltzainak Lezon eta ez beste inon lanean jarraitu nahi dutelako. Erabaki honek langileen adostasunik gabe ez duela etorkizunik dio eta berriro horiek lortzen hasteko eskatu dio gobernu taldeari.

Kepa Garbizuk dio garbi dagoela krisi ekonomikoaren eragina udal diru sarreretan, baina ez dago ados hiritarren segurtasunean gastua murrizteko erabakiarekin. Gobernu taldeak bakarrik hartutako erabakia da, udal aurrekontua oposizioko taldeekin negoziatu gabe onartu izan zen moduan. Horregatik ez  omen du proposamen hau orain babestuko.

Mikel Antxon Arrizabalagak dio proposamenaren aurka bozkatuko duela, udaltzaingoaren eledunak emandako arrazoi gehienekin ados dagoelako.  

Alkateak erantzun ditu jendartetik egindako kritikak: gobernu taldea enpresa komiteari udalaren egoera ekonomikoaren larritasuna azaltzen saiatu dela adierazi du eta horien inguruko proposamenak eskatu ere, egin omen dizkio. Hitzarmenari legalitateari buruzko oharpenik ez zaiola egin esan du eta Eusko Jaurlaritzako Barne Sailak hori bermatu egin duela esan du alkateak. Dena den, udaltzainen idatzian azaldutako zalantzak argitzen saiatuko dela dio.

Proposamenaren inguruko eztabaida luzea izan da jendartean dauden udaltzain, enpresa komiteko ordezkari eta alkatearen artean. Idatzian eta eztabaidan zehar udal idazkariari egindako aipamenak medio, honek hitza eskatu eta esan du proposatzen dena bi udal erakundeen arteko lankidetza hitzarmen bat dela eta ez mankomunitate baten sorrera. Baita ere dio, bere ustetan proposatutakoa lege barruan dagoela, zerbitzu aldiak ez direla beharrezko. Bestalde, hitzarmenak Eusko Jaurlaritzaren Barne Sailaren baimena behar duela, eta hura eta bere baldintzak bete beharko direla ere aipatu du.

Eztabaida luzea izan ondoren alkateak diktamena berak proposatutako aldaketekin bozkatzea proposatu du.

Aldeko sei botokin eta aurkakoko laurekin (Kepa Garbizu, Enrique Figueroa, Jesus Mari Martiarena eta Mikel Antxon Arrizabalaga) osoko bilkurak erabaki hauek hartu ditu:

BAT: Lezoko Udaltzaingoaren gaueko txanda zerbitzua Oiartzungo udaleko udaltzaingoarekin batera emateko Oiartzun eta Lezoko udalen arteko lankidetza hitzarmena onartzea.

BI: Alkatea ahalmentzea lankidetza hitzarmena gauzatzeko beharrezko diren erabakiak eta dokumentuak sinatzeko.

HIRU: Erabaki horiek interesatuei jakinaraztea: Lezoko udaltzainburu eta udaltzainei, Oiartzungo udalari eta Eusko Jaurlaritzaren Barne Sailari.   

7.- Kutxako batzar orokorrerako ordezkariak izendatzeko diktamena (2010ID100001).

Alkateak diktamena onartzea proposatu du. Honela dio diktamenak:

Gipuzkoa Donostia Kutxaren Gobernu-Organoak izendatzeko Arautegiaren 20. artikuluaz baliatuz,  Udal honek 2008ko urtarrilaren 30ean egindako batzarraldian Oiartzun, Usurbil eta Bergarako Udalekin batera agrupazioa osatzea erabaki zuen. Elkarte honi dagokion Kontseilari Orokorra 2010eko apirilean izendatu behar denez, Udalbatzari agrupazio horren izenean arituko den pertsona izendatzeko proposamena aurkezten dut, hain zuzen, Iñaki Queralt Coira izendatzea.

Bestalde, Kutxako estatutuen 20. eta 31. artikuluen arabera eta Kutxaren Gobernu-Organoak izendatzeko prozedurazko Arautegiaren 31. artikuluen arabera kontseilari erdien berriztapena egin behar da eta Lezoko Udalari dagokio kontseilari bat eta haren ordezkoa izendatzea. Eginkizun honetarako Aitor Sarasola Salaberria izendatzea proposatzen dut.

Ogasun eta Kontuetako batzordeak, 2010eko urtarrilaren 28an  egindako bilkuran, Haritz Salaberria, Jon Legorburu eta Iñigo Esnaola zinegotzien aldeko boto ponderatuekin eta Kepa Garbizu  zinegotziaren abstentzioarekin, ondorengo akordioa diktaminatu du osoko bilkurak onar dezan:

BAT: Gipuzkoako eta Donostia Kutxako Kontseilari Orokorra, Oiartzun, Lezo, Usurbil eta Bergarako Udalek osatzen duten agrupazioaren izenean, Iñaki Queralt Coira (N.A. 15.983.050M) izendatzea eta horrela jakinaraztea Kutxari.

BI: Lezoko udalaren izenean Aitor Sarasola Salaberria (N.A. 72.441.395C) izendatzea eta ordezko gisa Haritz Salaberria Goikoetxea (N.A. 72.463.474 L).

Diktamena onartu egin da aldeko sei botokin eta aurkako laurekin (Kepa Garbizu, Enrique Figueroa, Jesus Mari Martiarena eta Mikel Antxon Arrizabalaga).

8.- Mozioa, Greenpeace-ren kideen aurkako jokabidea dela eta (2009AL050009).

Alkateak esan du Ezker Batua taldeak erregistratutako mozioa dela orain bozketara jarriko dena. Mozioak honela dio:

Greenpeaceko kideen aurkako jarduketak artxibatzea eskatzen dugu:

Gipuzkoako Fiskaltzak bederatzi hilabeteko kartzela zigorra eskatu du 2007ko martxoaren 27an Iberdrola enpresak Pasaian (Gipuzkoa) duen zentral termikoaren tximiniraino igo eta instalazioa ixteko eskatuz pankarta batzuk erakutsi zituzten hamar ekintzailerentzat.

Eskaeraren oinarri diren ekintzak duela bi urte baino gehiago izan ziren, 2007ko martxoaren 27an. Greenpeaceko ekintzaileek Pasaiako ikatzezko zentral termikoaren tximiniatik zintzilik jarri eta "STOP CO2" idatzi zuten. Protesta ekintza honekin, urtean Gipuzkoako ibilgailu guztiek baino CO2 gehiago isurtzen duen zentral hau ixteko eskatu zioten konpainia jabeari, Iberdrolari.

Eusko Jaurlaritzako Ingurumen sailburuak, 2006an, zentral hau ixteko asmoa agertu zuen, Greenpeacek ikatzezko zentral termikoen (Pasaiakoa barne) aurkako jarduerak egiten zituen bitartean. Bi urte geroago, behin eta berriz Iberdrolari zentrala ixteko eskatu ondoren eta Espainiako Gobernuari doako emisio eskubideak ez emateko eskatu ondoren, eskaera horiek kontuan hartzen ez zirenez, erakunde ekologistak protesta hau egin zuen. Une horretatik aurrera, Gipuzkoako Batzar Nagusiek aho batez eskatu zuten zentralaren itxiera.

Horregatik guztiagatik, Lezoko Udalbatzak:

Akusazio idazkia berraztertzeko eta jarduketak artxibatzeko eskatzen dio Ministerio Publikoari.

Mozioa aho-batez onartu da.

9.- Alkatearen, organo kolegiatuetako udal-ordezkarien eta delegatuen txostenak.

Alkateak udal aurrekontuan kreditu aldaketak egiteko burututako hiru espedienteen berri eman du 2010KO090001, 2010KO090002 eta 2010KO090003 espedienteen berri eman du.

Zinegotzi delegatuak beraien arloko gaien berri eman dute.

10.- Galde-eskeak.

Alkateak dio, Kepa Garbizuk idatziz erregistratu dituen galderen inguruan eta aurrez egindako eta erantzun gabe dauden galderen inguruan, askoren erantzuna udal sarrera eta irteera bertatik jaso dezakeela erantzuna, galdera asko dirulaguntza eskaerak egin diren galdetzen dutelako.

Kepa Garbizuk dio eskubidea duela plenoari galderak egiteko eta lotsagarria dela gobernu taldeak erantzun gabe dituen galdera mordoa.

Aktaren amaiera.

Beste aztergairik geratzen ez denez, alkate-lehendakariak 21:00etan eman dio buru bilkurari. Eta nik, idazkari naizen aldetik, akta 828.413.etik 828.420.ra arteko zenbakiak dituzten orri ofizialetan jaso eta horren guztiaren fede ematen dut,  eta bilkuran izan diren zinegotzi guztiek izenpetu egin dute akta hau.

link 2009.eko Abenduaren 23ekoa
Data:2009-12-23
Agiri mota: Osoko Bilkuraren akta
Lasterbideak:
Mamia: 

Lezoko Udaletxeko Biltzar Areto Nagusian, 2009ko abenduaren 23an, asteazkena, 19:35etan, eratu da OSOKO UDALBATZA, EZOHIKOA egiteko xedez, lehen deialdian, Haritz Salaberria Goikoetxea alkatearen lehendakaritzapean eta ondorengo zinegotzi hauek bertan direla: Irati Aranburu Salaberria, Jon Legorburu Arrastua, Iñigo Esnaola Arbiza, María Pilar Legorburu Echegaray, Urko Lopetegi Campano, Jaione Lekuona Irazusta, Kepa Garbizu Azkue, Enrique Figueroa Laboa, Jesús María Martiarena Jaca eta Miguel Antonio Arrizabalaga Brusín.

Ez da bilerara etorri Roberto Sánchez Sánchez.

Bertan da eta egintzaren fede eman du udal idazkaria den Xabier Loiolak.

1.- Lezoko Hirigintza Plan Orokorrari hasierako onarpena emateko diktamena (2007H0310001).

 

Jon Legorburu zinegotziak gaia azaldu du. Hirigintza Batzordean azaldutakoa gogoratu du: bat, plan honek herrian beste 700 etxebizitza egitea aurreikusten du, tokiak eta kopuruak zehaztuz. Bi, Xoxolurrako eremua parke publikoko erabilerarako proposatzen da; Hiru, Arraitoki ingurua, kiroldegi aurrekoa, ekipamendurako uzten da herriko sarrera txukuntzeko intentzioarekin. Lau, industri guneak finkatu egiten dira. Bukatzeko, gaurtik aurrera planak izango duen tramitazioa aipatu du. Baita ere, eskertu du dokumentuaren egilea den Raimundo Mendiburu arkitektoa gaurko bilkura honetan egotea.

Besterik gabe, hirigintza batzordearen diktamena onartzea eskatu du. Honela dio diktamenak:

 

"Lezoko Udalak 2007ko abenduaren 5an buruturiko Osoko  Bilkura, Udalerriko Hirigintza Plan Orokorra formulatzea eta idaztea erabaki zuen.

Halaber, Babes zibil, ingurugiro, kultur ondare eta natur ingurunean eskumenak dituzten Eusko Jaurlaritzaren eta Foru Aldundiaren organoei bere ordenamenduarengatik errespetatuak izan behar duten ingurugiro, kultur ondare eta natur ingurunearen baldintzatzaileen eta egon litezkeen arriskuen berri eskatu. Behar bezalako justifikazio tekniko eta juridikoekin bi hilabete gaindituko ez dituen epearen barruan mango da.

Azkenik, Osoko bilkura honetan  espedientean dagoen Hiritarren Parte Hartze Programa onartzea erabaki zen.

2008ko uztailaren 17ko 08/659 Alkatetza Dekretuaren bitartez Lezoko udalak Planeamenduko Arau Subsidiarioen Berrikuspenaren Aurrerakin dokumentua tramitera onartzea eta jendaurrean 3 hilabetez jartzea erabaki zuen, adierazitako epean, elkarteak, norbanakoek eta korporazioek iradokizunak, planeamendu alternatiba desberdinak aurkeztu zitzaten. 2008ko urriaren 24an amaitzen zen epe hau, urte bereko azaroaren 24 arte luzatu zen 2008ko azaroaren 21ko 08/862 Alkatetza Dekretuaren bitartez.

Dagozkion argitarapenak egin ondoren (Berria 2008-08-05, Diario Vasco 2008-08-19, Gara 2008-08-06, Nocicias de Gipuzkoa 2008-08-06 eta Gipuzkoako Aldizkari Ofiziala 2008-07-23), epe horren barruan hogeita bederatzi iradokizunak aurkeztu ziren.

Aurrerakin dokumentuaren kopia mugakide diren udalerriei eta arlokako eskumenak dituzten administrazio publikoei ere igorri zaie.

Lezoko Udalak 2009ko ekainaren 10eko Osoko Bilkuran Aurrerakin dokumenturi aurkezturiko iradokizunak erantzutea, Ordenazio Ereduaren Helburu Orokorrak eta Oinarrizko Irizpideak onartzea eta erabaki horien berri ematea alegazioen titularrei eta Lezoko Arau Subsidiarioen Berrikuspena idatzi duen taldeari, Hirigintzako Plan Orokorraren hasierako onarpenerako dokumentua idazten hasteko.

2009ko irailaren 16an Lezoko Udalean sarrera ematen zaio Hirigintza Plan Orokorraren ingurumenaren eraginaren aurretiazko txostenari.

2009ko azaroaren 30ean Lezoko Udalean Sarrera ematen zaio Hirigintza Plan Orokorraren haserako onarpenerako dokumentuari.

2009ko abenduaren 3an Lezoko Udalean Sarrera ematen zaio Hirigintza Plan Orokorraren haserako onarpenerako dokumentuaren Ingurumen eraginaren azterketa bateratuari.

2/2006 Lurzoru eta Hirigintza Legearen 90 artikuluak xedatzen duena eta aipatu lege hori garatzen duen 105/2008 Premiazko Neurrien Dekretuaren 32 artikuluak xedatzen duena kontuan izanik, Hirigintza, Obra eta Zerbitzuetako batzordeak 2009ko abenduaren 17an  egindako batzarraldian Haritz Salaberria, Jon Legorburu eta  Iñigo Esnaolaren aldeko botoarekin eta Kepa Garbizuren abstentzioarekin,

DIKTAMINATZEN DU:

BAT: Lezoko Udalerriko Hirigintza Plan Orokorrari haserako onarpena ematea

BI: Hirigintza Plan Orokorraren dokumentua jendaurrean jartzea, Gipuzkoako aldizkari ofizialean eta lurraldean hedadura gehien duen egunkarian edo egunkarietan argitaratuz. Plana 45 egunez egongo da jendaurrean, azken argitalpenetik kontatzen hasita

HIRU: Akordio hau arloka eskumenak dituzten administrazio publikoei jakinaraztea bere ezagutzarako eta txostenak egin ahal izateko.

LAU: Edozein eratako onarpenak, baimenak eta lizentziak emateko aukera etetea, gehienez bi urteko apean, haserako onarpena jaso duen Hirigintza Plan Orokorraren ondorengo eremuetan:

AOU 13 Marrukene, AOU Algeposa 1 AOU 5 xoxolurra, AOU 36 Gaintxurizketa, AOU17  Maintzine AOU18  Maintzine Mendebaldea eta Lur ez urbanizagarri guztian."

 

Kepa Garbizuk dio udalak plan orokorra idazteko duen kontratua hausten ari dela: alde batetik, han aipatzen den diagnostikoa egin ez delako eta, bestetik, han aipatzen diren epeak modu nabarmenean gainditu direlako. Horregatik eskatu du akats horiek zuzentzea eta kontratu baldintzetan aurreikusitako atzerapenagatik jarri beharreko isunak jartzea.

Edukiari buruz dio Algeposa ingururako planean aurreikusitakoa guztiz kontra datorrela eremu horretarako onartu berri diren hitzarmen urbanistiko eta plan bereziekin. Era berean, ez zaio iruditzen portuko iharduerak sortzen dituen trafiko arazoentzat Lanbarrengo sarrera denik irtenbidea, arazoak beste irtenbide bat beharko omen du eta ez proposatutakoa. Arraitoki eremurako proposatutakoak ere harritzen du, portuaren lurrak izanik etxebizitzak ezin direla egin esaten delako eta gero institutua bertan jartzea proposatzen delako.

Mikel Antxon Arrizabalagak dio bera kritikoa dela dokumentuarekin, ez zaio iruditzen bideragarriak direnik han proposatutakoak. Bestalde, iruditzen zaio industria jarduerarako lur berri gutxi proposatzen dela. Ondorioz, gaur abstenitu egingo omen da eta behin behineko onarpena proposatzen denerako zehaztuko dela bere behin betiko jarrera.

Alkateak dokumentuan proposatutakoak defenditu ditu: Algeposarentzat onartu berri diren dokumentuak eta plan orokor hau bateragarriak direla mantendu du. Arraitokiri buruz dio, dokumentuak udal gobernuak nahi duena jasotzen duela. Ez zaio iruditzen epeetan izan den atzerapena dokumentuaren idazlearen erantzukizuna denik. Atzerapenaren arrazoi nagusia partehartze prozesuak indartzeko gobernu taldeak hartutako erabakiak izan dira.

Eztabaida  izan ondoren alkateak bozketa proposatu du eta diktamena onartu egin da gehiengoaren aldeko botoarekin: alde zazpi boto izan dira, abstentzio bat (Mikel Antxon  Arrizabalaga) eta ezezko hiru boto (Kepa Garbizu, Enrique Figueroa eta Jesus Mari Martiarena).

Alkateak zehaztu du onarpena txosten juridikoan jasotzen diren zehaztasunak eta argibideak ematearen baldintzapean egin dela.  

 

Aktaren amaiera.

Beste aztergairik geratzen ez denez, alkate-lehendakariak 21:00etan eman dio buru bilkurari. Eta nik, idazkari naizen aldetik, akta 828.399.etik 828.401.ra arteko zenbakiak dituzten orri ofizialetan jaso eta horren guztiaren fede ematen dut,  eta bilkuran izan diren zinegotzi guztiek izenpetu egin dute akta hau.

link 2009.eko Abenduaren 2ekoa
Data:2009-12-02
Agiri mota: Osoko Bilkuraren akta
Lasterbideak:
Mamia: 

Lezoko Udaletxeko Biltzar Areto Nagusian, 2009ko abenduaren 2an, asteazkena, 19:35etan, eratu da OSOKO UDALBATZA, OHIKOA egiteko xedez, lehen deialdian, Haritz Salaberria Goikoetxea alkatearen lehendakaritzapean eta ondorengo zinegotzi hauek bertan direla: Jon Legorburu Arrastua, Iñigo Esnaola Arbiza, María Pilar Legorburu Echegaray, Urko Lopetegi Campano, Jaione Lekuona Irazusta, Kepa Garbizu Azkue, Enrique Figueroa Laboa, Miguel Antonio Arrizabalaga Brusín eta Roberto Sánchez Sánchez.

Ez dira bilerara etorri Irati Aranburu Salaberria eta Jesús Mari Martiarena Jaca zinegotziak.

Bertan da eta egintzaren fede eman du udal idazkaria den Xabier Loiolak.

Bilera hasi eta alkateak gaien eztabaida ordena aldatzea proposatu du: jendartean gaurko bilerako 11. gaiarekin interesa duten adineko pertsonak daudenez, eta gai horretara iritsi aurretik daudenak tratatzeak luze joko duenez, 11. gai hori lehendabizi tratatzea proposatu die gainontzeko zinegotziei. Inolako eragozpenik ez dute jarri eta ondorioz 11. gaia eztabaidatuko da lehendabizi eta ondoren gai zerrendaren ordena jarraituko da.

11.- Mozioa, Lezoko ohorezko alkate izendapena kentzea Francisco Francori (2009AL050005).

Mozioa Agustina Pontesta herritarrak aurkeztu du udal erregistroan eta aretoan dagoenez, alkateak hari eman dio hitza. Hark mozioaren nondik norakoak azaldu ditu. Mozioak honela dio:

"Frankismoak zigortu eta eraildakoen omenez

 

Memoria historikoa errekuperatu nahian gabiltzanok ongi dakigu (batzuek besteek baino hobeto) gerra garaian eta ondoren ere bai, benetako genozidioa eragin zuela Frankismoak. Giza eskubide guztiak urratu ziren zigorraz eta heriotzaz baliatuz, eta aise esaten bada ere,  ehunka milaka lagun izan ziren desagerraraziak. Lezoko herria ez zen horretan ere salbuespen izan, eta gaur gure artean ditugu oraindik zigortu batzuk eta zigortutako batzuen familiartekoak, egitate horien lekuko.

Eta harrezkero, tristeziaz beteriko urte mordoa pasa bada ere, zigortutakoen familia berauek ari dira kasu askotan beren senitartekoak aurkitzeko lanetan, ardura hori desagerrarazi zituen Estatuarena litzatekeenean. Estatuak beharko lukeelako giza eskubideak errespetatzen lehena, eta eragindako kalteak konpontzen saiatzen lehena.

Bestalde, arestian aipatu dugun bezala genozidioaren burua Francisco Franco izan zen, eta gizatxar honen jarraitzaileak herri guztietan  zeuden, gurean ere bai, jakina.  Hori ongi ikus daiteke orduko Udala osatzen zutenek 1949ko abuztuaren 22an hartu zuten erabakian.  Francori "esker ona" adierazteko  "ohorezko alkate" izendatzea erabaki hartu baitzuten. Kontrakorik erabaki ezean, indarrean segitzen duen erabakia, hain zuzen ere.

Ez dugu uste agintari eredugarritzat har  litekeenik hainbeste sufrimendu eragin duen inor, aitzitik, iraingarri eta iseka egingarri irizten diogu.

Horretxegatik, sufrimenduaren jasale izan ziren herritarrentzat ez ezik, beraien familiartekoei zor diegun begirunea aldarrikatu nahi dugu eta egoera haren eragile, sustatzaile eta borrero guztiak mereziko luketen zigorraz ezin den arren, guttienez, gure esku dagoen neurrian, behean sinatu dugunok zera eskatu nahi diogu  Udalbatza honi:

1949ko abuztuaren 22ko erabakia bertan behera uztea. Francisco Franco Bahamonde jeneral faxistari Lezoko Ohorezko Alkate izendapena kentzea, alegia".

Uste baitugu horrelako ekintzen bitartez berreskura ditzakegula, hein batean bederen, Frankismoak kendu zizkigun egiazko balore demokratikoak.  Faxismoari aurre eginez.  Eta, orain arte, bizia eman zuten haien alde edo haiekiko begirunez deus egiterik izan ez badugu ere, guttienez berauen familiak defenda ditzagun, dagozkien  eskubideak errespetatuak izan daitezen.

Fabian Iparragirre Manzisidor

Rosa García Lizarraga,

Jose Mª García Ruiz

Insausti Ormaburu familia

Eustakio Areitioren familia

Labordeta-Bergara familia

Agustina Pontesta Garmendia

Ander Leon Nanclares

Joxe Luix Agirretxe Mitxelena

1949ko abuztuaren 22an Lezoko Udal frankistak harturiko erabakia:

"SESION EXTRAORDINARIA DEL DIA 22 DE AGOSTO DE 1.949

 

Señores Asistentes

 

Don Nicolás Larrea

  "   Enrique Iparraguirre

  "   Prudencio Oyarzabal

  "   José Irazu

  "   Francisco Salaverria

  "   Tiburcio Ascasibar

  "   Gervasio Isasa

En el Salón de sesiones del Ayuntamiento de la Universidad de Lezo; siendo las trece horas del día ventidós de Agosto de mil novecientos cuarenta y nueve; previa y reglamentariamente convocados; reuniéronse los Señores Concejales cuyos nombres y apellidos se consignan al margen, bajo la Presidencia del Sr. Alcalde Don Luis Aranjuelo Basterrechea con asistencia del Secretario de la Corporación Municipal Sr. Gregorio Merino Rico.

Abierto el acto por el Sr. Alcalde; se dio cuenta y lectura de un telegrama recibido el día diez y ocho de los corrientes y procedente éste del Excmo. Sr. Gobernador Civil de esta provincia manifestando haber demostrado el deseo su Excelencia el Jefe del Estado recibir en visita y en audiencia a todos los Señores Alcaldes de esta Provincia.

La Presidencia como deferencia y honor al invicto Caudillo, que tan amablemente ha tenido la delicadeza de recibir en audiencia a mentadas Autoridades y creyendo con esto un honor de justicia a quien se ha hecho acreedor a tales alabanzas por sus relevantes méritos, cualidades, prestigio y honradez inviolables en los designios en que la Providencia le puso al servicio de la Patria, Salvador por lo tanto de nuestra Santa Cruzada; propone a sus compañeros de Corporación el nombramiento de alcalde-honorario de este Municipio en favor de su Excelencia el Jefe del Estado.

Todos los Señores asistentes ven con agrado tan acertada iniciativa y por unanimidad acuerdan: Confirmar las manifestaciones hechas por la Presidencia.

No teniendo más asuntos de que tratar, el Sr. Alcalde Presidente declaró cerrado el acto a las catorce horas del mismo día, mes y año; del que mandó extender la presente acta; que leído por mí el Secretario, la encontraron conformes y en prueba de ser cierto y bien compenetrados del contenido de la misma; firman la mencionada Acta en sesión del Sr. Alcalde de todo lo cual yo el Secretario propietario, Certifico

(Siguen firmas rubricadas)"

Jendartetik emakume batek esan du nola bere aita fusilatu zuten errepublikarra izateagatik eta nola ondoren ere, bere familia ez zuten bakean utzi. Esan du harritu egiten dela erabaki hau oraindik indarrean egotearekin.

Jendartetik beste emakume batek eskatu du herrian oraindik egon daitezkeen ikur frankistak kentzeko eta gogoratu du kendu berriak direla San Pedro auzoko etxeetan zeudenak.

Mozioa bozkatu eta aho batez onartu da. Ondorioz, 1949ko abuztuaren 22ko erabakia bertan behera utzi da, hau da, Francisco Franco Bahamonde jeneral faxistari Lezoko Ohorezko Alkate izendapena kendu egin zaio.

1.- Egoki irudituz gero, 2009ko ekainaren 19ko, uztailaren 30eko, urriaren 7ko eta urriaren 28ko  bileren aktak onartzea.

Lau aktak aho-batez onartu dira inolako zuzenketarik gabe.

2.- Alkatearen D09/00751  eta D09/00671  dekretuak berresteko proposamena (2009H0450011) eta 2009H0450009).

Alkateak dio D09/00751 dekretuaren bidez 2009ko abuztuaren 6ko Gipuzkoako Aldizkari Ofizialean argitaratu zen Gipuzkoako Foru Aldundiko Diputatuen Kontseiluko uztailaren 21eko 24/2009 Foru Dekretuari auzia jarri zaiola. Dekretu horren bidez, behin betiko onartu da Gipuzkoako Hiri Hondakinetarako Azpiegituren Lurralde Plan Sektoriala. Alkateak gogoratu du 2008ko uztailaren 15eko osoko bilkuran Hondakinen Kudeaketarako Dokumentuari alegazioak egitea onartu zela, eta orduan hartutako arrazoiengatik errekurritu dela Plan Sektoriala ere.

Kepa Garbizuk dio nahiago duela horrelako erabakiak aurrez beraiekin kontsultatzen badira. 

Bozkatu eta dekretua berretsi egin da: alde zazpi boto izan dira eta hiru aurka (Kepa Garbizu, Enrique Figueroa eta Mikel Antxon Arrizabalaga). Ondorioz, erabaki hauek hartu dira:

BAT: Errekurtsoa jartzea uztailaren 21eko 24/2009 Foru Dekretuari, Gipuzkoako Foru Aldundiko Diputatuen Kontseiluak egun horretako bilkuran onartutakoari; dekretu horren bidez, behin betiko onartu da Gipuzkoako Hiri Hondakinetarako Azpiegituren Lurralde Plan Sektoriala. (GAO, 146 zk., 2009-08-06koa).

BI: Udal honen interesak defendatzeko eskatzea Germán Ors Simon prokuradoreari eta Yolanda López de Luzuriaga Beltrán de Heredia abokatuari.

HIRU: Auzietarako ahalmen orokor eta berezia ematea honako prokuradore eta abokatu hauei:

  • Donostiatik: Ainhoa Kintana Martínez eta Saioa Etxabe Azkue.
  • Bilbotik: Germán Ors Simón eta Isabel Apalategui Arrese.
  • Madrildik: Jose Luis Martin Jaureguibeitia eta Ana Isabel Lobera Argüelles.

Berrestera aurkeztu den bigarren dekretuaren inguruan, D09/00671 zenbakikoa, alkateak bere edukia azaldu du: haren bidez Pasaiako Portu Agintaritzak birformulaturiko Portuko Plan Bereziari Gipuzkoako Foru Aldundiko Diputatu Kontseiluak ekainaren 23an haserako onarpena ematen dion akordioaren aurka auzia tarteratzea erabaki du.   Gogoratu du alkateak aurrez, osoko bilkura behin baino gehiagoetan erabaki duela Portuko Plan Berezien inguruan, adibidez 2008ko apirilaren 9an.

Kepa Garbizuk aurreko bozketan esandako bera errepikatu du, hau da, nahiago duela horrelako erabakiak aurrez beraiekin kontsultatzen badira. 

Bozketa egin eta dekretua berretsi da aldeko zazpi botoekin eta ezezko hiru botoekin (Kepa Garbizu, Enrique Figueroa eta Mikel Antxon Arrizabalaga). Hauek dira berretsitako erabakiak:

BAT: Administrazioarekiko auzi-errekurtsoa jartzea Gipuzkoako Foru Aldundiko Diputatu Kontseiluak ekainaren 23an  hartutako akordioaren aurka, zeinaren bidez  Pasaiako Portu Agintaritzak birformulaturiko Portuko Plan Bereziari haserako onarpena ematen zaion.

 

BI: Udalaren defentsa udaleko zerbitzu juridikoetako letratu den Aitor Iztueta Garaikoetxearen kargu uztea; eta prozesuko ordezkaritza Yolanda Kortajarena Martínez, auzitegiko prokuradorearen kargu.

3.- 2009ko udal aurrekontuaren aldaketa diktamena. Transferentzia 030008 (2009KO020005).

Alkateak Ogasun Batzordearen diktamena onartzea proposatu du. Honela dio diktamenak:

"Kreditu Aldaketaren espedientea egiten ari denez, 2009ko aurrekontuko gastuen partiden arteko kreditu transferentziaz, 2009ko azaroaren 26ko  D09/00849 dekretuaren bidez hasia, Ogasun eta Kontuetako Batzordeak, 2009ko azaroaren 26an egindako bilkuran,  Haritz Salaberria, Jon Legorburu eta Iñigo Esnaola   zinegotzien aldeko boto ponderatuekin behean heldu den proposamena diktaminatu du osoko bilkurak onar dezan:

BAT: Kreditu Aldaketarako espedientea onartzea, gastuen aurrekontu partida batzuen artean kreditu-transferentziarengatik identifikazio zk. 30008/2009, 2009-11-26koa eta zenbatekoa 60.000€."

Bozkatu eta onartu egin da diktamena: alde sei boto izan dira eta lau abstentzio (Kepa Garbizu, Enrique Figueroa, Mikel Antxon Arrizabalaga eta Roberto Sánchez).

4.- Lezoko udal langileen lanaldia onartzeko diktamena (2009PE290002).

Barne Batzordean onartutako diktamena azaldu du Jon Legorburuk. Honela dio diktamenak:

"Udalbatzak, 1999ko otsailaren 24an egindako bilkuran,  32 orduko asteko lanaldia ezartzea eta Lezoko udal langile guztiei aplikatzea erabaki zuen. 

Ondoren, Gobernu Batzordeak, 1999ko martxoaren 10ean egindako bilkuran, udal langileen barne araudia onartu zuen, 32 orduko asteko lanaldiaren ondorioz sortutako hainbat alderdi garatzeko.

Gobernu taldearen ustez, 32 orduko asteko lanaldiak eragina du Udalak herritarrei ematen dien zerbitzuan, eta askotan, garestitu ere egiten du zerbitzu hori. Hori dela-eta, Gobernu taldeak komenigarritzat jotzen du, Euskadiko tokiko administrazio gehienetan egin duten bezala, 35 orduko asteko lanaldia ezartzea Lezoko Udalean.

Haritz Salaberria Goikoetxea, Iñigo Esnaola Arbiza eta Jon Legorburu Arrastuaren botoa alde dela, eta Jesús Mª Martiarena Jacaren abstentzioarekin, Barne gaietarako Batzordeak behean heldu dena diktaminatu du osoko bilkurak onar dezan:

BAT: Egun udal honetan indarrean dagoen 32 orduko asteko lanaldia ondoriorik gabe uztea.

BI:  35 orduko asteko lanaldia onartzea eta Lezoko Udal langile guztiei aplikatzea, 2010eko urtarrilaren 1etik aurrera.

HIRU: Erabakiaren aurkako errekurtsoak:

a) Auzitara jo aurretik, eskatzaileak, hala nahi izanez gero, erabakia berraztertzeko errekurtsoa aurkez dezake 30/1992 Legearen arabera.

  • Horretarako, hilabeteko epea dauka, erabaki honen jakinarazpena jaso eta biharamunetik hasita.
  • Errekurtsoa aurkeztekotan Osoko Bilkurara jo behar da.

b) Bestela, administrazioarekiko auzi-errekurtsoa aurkez dezake zuzen-zuzenean.

  • Horretarako, bi hilabeteko epea dauka, erabaki honen jakinarazpena jaso eta biharamunetik hasita.
  • Errekurtsoa aurkeztekotan, EAEko Auzitegi Nagusiko administrazioarekiko auzitarako Donostiako epaitegira jo behar da."

Jon Legorburuk dio gaur egungo egoera ekonomikoak eta inguruan gertatzen ari denak bultzatu dituela proposamena egitera. Dio udal langileen ordezkaritzak ez diola inongo arazorik jarri proposamenari.

Barne Batzordeko diktamena aho batez onartu da.

5.- 2010 urteko plantila organikoa eta lan postuen zerrenda hasieraz onartzeko diktamena (2009PE290001).

Jon Legorburuk azaldu du Barne Batzordeak onartutako diktamena. Iazkoarekin alderatuz bi aldaketa daudela dio, bi udaltzain gutxiagoko plantila eta etxez etxeko zerbitzuaren koordinatzaile plaza berria gehitzea. Horiek azalduta diktamena onartzeko eskatu dio osoko bilkura kideei. Honela dio diktamenak:   

"Indarrean dagoen legerian oinarrituta, tokiko korporazioari dagokio urtero onartzea aurrekontuaren bidez, udal plantila organikoa eta  lanpostuen zerrenda.

Haritz Salaberria Goikoetxea, Iñigo Esnaola Arbiza eta Jon Legorburu Arrastuaren botoa alde dela, eta Jesús Mª Martiarena Jacaren abstentzioarekin, Barne gaietarako Batzordeak behean heldu dena diktaminatu du osoko bilkurak onar dezan:

BAT: 2010. urterako udal plantila organikoa hastapenez onartzea.

BI: 2010. urterako lanpostuen zerrenda hastapenez onartzea.

HIRU: Erabakiaren aurkako errekurtsoak:

a) Auzitara jo aurretik, eskatzaileak, hala nahi izanez gero, erabakia berraztertzeko errekurtsoa aurkez dezake 30/1992 Legearen arabera.

  • Horretarako, hilabeteko epea dauka, erabaki honen jakinarazpena jaso eta biharamunetik hasita.
  • Errekurtsoa aurkeztekotan Osoko Bilkurara jo behar da.

b) Bestela, administrazioarekiko auzi-errekurtsoa aurkez dezake zuzen-zuzenean.

  • Horretarako, bi hilabeteko epea dauka, erabaki honen jakinarazpena jaso eta biharamunetik hasita.
  • Errekurtsoa aurkeztekotan, EAEko Auzitegi Nagusiko administrazioarekiko auzitarako Donostiako epaitegira jo behar da."

Roberto Sánchez zinegotzia ez dago ados bi udaltzain kentzearekin, horrek akaso gaueko txanda kentzea suposatuko duelako. Bere ustez gaueko zerbitzua beharrezkoa da. Horregatik proposamenaren aurka bozkatuko omen du.

Jon Legorburuk dio berak ez duela esan gaueko txanda kenduko denik, kopuru berriarentzako antolaketa egokiena begiratzen ari omen dira.  Alkateak dio udal aurrekontuak izaten ari diren diru sarreraren gutxiagoatzearekin zer ikusi zuzena duela neurriak: zergetatik bildutako diru banaketan fondo foraletik jasotzen den dirua nabarmen jaitsi da azken bi urtean eta jaisten jarraituko duela dio alkateak. Ondorioz, gastua neurri berean murriztu beharra dagoenez aukera ezberdinen artetik udaltzainena proposatutako bat dela dio alkateak. Eta Legorburuk esan bezala, aztertzen ari omen dira gaueko zerbitzua ematea eta nola ematea, udaltzain bakarrarekin edo beste herriren batekin hitzartuta.

Kepa Garbizu ere ez dago ados proposatutako plantilarekin. Diru kontuei buruz dio krisiaren ondorio larririk gabe ere, udalaren kontuak gaizki zeudela, 2008ko udal kudeaketa ekonomikoa tamalgarria izan zela eta likidazioa negatiboekin itxi zela. Alkateak erantzun dio 2009 positiboan itxiko dela, 2008ko zuloari buelta emanez, nahiz eta fondo forala ikaragarri jaitsi eta aldundiari bueltatu beharreko guztiak bueltatuko diren. Plantilaren kontuaren gastu korronteaz ari garela gogoratu du, non fondo foraletik sartzen den diru kopuruak eragin zuzena duen.

Diktamena bozkatu eta onartu egin da aldeko sei botorekin, aurkako batekin (Roberto Sánchez) eta hiru abstentziorekin (Kepa Garbizu, Enrique Figueroa eta Mikel Antxon Arrizabalaga).

6.- 2010. ekitaldirako udal aurrekontua onartzeko diktamena (2009KO290005).

Alkateak Ogasun batzordean onartutako diktamena aurkeztu du. Udal aurrekontua departamentu-buru eta langileen ordezkariei aurkeztu zaiela ere esan du. Honela dio diktamenak.

"2010ko Udal Aurrekontua lantzeko eta  onartzeko tramitatzen ari den espedientea ikusirik, Ogasun eta Kontuetako Batzordeak, 2009ko Azaroaren 26an egindako bilkuran, Haritz Salaberria, Iñigo Esnaola eta Jon Legorburu zinegotzien  aldeko botoekin,  behean heldu den proposamena diktaminatu du osoko bilkuran onar dadin:

BAT: Hasierako onarpena ematea 2010. ekitaldiko Udal Aurrekontuari. Hona hemen aurrekontua atalez-atal  zehaztuta:

KKap

AZALPENA

GASTUAK

Kap

AZALPENA

SARRERAK

2010

2010

11

Pertsonal Gastuak

2.700.000

1

Zuzeneko zergak

2.000.000

22

Gastuak ondasun arrunt.

2.592.500

2

Zeharkako zergak

250.000

33

Finantza gastuak

200.000

3

Tasak eta bestelako zergak

1.080.000

44

Transferentzia arruntak

1.194.500

4

Transferentzia arruntak

3.746.000

56

Inbertsio errealak

938.000

5

Ondare-sarrerak

211.000

68

Finantza aktiboak

12.000

6

Hirigintzako Jarduerak

800.000

99

Finantza pasiboak

600.000

7

Kapital transferentziak

138.000

8

Finantza aktiboak

12.000

GUZTIRA

8.237.000

GUZTIRA

8.237.000

BI: Informazio publikorako hamabost egunetako epea irekitzea, Gipuzkoako Aldizkari Ofizialean eta iragarki oholtzan iragarkia argitaratuz, alegazioak aurkez daitezen."

Alkateak berak dokumentuari aldaketa batzuk egitea proposatu du:

-  01.227.07.313.30 partida izena aldatzea: dokumentuan "kaleko hezitzaileak" dio eta "Ingurune irekiko programa" deitzea proposatzen du.

- 01.227.85.531.00 partida, Behemendi: Belar bolak, 108.000 €tan gutxitzea proposatu du. 120.000 € zeuden lehen partidan eta orain 12.000 €tan geldituko litzateke. Alkatearen esanetan nabarmena da akatsa zegoela partidan.

- 01.481.02.455.10 partidari, Dirulaguntzak, 15.000 € gehitzea proposatu du.

- 01.220.02.451.10 partidari, Geure argitalpenak, 7.300 € gehitzea proposatu du.

- 455.10 funtzionalean partida berria sortzea proposatu du, 77.000 eurotako kontsignazioarekin, "KDT/merkataritza/hitzarmengintza" izenburupean.

- 451.10 funtzionalean partida berria sortzea proposatu du, 1.500 eurotakoa "Ehiza elkartea hitzarmena" izenarekin.

- 455.10 funtzionalean partida berria sortzea proposatu du "Aisialdia" deiturarekin eta 7.200 eurotako kontsignazioarekin.

Alkateak dio proposatutako zuzenketak eta aldaketak mantentzen dutela aurrekontuaren oreka eta partida batean gutxitzen diren 108.000 euroak beste bi partida handitzen eta hiru partida berritan erabiltzea proposatzen duela. Ondorioz, alkatearen proposamen berriaren arabera, diktamenean jasotzen den aurrekontuaren lauki laburpenean, gastuaren zutabean, II. Kapituluaren guztirako kopurua gutxitu egingo da 16.500 eurotan (-108.000 + 7.300+ 77.000 + 7.200), kantitate berria 2.576.000 € izanik eta IV kapitulua 16.500 eurotan handituko da (15.000 + 1.500), guztirako kopuru berria 1.211.000 euro izanik. Horiek dira laukian proposamenak eragiten dituen bi aldaketak.

Kepa Garbizuk espediente osoa lardaskeria bat dela, besteak beste oraintxe bertan diktamena aldatzeko proposamena egin duelako alkateak. Salatu du inoiz baino denbora gutxiago eduki izana dokumentua aztertzeko.

Alkateak galdetu du ea beste inork nahi dioen emendakinik aurkeztu aurrekontuari. Kepa Garbizuk dio bazuela asmoa, baina ez dituela egingo onarpen prozedura nola doan ikusita, azken orduko aldaketekin.

Alkateak dio gobernu taldearen lehentasun bat dela aurrekontu onartuekin urtea hastea. Onartzen du ez dela perfektua, eta behar diren aldaketak izango dituela urtean zehar, baina baita ere onartzen dio aurrekontuari beharrezko diren planifikazio eta kontrol tresna izatea.

Kepa Garbizuk dio ez duela ikusi eguneko zentroaren ekipamendurako eta funtzionamendu gastuetarako inolako gastu partidarik eta horrek funtzionatzen jarri nahi bada aurrekontu aldaketa eskatuko duela. Alkateak dio Foru Aldundiak udalari ematen dioen diruaz aparte udalak ez duela ezer gastatuko.

Roberto Sánchezek galdetu du zer proiektu egin nahi diren. Jon Legorburuk dio ezin dela gauza handirik egin 75.000 eurorekin Estatuko dirulaguntzak eskuratzeko proiektuak idatzi beharko direlako eta gutxi geratuko delako beste ezertarako. Obretan, Jauregialdekoa egingo dela esan du.

Alkateak proposatutako aldaketekin diktamena bozkatu da eta onartu egin da aldeko sei botorekin eta kontrako laurekin (Kepa Garbizu, Enrique Figueroa, Mikel Antxon Arrizabalaga eta Roberto Sánchez), ondorengo erabakiak hartuz:   

BAT: Hasierako onarpena ematea 2010. ekitaldiko Udal Aurrekontuari. Hona hemen aurrekontua atalez-atal  zehaztuta:

KKap

AZALPENA

GASTUAK

Kap

AZALPENA

SARRERAK

2010

2010

11

Pertsonal Gastuak

2.700.000

1

Zuzeneko zergak

2.000.000

22

Gastuak ondasun arrunt.

2.576.000

2

Zeharkako zergak

250.000

33

Finantza gastuak

200.000

3

Tasak eta bestelako zergak

1.080.000

44

Transferentzia arruntak

1.211.000

4

Transferentzia arruntak

3.746.000

56

Inbertsio errealak

938.000

5

Ondare-sarrerak

211.000

68

Finantza aktiboak

12.000

6

Hirigintzako Jarduerak

800.000

99

Finantza pasiboak

600.000

7

Kapital transferentziak

138.000

8

Finantza aktiboak

12.000

GUZTIRA

8.237.000

GUZTIRA

8.237.000

BI: Informazio publikorako hamabost egunetako epea irekitzea, Gipuzkoako Aldizkari Ofizialean eta iragarki oholtzan iragarkia argitaratuz, alegazioak aurkez daitezen."

7.- Festa Batzordearen araudia onartzeko diktamena (2009KU290001).

Iñigo Esnaolak  azaldu du Kultura Batzordearen diktamena. Honela dio diktamenak.

"Iñigo Esnaola, Haritz Salaberria eta Jon Legorbururen botoa alde dela, kultur batzordean zeuden zinegotzi bakarrak Kultura Batzordeak behean heldu dena diktaminatu du osoko bilkurak onar dezan:

BAT: Hasierako onarpena ematea Festa batzordearen antolaketa eta funtziona-mendurako araudia.

BI: Informazio publikorako hilabeteko epea irekitzea, Gipuzkoako Aldizkari Ofizialean eta iragarki oholtzan iragarkia argitaratuz, alegazioak aurkez daitezen."

Iñigo Esnaolak dio festa batzordearen funtzionamendurako barne araudia dela. Deialdiak, aktak, partehartzeak, e.a., arautzen dituen araudia. Batzordeari batzorde sektorialaren izaera eman nahi zaiola esan du, ROF-aren 130. artikuluan xedatutakoa. Gogoratu du duela sei hilabete pasa zitzaiela zirriborroa zinegotziei eta hiru bilera egin direla herriko elkarteekin eta bilera horietara zinegotziak gonbidatuak izan direla. Hasierako onarpena ematen bazaio jendaurreko epea izango dela dio, aukera izanik alegazioak edota aldaketak proposatzeko.  

Alkateak dio araudian jasotzen dena azken bi urteetan festa batzordeak izan duen funtzionatzeko era dela. Dio ez dela udal batzorde informatibo bat eta ez duela erabaki ahalmenik. Esan du beste udal araudiak errespetatuko dituela, dirulaguntzena barne. Araudia elkarteekin landu bezala aurkezten da. Behar bada findu eta zuzenketa batzuk egin beharko zaizkiola jendaurreko epean. Elkarteekin tratatuko omen dira eta gero berriz plenoari aurkeztuko omen zaizkio.

Oposizioko zinegotziek araudiari buruzko idazkariaren txostena eskatu dute. Idazkariak ohartarazi die, txosten eskaera jaso eta izan dituen bi lan egunetan ezin izan duela idatziz txostena egin, egingo duela. Dena den, ahoz, bilkura honetan araudiari buruzko oharpen batzuk egin ditu. ROF-aren 130. eta 131. artikuluak irakurri ditu, kontseilu sektorialei buruzkoak. Idazkariaren iritziz bi artikulu hauen arabera egin behar da araudia eta aurkeztuta testuan moldaketa batzuk egin beharko dira, batik bat testuan batzorde eta erabaki hitzen esanahi eta izaera zehazteko. Baita ere dirulaguntzen banaketan izango duen partehartzea zehaztuz.

Elkarteekin landutako eta kultura batzordean diktaminatutako testua bozketara jarri du alkateak jendaurreko epe ondoren eta idazkariaren txostenaren ondoren berriro ere kultura batzordean moldaketak egitearen kaltetan izan gabe. Diktamena onartu egin da, sei boto izan dira alde eta lau abstentzio (Kepa Garbizu, Enrique Figueroa, Mikel Antxon Arrizabalaga eta Roberto Sánchez).

  

8.- Euskara Biziberritzeko Plan Nagusian (EBPN) Plan Estrategikoak eta Kudeaketa Planak onartzeko diktamena (2009KU290002).

 

Alkateak azaldu du batzordearen diktamena. Honela dio diktamenak:

"Iñigo Esnaola, Haritz Salaberria eta Jon Legorbururen botoa alde dela, kultur batzordean zeuden zinegotzi bakarrak Kultura Batzordeak behean heldu dena diktaminatu du osoko bilkurak onar dezan:

BAT: Hasierako onarpena ematea Euskara Biziberritzeko Plan Nagusian (EBPN) sartzeko eta baldintzak onartzeko proposamenari."

Alkateak dio beharrezkoa dela osoko bilkuraren adierazpena euskara biziberritzeko plan nagusian sartzeko. Horretarako plan estrategikoa onartzea proposatu du eta baita Kudeaketa planak ere, nahiz eta hauen onarpena orain beharrezko ez izan.

Roberto Sánchez ados dago proposamenaren ildo nagusiekin, ez ordea kudeaketa planetan jasotzen diren zenbait esaldirekin, non elebitasuna zalantzan jartzen den. Horregatik plan estrategikoa eta kudeaketa planak bereiztuta bozkatzea eskatu du.

Plan estrategikoa onartu egin da aldeko bederatzi botokin eta abstentzio batekin (Mikel Antxon Arrizabalaga) eta Kudeaketa planak ere onartu egin dira aldeko zortzi botokin, aurkako boto bat (Roberto Sánchez) eta abstentzio bat (Mikel Antxon Arrizabalaga).

9.- Tomas Garbizu Lezoko Udalaren Musika Eskolaren Barne Araudia (EBA) (2009KU290003).

Alkateak diktamenaren onartzea proposatu dio osoko bilkurari. Zehaztu du jendaurreko epean alegaziorik egon ezean behin betiko onarpena automatikoa izango dela beste erabakiren beharrik gabe. Honela dio diktamenak:

"Iñigo Esnaola, Haritz Salaberria eta Jon Legorbururen botoa alde dela, kultur batzordean zeuden zinegotzi bakarrak Kultura Batzordeak behean heldu dena diktaminatu du osoko bilkurak onar dezan:

BAT: Hasierako onarpena ematea Tomas Garbizu Lezoko Udal Musika Eskolaren Barne Araudi Berriaren (EBA) onartzeko proposamena.

BI: Informazio publikorako hilabeteko epea irekitzea, Gipuzkoako Aldizkari Ofizialean eta iragarki oholtzan iragarkia argitaratuz, alegazioak aurkez daitezen."

Iñigo Esnaolak azaldu du araudiaren nondik norakoa, egindako aldaketak eta horien lanketan langile eta zinegotziek izan duten partaidetza.  

Diktamena ahobatez onartu da.

10.- Tomas Garbizu Lezoko Udalaren Musika Eskolaren funtzionamenduzko bost araudi onartzeko diktamena (2009KU290004).

Alkateak diktamenaren onartzea proposatu dio osoko bilkurari. Honela dio diktamenak:

"Iñigo Esnaola, Haritz Salaberria eta Jon Legorbururen botoa alde dela, kultur batzordean zeuden zinegotzi bakarrak Kultura Batzordeak behean heldu dena diktaminatu du osoko bilkurak onar dezan:

BAT: Hasierako onarpena ematea Tomas Garbizu Lezoko Udal Musika Eskolaren araudiak onartzea."

Bost barne araudiren behin betiko onarpena proposatzen dela zehaztu du alkateak, nahiz eta diktamenak hasierako onarpena dela esan. Bost araudiak hauek dira: musika tresna mailegatzeari buruzko araudia; materiala mailegatzeari buruzko araudia; instalazioak erabiltzeari buruzko araudia; langileak trebatzeko araudia; eskola kontseiluko ordezkariak aukeratzeko araudia.  

Bost araudiak ahobatez onartu dira.

12.- Mozioa, gazte mugimenduaren kontrako espainiar estatuaren eraso errepresiboaren aurrean aurkeztutakoa (2009AL050006).

Jaione Lekuona zinegotziak irakurri du mozioa:

"Azaroaren 23an euskal gazte independentisten aurkako beste operazio poliziala eta judizial bat burutu zuten. Horren ondorioz, hegoaldeko lau herrialdetan Euskal Herriaren eskubideen defentsan aritu diren 34 gazte atxilotu zituzten. Poliziek 90 bat miaketa burutu zituzten: etxeak, gaztetxeak, elkarteak, peñen egoitzak, tabernak...

Atxiloketa hauek arrazoi politikoak direla medio burutzen dituzte, oinarrizko eskubideak urratuz eta berme juridikoak ukatuz. Kasu honetan operazio mediatiko-poliziala erabiliz. Bestalde, esan beharra dugu, makro-operazio hau testuinguru politiko zehatz batean egiten dela. 

Izan ere, hilabete hauetan ezker abertzalea eztabaida sakonean murgildua dago. Euskal Herria aldaketa politikora eraman eta eskenatoki demokratiko bat eraikitzeko estrategia eraginkorra definitzeko lanean dabil, eta argi dago honi beldurra diola Estatu espainiarrak. Eztabaida hau eta ezker abertzalearen iniziatiba politikoa zapuzteko Estatuak horrelako operazio errepresiboak burutuko zituela jakina zen, izan ere, errepresioa da Estatu espainiarrak duen tresna bakarra.

Azken aste hauetan burutu diren atxiloketak eta espetxeratzeko agindu horien atzean, estatuak ideia jakin batzuk dituzten herritarrei parte hartze politikorako eskubidea ukatzeko jarrera politikoa ezkutatzen du. Bestalde, aldaketa politiko eta soziala eman ez dadin, estatuak aldaketa horren motorra gripatu nahi du: ezker abertzalea eszenatoki politikotik atera nahi du.

Historia luzea du gure herriak, eta luze, luzeegi, jo du gatazkak. Udal hau osatzen dugun guztiok ondo baino hobeto dakigu errepresioaren bidea ez dela bidea. Errepresioak ez dio gatazkari konponbidea ekarriko. Gatazka gainditzeko errepresioaren aldeko apustuak gainditu behar dira.

Euskal herritarroi hitza eta erabakia zor zaigu, gure etorkizuna askatasun osoz eta egitasmo politiko guztien artean erabakitzeko eskubidea errespetatzean datza konponbidea.

Hau guztia dela eta, honako mozio hau aurkezten dugu Udalbatzak eztabaida eta onar dezan:

1.- Udal honek bere elkartasun osoa helarazi nahi die egun hauetan atxiloturiko gazte guztiei eta euren senide zein lagunei. Halaber, inkomunikazio erregimenak, legeria antiterroristak eta dispertsioak eragiten duten eskubideen urraketa salatu nahi du.

2.- Udal honek euren jardun politiko eta sozialagatik espetxeratuak izan diren gazte independentista hauek berehala aska ditzatela exijitzen du.

3.- Udal honek gazte mugimendu, erakunde politiko, sozial eta komunikabideen aurka zabaldutako prozesuetan gutxieneko berme juridikorik ez duten ehundaka pertsonei bere elkartasuna helarazi nahi die.

4.- Udal honek espainiar estatuaren jardunbide antidemokratiko, autoritario eta errepresiboak salatzen du. Jardunbide horrekin irtenbide bakarra gatazka luzatzea delarik.

5.- Udal hau osatzen dugunok ez gaude egoera hau onartu eta etsitzeko prest. Horrexegatik, gatazka honi irtenbide demokratikoa bilatzeko gure konpromisoa berresten dugu.

6.- Udal honek atxilotuen askatasuna eskatzeko antolatuko diren elkarretaratzearekin bat egin du eta herritar guztiak deitzen ditu bertan parte hartzera.

7.- Azkenik, onartutakoaren berri herritarrei eta komunikabideei jakinaraztea erabakitzen dugu."

Kepa Garbizuk mozio alternatiboa aurkeztu du. Honela dio mozioak:

"Polizia-operazio hau, gure gizartearen gehiengoak defendatzen duen, giza-eskubide guztien defentsa irmoan eta herri honen gehiengo demokratikoaren borondatearen errespetuan oinarrituko den konponbide elkarrizketatuaren aurkako estrategi politiko batetan kokatzen da.

Euskal herriak, bere egoera politikoari aurre egingo dion prozesu bat bizi du, indartzen ari den prozesu dinamikoa, aipatu diren bi oinarrizko printzipio horiek bultzatuta, bai batzuk eta bai bestek ezarri nahi diguten irtenbide-gabeko eszenatoki politiko honi aurre egiteko.

Guzti honen aurrean, udal onek honakoa adierazten du:

  • 1. Lezoko udalak aipatutako atxiloketak arbuiatzen ditu.
  • 2. Aldarrikatu nahi du alderdi eta irizpide politiko guztien politikarako eskubidea; eskubide hori guztiontzat, baldintza berdinetan, Euskal Herriko gizarte eta politika mailako jardueratan aritzeko. Hortaz, askatasun eta oinarrizko eskubideen defentsak bermea behar du, norbanakoen irizpide politikoekiko eta pertsonen gertutasunarekiko egoeren gainetik.
  • 3. Deia luzatu nahi dio Udalak Estatuko Gobernuari, berari dagozkionetan, eta premiazko erara, bertan behera utzi dezan Alderdi Politikoen Legea, 2002ko ekainaren 27an onartua, aipatu printzipioen aurka egiten baitu bete betean.
  • 4. Udalak, orobat, bere konpromisoa sinatu nahi du giza eskubide guztien defentsa irmoan eta gure herriak etorkizuna demokratikoki erabakitzeko duen eskubidean oinarrituko den normalkuntzaren alde.
  • 5. Lan politikoa egiteagatik herritarrak atxilotu eta espetxeratzea gaitzesten du."

Lehenik mozio alternatiboa bozkatu da eta ez da onartu: alde bi boto egon dira (Kepa Garbizu eta Enrique Figueroa), zazpi boto aurka (Haritz Salaberria, Jon Legorburu, Iñigo Esnaola, Urko Lopetegi, Pili Legorburu, Jaione Lekuona eta Mikel Antxon Arrizabalaga) eta abstentzio bat (Roberto Sánchez).

Ondoren deialdiarekin banatutako mozioa bozkatu eta onartu egin da aldeko sei botokin eta aurkako laurekin (Kepa Garbizu, Enrique Figueroa, Mikel Antxon Arrizabalaga eta Roberto Sánchez).

 13.- Mozioa, Benedikto XVI. Aita santuak HIESaren inguruan egindako adierazpenekin desadostasuna agertzeko EHGAMek aurkeztutakoa (2009AL050007).

Urko Lopetegi zinegotziak irakurri du mozioa. Honela dio:

"EHGAMek, Euskal herriko Gay-Les Askapenerako Mugimenduak, ondoko dokumentua aurkezten du, udal bilkuran eztabaidatzeko: Benedikto XVI.a  aita santuak preserbatiboaz egiten dituen azalpenen gaineko Mozioa.

JUSTIFIKAZIOA

(1) Vatikanoko Aita Santuaren adierazpena. Yaunderan (Camerun), 2009ko martxoaren 17an, Benedikto XVI.a aita santuak hau esan zuen: "HIESa/GIBaren arazoa ezin da konpondu preserbatiboen banaketarekin; aitzitik, preserbatiboek arazoa handitu egiten dute".

(2) Osasun publikoaren aurkako adierazpena. Martxoaren 19an, berehala, nazioarteko autoritate mediku-zientifikoek -Nazio Batuen HIESa/GIBaren gaineko Egitasmo Bateratuak (ONUSIDAk), Nazio Batuen Biztanleenak (UNFPAk) eta Osasunerako Munduko Erakundeak (OMEk)-  iritzi zioten beharrezkoa zela   adierazpen publikoa plazaratzea, Aita Santuak esandakoak zuzentzeko. Erakunde horiek adierazi zuten preserbatiboaren erabilera elementu garrantzi-garrantzizkoa dela GIBa modu integral, eraginkor eta jasangarrian aztertzeko. Era berean, preserbatiboaren promozioaren alde azaldu ziren.

Erakunde horiek birritan adierazi dute gizonezkoentzako latexko preserbatiboa dela  GIBa eta sexu bidezko infekzioen aurkako teknologiarik eraginkorrena. Esan gabe doa, bide batez, erakunde horiek inpartzialak eta prestigio handikoak direla.

Bestalde, The Lancet aldizkariak, munduko aldizkari mediku ezagunenak, dio Aita Santuaren adierazpenak desegokiak eta okerrak direla: batetik, agintari batek egiten dituelako; bestetik,  arrazonamendu zientifikoaren aurkakoak direlako; eta azkenik, uste okerra sortzen dutelako, eta uste oker horiek, gainera, Doktrina Katolikoa indartzeko helburuarekin eginda daudelako.

(3) Oihartzun soziala. Kontuan izan Aita Santuaren adierazpenek mundu-mailan dutela oihartzuna. Halaber, kontuan izan milaka pertsonarengan dutela eragina. Eragin hori, batez ere,  GIBak gehien zigortutako lurraldeetan gauzatzen da, non eta     GIBaren aurkako tresnarik eraginkorrena preserbatiboa denean.

Gurean, berriz, adierazpen horien eragina nabarmena da. Zergatik?

(a) gurean Eliza Katolikoak duen ezarpenagatik;

(b) apaizek, Eliza Katolikoaren Doktrinaren zabaltzaile diren aldetik, preserbatiboaren eraginkortasuna ukatzen dutelako.

(4) GIBaren aurkako borroka, zientzialariek eta agintari publikoek gauzatu behar dutena. Behar-beharrezkoa den premia hori, urteotan, Estatu eta Gobernuetako agintariek zehaztu dute GIBari buruzko konpromiso-aldarrikapen batean. Konpromiso-aldarrikapen hori  Nazio Batuek egindako ezohiko bilkura batean eman zen argitara 2001eko ekainaren 27an:  Mundu mailako krisiaren aurrean, mundu mailako ekintza.

Milurtekoaren Ekitaldien helburuetako bat ere bada GIBaren aurkako borroka. 2000. urteko Milurtekoaren Goi-bileran  hartu zen erabaki hori. Bertan, munduko agintariek garapena eta gosea desagerrarazteko asmoz, indarrak batuko zituztela hitz eman zuten, 2015. urterako, edota lehenagoko, 8 xede eta 18 helburu zehatz beteta.

Badago kontuan hartu beharreko beste aurrekari bat: Nazio Batuen Erakundeko partaide diren estatuek, 2006ko ekainean,  GIBari buruzko goi-bileran, aho batez,  egindako aldarrikapen politikoa; eta, bereziki, aldarrikapen horren 22. konpromisoa. Estatuetako agintariek, 22. konpromisoan, honako hau aldarrikatzen dute: " GIBaren infekzioaren prebentzioa, bai estatu, bai lurralde, bai nazioarteko ekintza behar du izan, eta pandemiatzat hartuko da. Gainera, herrialde guztietan, arrisku-joerak gutxitzeko  eta joera sexual arduratsuak sustatzeko  prebentzio-programa zabalak izango dira. Era berean, erabiltzaileek infekzioak ekiditeko tresnak, hala nola, gizonezkoen, zein emakumezkoen preserbatiboak eskura izango dituzte."

(5) Udal agintarien eskumena, osasun publikoaren gainean. Osasunaren gaineko Lege Orokorrak eta Toki Erregimenaren Oinarrien gaineko Lege erregulatzaileek udal erakundeei egozten diete osasun publikoaren gaineko eskumena eta erantzukizuna; baita lehen mailako osasun-harreraren kudeaketa ere. Ez da udalbatza honen eginkizuna, jakina,  katolikoen arteko kastitatea bultzatzeko  Vatikanoko politikak baloratzea. Aitzitik,  udalbatzaren lana da, agintari batek osasun gaineko sasi-mezua zabaltzen duenean, mezu hori salatzea; mezu horrek, gainera, egia zientifikoa urratzen duenean; eta argi dago preserbatiboak GIBa saihesten duela.

Ezaguna  da  erakunde publikoek  GIBaren aurkako borrokan, gurean, duten kezka. Kezka horren isla izan dira (a) gizatalde askoren ekimenak eta (b) GIBaren aurkako borrokan, botere publikoen  esku hartzeko borondatearekin jarraitu nahi izatea, batez ere, Afrika azpi-sahararrean. Horren adibide da Eusko Jaurlaritzak GIBaren aurkako programari emandako 400.000 euroak.

Gainera, asko eta asko dira, Aita Santuak esandakoaren eraginez, kolokan gera daitezkeen ekimen  sozialak, kooperazio-egitarau desberdinetan aurreikusita daudenak. Horiek ere, batez ere, Afrikan. Benedikto XVI.a aita santuak esandako hitzek milioika eta milioika pertsonen osasuna arriskuan jartzen dute. Halaber, sinesmen baten defentsa dena aholku mediku batekin nahas daiteke.

(6) GIBaren aurkako borroka eta politikoen laguntza. 2009ko  apirilaren 2an,  Belgikako Parlamentuak  Ebazpen-proposamena onartu zuen. Proposamen horri begira dago mozio hau. Ebazpen-proposamen horretan, Benedikto XVI.ak egindako adierazpenak ezesten dira.

Hain dira larriak Aita Santuak egin dituen adierazpenak; eta hainbesteko eragina izan dezakete behin eta berriro esparru desberdinetatik egin diren adierazpen horiek, ezen pentsatzen dugun edonongo autoritate publiko edota arduradun sanitario, udal agintariak barne, EZIN  dela burumakur gelditu sasi-adierazpen horien aurrean. Halaber, GIBaren eraginpean eta  garapen bidean dauden herrialde asko eta asko, batez ere Afrikan, kinka larrian jartzen ditu.

Horregatik guztiagatik, beste erakunde-egoitzetan egin den moduan, zuei ere gauza bera eskatzen dizuegu eta honako hau aurkezten dugu

MOZIOA

(1) Udalbatza, kezkatuta egoteaz gain,  ez dago ados  Benedikto XVI.a aita santuak esandakoekin. Benedikto XVI.a aita santuak esan zuen "HIESa/GIBaren arazoa ezin dela konpondu preserbatiboen banaketarekin; aitzitik, preserbatiboek arazoa handitu egiten dutela". Udalbatzak adierazten du gizonezkoentzako latexko preserbatiboa dela  GIBa eta sexu bidezko infekzioen aurkako teknologiarik eraginkorrena.

(2) Udalbatzak GIBaren aurkako borroka sustatuko du. Horretarako, zehaztasun  zientifikoetan oinarrituko da, eta, era berean, preserbatiboaren erabileraren sustatzaile izango da, sexu bidezko gaixotasunen aurkako metodo eraginkorra delako."

Kepa Garbizuk mozio alternatiboa aurkeztu du. Honela dio:

"Udal agintarien eskumena, osasun publikoaren gainean

 

Osasunaren Lege Orokorrak eta Toki Erregimenaren Oinarrien Lege erregulatzaileak, bere 2. artikuluan, h eta i ataletan, udal erakundeei egozten diete osasun publikoaren gaineko eskumena eta erantzukizuna; baita lehen mailako osasun-harreren kudeaketa ere.

Edonola ere, osasun-sistema moderno eta aurrerakoi baten antolakuntza, Lezo bezalako udal baten eskumenetik at geratzen dela kontuan izanik, Osakidetzaren ardura dela ulertzen dugu.

Betalde, egia da, nazioarteko osasunaren inguruan zeresana duten erakunde guztiek bat egiten dutela, GIB, Giza Inmunodefizientziaren Birusa, izeneko gaixotasunari mugak eta eraginkorrean jartzeko bide zuzenena preserbatiboaren erabilpenetik pasatzen dela baieztatzerakoan.

Beraz, honako mozioa aurkezten dugu:

  • Irizpide zientifiko hutsez baliatuz, gizonezkoentzako latexko preserbatiboa da GIBa eta sexu bidezko infekzioen aurkako teknologiarik eraginkorrena.
  • Udalbatzak GIBaren aurkako borroka sustatuko du. Horretarako, zehaztasun zientifikoetan oinarrituko da, eta, ere berean, preserbatiboaren erabileraren sustatzaile izango da, sexu bidezko gaixotasunen aurkako metodo eraginkorra delako."

Lehenik mozio alternatiboa bozkatu da eta ez da onartu: alde lau boto egon dira (Kepa Garbizu, Enrique Figueroa, Mikel Antxon Arrizabalaga eta Roberto Sánchez) eta sei aurka (Haritz Salaberria, Jon Legorburu, Iñigo Esnaola, Urko Lopetegi, Pili Legorburu eta  Jaione Lekuona).

Ondoren deialdiarekin banatutako mozioa bozkatu eta onartu egin da aldeko zazpi botokin, aurkako bi (Kepa Garbizu eta Enrique Figueroa) eta abstentzio bat (Roberto Sánchez).

14.- Alkatearen, Organo kolegiatuetako udal-ordezkarien eta delegatuen txostenak.

Iñigo Esnaolak, kirol eta kultura arloan dauden berrikuntzak komentatu ditu: datorren abenduaren 20an ospatuko den Kirolaren Eguna zertan datzan azaldu du; Lezoko ondarearen inguruan egin den liburuaren aurkezpena eta Nafarroaren historiaren inguruan ekoiztu den DVDa aipatu ditu; Musika Eskolaren finantzazioari buruzkoak ere aipatu ditu eta, azkenik,  KZgunearen gela udalak berreskuratzeko aukeraz aritu da.

Jon Legorburuk, martxan dauden obren ingurukoak komentatu ditu: Saldise Plaza Santo Tomas egunerako bukatu nahi dela; Guillermo de Lazonen azken ukituak ematen ari direla; eguneko zentrokoak hasi direla eta Piku kale ondoko autobus geltoki ingurukoak laster hasiko direla. Aipatu du Gaintza eta Zubitxo kaleetako maldetako baldosa lazteko tratamendua egingo dela hain labainkorrak izan ez daitezen. Baita ere esan du, Markesane ingurua aztertu eta txukuntzeko Eskola Tailerra egingo dela 2010ean, Aranzadi Zientzi Elkartearen ardurapean eta INEM-ren dirulaguntzarekin, S-1eko urbanizazioaren 2. fasea hastear dagoela, Jauregialde inguruko urbanizazio lanak urtarrilean esleituko direla, Algeposarekin 6 poligonoaren inguruan hitzarmen urbanistikoa sinatuko dela hilabete honetan eta 107 poligonoko lursailaren salmenta hilabete honetan kobratuko dela.

Alkateak Gizarte Zerbitzuen ingurukoak komentatu ditu. Gero eta zerbitzu eskari gehiago dagoela, behar bada egoera ekonomikoaren okertzearen ondorioz. Etxez etxeko zerbitzuan itxaron zerrenda dagoela dio. Horretaz gain, Udala egiten ari den Berdintasun diagnostikoaren inguruan pasa zaien inkesta gogoratu die zinegotziei. Bestalde, Eguneko zentroaren inguruan Aldundiarekin biltzekoak direla dio, zerbitzu eskumena norena den zehazteko.

Euskara arloko gaietan, alkateak ondorengoak komentatu ditu: Euskararen Biziberritze Plan Nagusirako batzordea eratuko dela datozen egunetan, behin bere eraketa adostu eta gero. Dio gainontzeko programetan jendea badabilela, bai Kuadrillategi, euskaltegi eta abarretan.  Banatzeko zeuden dirulaguntzak banatu dituztela dio eta Oarsoaldeak burutzen dituen programak normaltasunez ari direla osatzen.

15.- Galde-eskeak.

1.- Roberto Sánchezek, proposamen batzuk aurkeztu zituela dio aurrekontuetarako eta ez duela haien arrastoen berri izan onartutako aurrekontuetan (eskola liburuak erosteko proposamena, uraren ordenantza berria, ...). Ea zerbait egingo den galdetu du.

Alkateak dio ez dela ezer jaso, eta aztertzeko asmoa dutela.

2.- Urko Lopetegik dio Jon Antza desagertua jarraitzen duela eta galdetu du ea non dagoen.

3.- Kepa Garbizuk dio zortzi galdera berri aurkeztu dituela idatziz eta erantzunik ez duela jaso, ez hauena ez lehendik erantzun gabe dituenena.

Alkateak dio dirulaguntza eskaeren inguruan egin dituen galdera guztiak kontsultatu ahal dituela jasotzen duen udal erregistrotik.

Aktaren amaiera.

Beste aztergairik geratzen ez denez, alkate-lehendakariak 21:56etan eman dio buru bilkurari. Eta nik, idazkari naizen aldetik, akta 828.358.etik 828.374.ra arteko zenbakiak dituzten orri ofizialetan jaso eta horren guztiaren fede ematen dut,  eta bilkuran izan diren zinegotzi guztiek izenpetu egin dute akta hau.

link 2009.eko Urriaren 28ekoa
Data:2009-10-28
Agiri mota: Osoko Bilkuraren akta
Lasterbideak:
Mamia: 

Lezoko Udaletxeko Biltzar Areto Nagusian, 2009ko urriaren 28an, 19:30etan, eratu da OSOKO UDALBATZA, EZOHIKO BILKURA egiteko xedez, lehen deialdian, Haritz Salaberria Goikoetxea alkatearen lehendakaritzapean eta ondorengo zinegotzi hauek bertan direla: Haritz Salaberria Goikoetxea, Jon Legorburu Arrastua, Iñigo Esnaola Arbiza, Maria Pilar Legorburu Echegaray, Urko Lopetegi Campano, Jaione Lekuona Irazusta, Kepa Garbizu Azkue, Enrique Figueroa Laboa eta Miguel Antonio Arrizabalaga Brusín.

Ez dira bileran izan Irati Aranburu Salaberria, Jesus Maria Martiarena Jaca eta Roberto Sánchez Sánchez.

Bertan da eta egintzaren fede eman du udal idazkaria den Xabier Loiolak.

1.- S-1 sektoreko C-1 lursailaren azalera eskubidearen prezioaren ordainketa atzeratzeko proposamena (2009H0380003).

Jon Legorburuk, Hirigintza, Obra eta Zerbitzuetako zinegotzi delegatuak, proposamenaren berri eman du. Honela dio proposamenak:

"Sukia Eraikuntzak, S.A.k, hain zuzen ere udalaren jabegokoa den S-1 sektoreko C-1 lursailaren azalera eskubidearen esleipendunak, idatzi bat sartu du ondoren zehazten den eskariarekin:

Adierazikato lursailaren azalera eskubidea besterentzeko kontratazio prozedura arautzen duen baldintza agiriaren arabera, kontratuaren behin betiko esleipena jakinarazi ondoren, esleipendunak hilabeteko epean  kontratuaren prezioaren %50 eta BEZ osoa ordaindu behar du eta gainontzeko %50a eskriturak egiterakoan. Baldintza agiriak ez du agintzen eskriturak egiteko eperik.

Horrela kontratuaren behin betiko esleipena irailaren 29an jakinarazi zenez, adierazitako lehen ordainketa, hau da, prezioaren %50a eta BEZ osoa azaroaren 1a baino lehen ordaindu behar da.

Sukia Eraikuntzak, S.A.k, proposatzen du ordainketa guztia abenduaren 3ra atzeratzera, azalera eskubidearen eskriturak egun horretan bertan izenpetuz,  S-1 Sektoreko C-1 lursaila oraindik egokitzeko dagoelako eta, abenduak 3 arte gutxienez ezingo dutelako eraikuntza lanekin hasi.

Balintza agirian adierazten den ordainketa modua eta epeak Udalak zehazturikoak dira, horrela aukeratu duelako, ez baitago ordainketa modu eta epe hoietara behartzen duen lege edo araurik. Beraz Udalari dagokio ordainketa modu edo epeak aldatzea.

Kasu honetan Kontratazio Organoa Osoko Bilkura denez, bertan onartu behar da proposatzen den baldintza agiriaren aldaketa.

Beraz, Hirigintza, Ingurumena, Obra eta Zerbitzuetako zinegotzi delegatuak proposaturik, Osoko Bilkurak honako erabakiak hartu ditu:

BAT: Sukia Eraikuntzak, S.A.k egindako eskaera onartzea eta S-1 sektoreko C-1 lursailaren azalera eskubidearen prezioaren ordainketa osoa 2009ko abenduaren 3a arte atzeratzea.

BI: C-1 Lursailaren azalera eskubidearen besterentzearen gaineko eskritura izenpetzeko eguna abenduaren 3a jartzea.

HIRU: S-1 sektoreko C-1 lursailaren azalera eskubidearen esleipena kontratuaren aldaketa honekin izenpetzea.

LAU: Akordio gauzatzeko beharrezkoak diren dokumentuak izenpetzeko Lezoko Alkatea ahalmentzea."

Kepa Garbizuren ustez proposamena ezin da onartu. Onartzeak egindako lehiaketa zalantzapean jarriko luke ordainketa baldintzak aldatzen direlako eta, agian, baldintza berri hauetan lehiatzaile gehiago izan zitezkeelako.

Iñigo Esnaolak argitu du, udalak lur eremu hori urbanizatua entregatzeko konpromisoa zuela eta urbanizazio lan horiek atzeratu egin direla. Horregatik proposatu dute eskaera hau onartzea.

Proposamena bozkatu egin da, baina haren urgentzia bozkatu eta onartu gabe zegoenez, batetik, urgentzia bozkatu da eta, bestetik, proposamena berriz bozkatu da.

Proposamena batzordean aztertu eta bozkatu gabe dagoenez, gaurko bilkuran eztabaidatu eta bozkatzeko, aurrez, haren urgentzia onartu behar da. Proposamenaren urgentzia onartu egin da aldeko sei botorekin, aurkako birekin (Kepa Garbizu eta Enrique Figueroa) eta abstentzio batekin (Mikel Antxon Arrizabalaga).

Behin urgentzia onartuta, proposamena bera bozkatu da eta onartu egin da aldeko sei botorekin eta aurkako hirurekin (Kepa Garbizu, Enrique Figueroa eta Mikel Antxon Arrizabalaga).

2.-  2010eko ordenantza fiskalak onartzeko diktamena (2009KO290004).

Alkateak gogoratu du bi Ogasun Batzorde egin direla gai horrekin, lehena informatzeko eta bigarrena diktaminatzeko. Proposatutakoaren nondik norakoen berri eman du alkateak: orokorrean ez omen dago igoera nabarmenik, zabor tasetan eta Bekoerrota kiroldegiko prezioetan izan ezik; lehenengoan %15eko igoera proposatzen da, eta bigarrenean, %2koa. Ogasun Batzordeak emandako diktamena onartzea eskatu dio bilkurari. Honela dio diktamenak:

"Alkateak azaldu ditu 2009. urterako ordenantza fiskalak eratzeko erabilitako irizpideak, ikerketa ekonomikoen eta kontu-hartzailetzaren informeetan oinarriturik, eta hura eztabaidatu ondoren, Kontu eta Ogasun Batzordeak Haritz Salaberria, Jon Legorburu eta Iñigo Esnaola  zinegotzien aldeko boto ponderatuekin, eta Kepa Garbizu zinegotziaren abstentzioarekin ondorengo proposamen hau diktaminatu du udalbatzak osoko bilkuran onartzeko:

BAT: Hasierako onarpena ematea ondorengo  Ordenantza Fiskal  hauen aldaketari:

  • 2010ko egutegi fiskala
  • 6.4 Jabari publikoaren erabilpen pribatiboak jaietan
  • 6-5 Udal lokalak erabiltzearen tasa
  • 7-1 Ura
  • 7-2. Estolderia
  • 7-3 Zaborra
  • 7-4 Herriko Kanposantua
  • 7-11 Bekoerrota kiroldegia eta Altzate piszinak
  • 7-12 Futbol Zelaia
  • 7-13 Udalekuak
  • 7-14 Ludoteka Zerbitzua
  • 7-15 Kuadrilategi Egitasmoa
  • 7-16 Material Kulturala
  • 7-17 Festetako Edalontziak
  • 7-18 Udal Langileen lan orduak.

BI: Informazio publikorako hilabeteko epea irekitzea, Gipuzkoako Aldizkari Ofizialean eta iragarki oholtzan iragarkia argitaratuz, alegazioak aurkez daitezen."

Kepa Garbizuk eskatu du ordenantza fiskal bakoitza banan-banan aztertu eta bozkatzea. Alkateak onartu du proposamena. Ondorioz, diktameneko atal bakoitza aztertu eta bozkatuko da.

  • 2010eko egutegi fiskala

Eztabaidarik gabe, aho batez onartu da.

  • 6.4 Jabari publikoaren erabilpen pribatiboak jaietan

Kepa Garbizuk dio akaso festetako atrakzioak jartzeko prezio hauekin baino gehiago lortuko zela lehiaketa deituaz. Jon Legorburuk dio prezioa igoz gero, agian ez zela atrakziorik etorriko.

Bozkatu eta aho batez onartu da batzordeak proposatutakoa.

  • 6-5 Udal lokalak erabiltzearen tasa

Kepa Garbizuk dio kasu batzuetarako jaitsiera nabarmena proposatzen dela, orain dela hiru urteko preziotara bueltatuz, inolako justifikaziorik eman gabe. Iñigo Esnaolak dio egindako azterketaren ondorio direla proposatutakoak.

Bozkatu eta aho batez onartu da batzordeak proposatutakoa.

Kepa Garbizuk eskatu du ezkontzak sortzen duten narraskeria konpondu behar dela.

  • 7-1 Ura eta 7-2. Estolderia

Ur-kontsumoa aurreko prezioetan mantendu da eta neurgailuen mantentze prezioak igo.

Proposamenaren alde zortzi boto izan dira eta abstentzio bat (Mikel Antxon Arrizabalaga).

  • 7-3 Zaborra

Zerbitzua gero eta defizitarioagoa dela-eta proposatu da %15aren igoera.

Proposamenaren alde zortzi boto izan dira eta abstentzio bat (Mikel Antxon Arrizabalaga).

  • 7-11 Bekoerrota kiroldegia eta Altzate igerilekuak

Kepa Garbizu kexu da kiroldegiko kudeaketarekin, ilunkeria eta sekretismoa daudela dio. Dio kiroldegia kudeatzen duen enpresak ez duela urtero aurkeztu behar duen kontu zuriketa aurkezten, salbuespenez aurten entregatutakoak ez duela ezer argitzen dio. Dio udalean ez dakiela inork nola diren kiroldegiko kontuak, ez alkateak, ez kontu-hartzaileak, ez beste inork. Baldintza agiria irakurri gabe luzatu omen zitzaien kontratua eta haien arabera ezin omen da KPIa baino igoera altuagorik egin prezioetan. Ondorioz, orain proposatzen dena, hau da, %2a, KPIa baino altuagoa da, eta beraz, pleguen kontrakoa omen da.

Iñigo Esnaolak erantzun dio berak, Kepa Garbizu, alkate izan den lau urtetan, ez duela ezer ere egin kiroldegiko kudeaketaren inguruan. Aldiz, legealdi honetan kontratuaren jarraipen mahaia osatu da. Oposizioko taldeak nahiz eta gonbidatuak egon, ez dira bilerara azaldu. Mahai horretan kontuak aurkeztu dira eta aurkeztu berriak dira bilera hartan kontu-hartzaileak eskatutako kontu ikuskatuak. Beraz, gehiago beharko badira ere inoiz eman ez diren pausoak ematen ari direla gai honetan dio Iñigo Esnaolak.

Igoera, plegua eta KPIaren kontuarekin alkateak dio begiratuko dela eta aldaketak egin behar badira egingo direla, horretarako ordenantzen jendaurreko epea aprobetxatuz.  

Prezio aldaketa proposamena bozkatu eta onartu egin da aldeko sei botorekin, aurkako bi botorekin (Kepa Garbizu eta Enrique Figueroa) eta abstentzio batekin (Mikel Antxon Arrizabalaga).

  • 7-12 Futbol zelaia

Ez da aldaketarik proposatzen.

  • 7-13 Udalekuak, 7-14 Ludoteka zerbitzua eta 7-15 Kuadrilategi egitasmoa

Kepa Garbizuk salatu du ludotekan ez direla aplikatu plenoak iaz onartutako prezioak beste norbaitek erabaki omen du hori.

Iñigo Esnaolak dio akats bat egon dela, iaz doan izan zela ludoteka eta 40 haurrek erabili zutela eta aurten 7 haur bakarrik dabiltzala. Ludoteka zerbitzu bera aztertu behar dela dio.

Bozkatu eta onartu egin da aldeko sei botorekin, aurkako bi botorekin (Kepa Garbizu eta Enrique Figueroa) eta abstentzio batekin (Mikel Antxon Arrizabalaga).

  • 7-16 Material kulturala

Bozkatu eta aho batez onartu da batzordeak proposatutakoa.

  • 7-17 Festetako edalontziak

Iñigo Esnaolak dio udalak tabernarien esku uzten dituen eta galtzen diren edalontzi birziklagarrien prezioa dela hori, eta gaineratu du tabernariek beraiek kudeatu beharko luketela gai hori.

Bozkatu eta onartu egin da aldeko sei botorekin eta hiru abstentziorekin (Kepa Garbizu, Enrique Figueroa eta Mikel Antxon Arrizabalaga).

  • 7-18 Udal langileen lan orduak.

Proposamenaren alde zortzi boto izan dira eta abstentzio bat (Mikel Antxon Arrizabalaga).

Aktaren amaiera.

Beste aztergairik geratzen ez denez, alkate-lehendakariak 20:15etan eman dio amaiera bilkurari. Eta nik, idazkari naizen aldetik, akta 828.348.tik 828.352.ra arteko zenbakiak dituzten orri ofizialetan jaso eta horren guztiaren fede ematen dut, eta bilkuran izan diren zinegotzi guztiek izenpetu egin dute akta hau.

link 2009.eko Urriaren 7ekoa
Data:2009-10-07
Agiri mota: Osoko Bilkuraren akta
Lasterbideak:
Mamia: 

Lezoko Udaletxeko Biltzar Areto Nagusian, 2009ko urriaren 7an, asteazkena, 19:35etan, eratu da OSOKO UDALBATZA, OHIKO BILKURA egiteko xedez, lehen deialdian, Haritz Salaberria Goikoetxea alkatearen lehendakaritzapean eta ondorengo zinegotzi hauek bertan direla: Haritz Salaberria Goikoetxea, Irati Aranburu Salaberria, Jon Legorburu Arrastua, Iñigo Esnaola Arbiza, María Pilar Legorburu Echegaray, Urko Lopetegi Campano, Jaione Lekuona Irazusta, Kepa Garbizu Azkue, Enrique Figueroa Laboa, Jesús María Martiarena Jaca eta Roberto Sánchez Sánchez.

Bileran ez da izan Mikel Antxon Arrizabalaga Brusín.

Bertan da eta egintzaren fede eman du udal idazkaria den Xabier Loiolak.

1.- Egoki irudituz gero, 2009ko ekainaren 10eko ohiko bileraren akta, ekainaren 19ko, uztailaren 3ko eta uztailaren 30eko ezohiko bileren aktak onartzea.

Ekainaren 10eko aktan, gazteleraz idatzitako aktan, Kepa Garbizuk proposatu du zuzentzea 761111 orrialdean, laukiaren ondorengo lehen eta bigaren lerroaldeetan Ogasun batzordeari buruzkoa jasotzen denean behar bezala jasotzea batzordearen gaztelerazko izena: "consejo informativo" dio eta "comisión informativa" esan behar du eta "consejos de hacienda" dio eta "comisión de hacienda" esan behar du. Zuzenketa horiekin akta onartu da.  

Ekainaren 19ko aktak, bai euskaraz idatzitakoan eta bai gazteleraz idatzitakoak, bilkurara zinegotzi guztiak etorri zirela dio eta, horrela ez zenez izan, akta zuzentzea eskatu du Kepa Garbizuk. Aktaren onarpena Idazkariak bilkurako oharrak aztertu zain geratu da, hurrengo bilkura baterako. Zuzenketa egin behar bada, beste orri batzuetan inprimituko da zuzendutako akta.

Uztailaren 3ko aktan, Kepa Garbizuk eskatu du 761126 orrian, 2. gaiko, lehen lerroaldeko hirugarren lerroan "plan especial del área Portu" esan ordez "plan especial del área portuaria" esan beharko lukeela. Zuzenketa horrekin akta onartu da. Jesus Mari Martiarenak gogoratu du bilerara etorri zela eta berandu hasi zelako alde egin zuela. Horregatik ez omen du akta sinatuko. Idazkariak ohartarazi dio horrela jasota dagoela aktan.

Uztailaren 30eko akta: Kepa Garbizuk, bileran ez bazen egon ere, eskatu du bilkuran eztabaidatutako bi gaietan bozketa emaitzak jasotzea, ez duelako bi kasuetan aktak ezer esaten. Bilkura hartako idazkari lanetan aritu zen udal langilearekin argituko da kontu hori. Kontua argitu ondoren eta beharrezko zuzenketak egin eta gero, aktaren onarpena hurrengo osoko bilkurarako utzi da.

2.- Papresa, SAUk aurkezturiko hirigintza-hitzarmena onartzeko diktamena  (2009H0360003).

Jon Legorburuk eman du diktamenaren berri. Honela dio diktamenak:

"Alkatearen  2009ko abuztuaren 12ko 498 zenbakidun dekretuaren bitartez Papresa, SAUk proposaturiko Hitzarmen Urbanistikoaren eduki osoa Gipuzkoako Aldizkari ofizialean argitaratu eta jendaurrean jartzea erabaki zuen  20 eguneko epean alegazioak aurkeztu ahal izateko.

Hitzarmen hau Gipuzkoako Aldizkari Ofizialean 2009ko abuztuaren 21an an argitaratu zen eta 20 eguneko Jendaurreko epean ez da alegaziorik aurkeztu

TXOSTENA

Lezoko Udala Planeamenduko Arau Subsidiarioen berrikuspena izapidetzen ari da, Hirigintza Plan Orokor baten idazketaren bitartez.

Horrela, 2009ko ekainaren 10eko osoko bilkuran hartutako akordioaren bitartez Lezoko Udalak, Plan Orokorreko haserako onarpenerako dokumentua idazteko kontuan izan beharreko zehaztapen eta irizpideak onartu zituen.

Papresa, SAUk Lezoko Udalaren aurrean " Lezoko AA.SS 27 zenbakidun Aldaketa, Papresa, SAUren instalazioak handitzeko lur hiritargarri industriala klasifikatzeko eta sailkatzeko " dokumentua aurkeztu ondoren Lezoko Udalak aldaketa hori formulatzea erabaki zuen 2009ko uztailaren 3an  buruturiko osoko bilkuran, Plan Orokorrerako onarturiko irizpide eta zehaztapenekin bat datorrelako.

Hitzarmen honen arabera, Lezoko Udalak, udalerrian gauzatzen ari den Plangintzako Arau Subsidiarioen berrazterketaren esparruan, Papresa, SAUren instalazioak handitzeko lur hiritargarri industriala klasifikatzeko eta sailkatzeko AA.SS 27 zenbakidun Aldaketa izapidetuko du hitzarmenean zehazten den baldintzetan eta bestetik Papresa, SAUk  Lezoko Udalari hitzarmenean bertan adierazten diren kontzeptuengatik, zehazturiko kopuruak eta adierazitako epeetan  ordainduko dizkio.

Bestalde hitzarmen honetan aurreikusten den eraikigarritasunaren gehitzearen %15ko lagapena dirutan egitea proposatzen da. 2/2006 Lurzoruaren eta Hirigintzaren Legearen 27.5 artikuluak xedatzen duenarekin bat dator proposamen hau eta gainera legearen zazpigarren xedapen gehigarriaren 7 atalak aurreikusten duen udal teknikarien balorazio ekonomikoa ere  espedientean dago.

Beraz  2/2006 Legearen zazpigarren xedapen gehigarriaren 8.garren atalak jasotzen duena kontuan izanik. Hirigintza, Obra eta Zerbitzuetako batzordeak 2009ko irailaren 30ean  egindako batzarraldian Haritz Salaberria, Jon Legorburu eta Iñigo Esnaolaren aldeko botoarekin eta Kepa Garbizu eta Roberto Sánchezen abstentzioarekin,

DIKTAMINATZEN DU

BAT: PAPRESA SAUk instalazioak handitzeko lur hiritargarri industriala klasifikatzeko eta sailkatzeko proposaturiko Hitzarmen Urbanistikoa onartzea.

BI: Alkatea hitzarmen hau izenpetzeko ahalmentzea."

Kepa Garbizuk jendaurrean abuztutik santakrutzera edukitzeak ez dela gardentasunaren eta parte-hartzearen abiapunturik onena. Bere ustetan, egingo ez den proiektu baten aurrean gaude, nahiko oztopo izango dituelako, besteak beste, gaur egun Papresa inguruan, N-1ean  kamioiekin izaten diren arazoak larriagotu egingo direlako.

Kepa Garbizuk kontraesanetan erortzea leporatu dio gobernu taldeari, lehen etxebizitzak egiteko ukitu ezina zen eremuan orain industriak egin nahi dituelako eta guztiz kontra datorrelako  PTS Agropecuario delakoari gobernu taldeak egindako alegazioekin.

Roberto Sanchezi egokia iruditzen zaio proposamena, eta aipatutako trafiko arazoak ondo konpontzea eskatu du. Dena den, bozketan abstenitu egingo dela esan du.

Alkateak Kepa Garbizuri erantzun dio, jendaurreko epea luzatzeko inongo eragozpenik ez dagoela, inork hala eskatuz gero. Dio proposatutakoak ez diola inguruko baserriko aktibitateari kalte egiten, kontsolidatu baizik, muga bat suposatzen duelako. Jada gaur kamioientzat erabiltzen duen eremua ordenatzen dela dio. Azpimarratu du Papresa enpresa berak eskatuta hasi dela espedientea. Eskualdean gaur egun dagoen enpresa garrantzitsuenetakoa da, kontratazio txukunak egiten dituena eta eskualdeko 300 familiari -tartean lezoar batzuei- lana ematen diena. Gaur egungo egoera ekonomikoan aintzat hartu beharreko eskaera dela dio alkateak.

Jesus Mari Martiarenak dio zergatik ez den jarrera berdina izaten Iberdrola eta beste enpresa batzuekin. Itzal bat dagoela honen atzean eta azalduko dela.

Diktamena bozkatu eta aldeko zazpi boto izan dira, kontrako hiru (Kepa Garbizu, Enrique Figueroa eta Jesus Mari Martiarena) eta abstentzio bat (Roberto Sanchez).   
 

3.- Lezoko Arau Subsidiarioen 107 Poligonoari dagokion antolakuntza xehatuaren elementuen aldaketa espedienteari behin betiko onarpena emateko diktamena (2009H0310002).

Jon Legorburuk, Hirigintza, obra eta Zerbitzuetako zinegotzi delegatuak eman ditu gaiaren inguruko azalpenak, poligonoko erabiltzaileek eskatu omen dituzte aldaketak.  Honela dio Hirigintza Batzordearen diktamenak:

"Lezoko Udalak 2009ko otsailaren 10ko Tokiko Gobernu Batzarrean, 107 Poligonoko Arau Subsidiarioen Antolaketa Xehekatuaren Elementuen aldaketa espedienteari haserako onarpena eman zion.

Akordio honen iragarkia Gipuzkoako Aldizkari Ofizialean argitaratu zen 2009ko martxoaren 2an  40 zenbakidun alean. Prentsa idatzian ere argitaratu zen iragarkia.

Espedientea jendaurrean 20 egunez egon ondoren ez zen alegazio edo erreklamaziorik aurkeztu.

Laburbilduz Arau Subsidiarioen Antolaketa Xehekatuko elementuen aldaketa honetan  proposatzen zen : 

1.- 107 poligonoa industria erabilerara xedatua dagoen eremu bat da, Plan Partziala, konpentsazio proiektua eta urbanizazio proiektua onartuak eta exekutatuak dituenak. Beraz egun lur hiritarra bezala sailkatu beharrekoa.

2.- 107 Plan Partzialak antolakuntza xehekatua du xedetzat. Horrela beste gauzen artean, lursailen kalifikazio xehekatua zehazten du. 107 poligonoko Plan Partzialaren bidez onartutako fitxa urbanistikoak desglosatzen ditu Arau Subsidiarioetan interes publikoko eta sozialeko zerbitzuetarako xedatutako 3.133 m² zabalerako lurzorua  honako modu honetan: 

  • 3 partzela 810 m² azalera duena erabilpen sozialera xedatua eta eraikigarritasuna 1.053 m²(t).
  • 4 partzela 810 m² azalerakoa erabilpen komertzialetara xedatua eta eraikigarritasuna 1.053 m²(t).
  • 5 partzela 1513 m² azalerakoa, kirol erabilpenetara xedatua eta aurreikusi gabeko eraikigarritasunarekin.

Plan Partzialeko Arau Subsidiarioetako 14. artikuluak  definitzen ditu erabilpen, domeinu eta eraikuntza baldintzak aipatutako partzeletarako hori zeharo bat datorrelarik partzela bakoitzeko fitxa urbanistiko indibidualetako definizioekin.  

Bestalde, Plan Partzialeko Arau Subsidiarioetako 14. artikuluak  seinalatzen ditu erabilpen bateragarriak definitutakoekin, hirugarren sektoreko erabilpenen aipamena eginez, lehentasuna erabilpen industrialari emanez. 

Dokumentu honen xedea 3 eta 5 partzeletan aurreikusitako erabilpenaren aldaketa egitea da, haietarako behatzen den eraikigarritasuna aldatu gabe. Aurreikusitako erabilpen aldaketa, logikoki, Planeamenduko Arau Subsidiarioetan proiektaturiko fitxa urbanistikoan definitutakoaren barruan bilduko litzateke goian seinalaturiko aldaketaren ondoren interes publiko eta sozialeko zerbitzutara xedatutako lurzoru gisa.  

Horrela, 3 partzela merkataritza erabilpenetara xedatuko litzateke gaur egun 4 partzela dagoen bezala eta 5 partzela parking erabilpenera xedatuko litzateke.

Behin betiko onarpenerako aldiz, Udalak egoki deritzo beste aldaketa  hauek ere sartzea:

1.- 3, 4 eta 5 partzelen kokapena aldatzea, euren azaleran aldaketarik gabea, Dokumentuaren 2 zenbakidun planoan jasotzen den moduan.

2.- Hirigintza araudian hirugarren sektoreko jardueretara xedaturiko eraikinentzat baldintza espezifikoak garatzea 107 poligonoko Plan Partzialeko VIII. Idazpurua eraikuntzari buruzko ordenantzetako zenbait artikulu osatuz.

AZTERKETA JURIDIKOA

2/2006 legearen bigarren xedapen iragankorra arabera  egiturazko antolamendu eta antolamendu xehatuko zehaztapenei buruz lege horretan ezarritako erregulazioa aplikatzekoa izango da, legea indarrean sartzen denetik aurrera, hau da 2006ko irailaren 20a,  indarrean dauden arau eta planetarako.

Horrela aipatu legearen 53 eta 56 artikuluek xedatzen dute egiturazko antolaketa eta antolaketa urbanistiko  xehekatua.

Aurkeztu den Antolaketa xehatuaren moldaketan, aldatzen diren zehaztapenak, hau da, tokiko  ekipamendurako lursailaren erabilera 56.1  artikuluaren  a) ataletan txertatu daiteke, partzelen kokapen aldaketa 56. 1 k) artikuluan eta eraikitze ordenantzen aldaketa 56. 1 g) artiluluan. Bestalde 57 artikuluak tokiko sistemen zuzkidura-sarea jasotzen du eta artikulu honetan xedatzen dena kontuan izanik bertan definitzen ditu sare hori integratzen duten elementuak. Horrela beraz, Planeamendu Arautegiaren tokiko sistemetarako estandar hertsiak aldaturik suertatu dira 2/2006 Legekoaren bidez, aurrekoak baino aukera gehiago behatzen dituelarik. 

Bestalde kontuan eduki beharrekoa da, arestian adierazi bezala, ezen, 107 poligonoaren urbanizazioa exekutatu delarik, gaur egun lurzoru hiritar kontsolidatu baten aurrean aurkitzen garela, eta beraz aldaketaren xedeak erabilpenaren aldaketa dakarrela, dotatze xedearen barruan, lurzoru hiritarraren bi partzelatan. 

Aldaketa puntualaren xede izango lirateke, beraz, Plan Partzialaren fitxa urbanistikoak 3 partzelari eta 5 partzelari dagozkienak, eta era berean aipatutako Planaren arautegi urbanistikoaren 13 eta 14 artikuluak. 

3, 4 eta 5 partzelen kokapena aldatzea, euren azaleran aldaketarik gabea, Dokumentuaren 2 zenbakidun planoan jasotzen den moduan  eta azkenik Hirigintza araudian hirugarren sektoreko jardueretara xedaturiko eraikinentzat baldintza espezifikoak garatzea 107 poligonoko Plan Partzialeko VIII. Idazpurua eraikuntzari buruzko ordenantzetako zenbait artikulu osatuz.

Bestalde dokumentuaren izapidetzeari dagokionean 2/2006 legearen 95, 96 eta 97  artikuluen eta 105/2008 Dekretuko 30 artikuluak xedatzen dutenaren arabera haserako onarpena eman ondoren  eta jendaurreko epea pasa ostean behin betiko onarpena udalari dagokio.

Hori ikusirik, Hirigintza, Obra eta Zerbitzuetako batzordeak 2009ko irailaren 30ean  egindako batzarraldian Haritz Salaberria, Jon Legorburu eta Iñigo Esnaolaren aldeko botoarekin eta Kepa Garbizu eta Roberto Sánchezen abstentzioarekin,

DIKTAMINATZEN DU

BAT: Lezoko Arau Subsidiarioen 107 Poligonoari dagokion antolakuntza xehatuaren elementuen aldaketa espedienteari behin betiko onarpena ematea.

BI: Akordio hau eta aldaketaren ondorioz onarturiko hirigintza araudi berriaren testua Gipuzkoako Aldizkari Ofizialean argitaratzea.

HIRU: Akordio hau prentsa idatzian argitaratzea.

LAU: Akordio hau Plan Orokorra idazten ari den lan taldeari jakinaraztea."

Kepa Garbizuk dio ez dutela eragozpenik diktamena onartzeko. Poligonoko kaleen izenak ez direlako azaltzen kexatu da, Makurren kalea dela gogoratuz. Diktamena euskara hutsean jaso delako ere kexatu da.

Diktamena onartzearen alde zazpi boto izan dira, aurkako botorik ez eta lau abstentzio (Kepa Garbizu, Enrique Figueroa, Jesus Mari Martiarena eta Roberto Sánchez). Beraz, osoko bilkura osatzen duten zinegotzien gehiengoaren aldeko botoarekin onartu da Arau Aldaketa.

Irati Aranburuk eta Urko Lopetegik alkateari adierazi diote bilkuratik alde egingo dutela eta hala egin dute.

Jesus Mari Martiarena ere gai zerrendako 4. gaia eztabaidatu eta bozkatu bitarte ere bilkuratik alde egingo duela azaldu dio alkateari. Honek ere bilkuratik alde egin du.

4.- 6. poligonoko Eraberritze Urbanistikoaren Plan Bereziaren Testu bateratuaren  behin betiko onarpena emateko diktamena  (2008H0400002).

Jon Legorburuk, Hirigintza, Obra eta Zerbitzuetako zinegotziak azaldu du gaia. Aspaldiko arazoari irtenbidea emango dion plana dela dio: baserrietarako bidea egingo delako, poligono barreneko urbanizazioaren erregulazioa egingo delako eta jarduera industriala kontrolpean izango delako.

Honela dio diktamenak:

"Lezoko Udalak, 2008ko irailaren 9ko Tokiko Gobernu Batzarraren ebazpenaren bidez, hauxe erabaki zuen: Lezoko Planeamenduko Arau Subsidiarioen 6. Industrialdeko Eraberritze Urbanistikoaren Plan Bereziari hasierako onarpena ematea.

Erabaki horren iragarkia Gipuzkoako Aldizkari Ofizialean argitaratu zen 2008ko irailaren 16an, 177 zenbakidun alean, eta baita prentsa idatzian ere.  Bestalde, Plan Bereziaren testua eta dokumentazio grafikoa Lezoko web orrian argitaratu ziren.

Jendaurreko epean hiru alegazio aurkeztu ziren, hain zuzen ere, Iñigo Arruti Narbaizak, Transportes Tic, S.A.ren izenean, Josu Pikabea Lertxundik, Lezoko Ekologia Taldearen izenean, eta Ralf Michael Marenkek aurkeztutakoak.

Era berean, hasierako onarpena jaso zuen Plan Bereziaren kopia digitalizatua bidali zen Eusko Jaurlaritzako Ur Agentziara eta Gipuzkoako Foru Aldundiko Bide Azpiegitura Departamentura.

Azken honek aldeko txostena egin zuen eta Ur Agentziak, aldiz, aurkakoa.

Beraz, eta Ur Agentziak idatzitako txostenaren edukia kontuan hartuta, aldaketa batzuk egin ziren hasierako onarpena jaso zuen Plan Berezian.

Erabakia jendaurrean egon zen bitartean, bilera bat egin zen 6. Industrialdeko hainbat jabe eta kalteturekin, hau da, baserri mugakideetako bizilagunekin. Bilera hori 2008ko urriaren 27an egin zen Lezoko Udaletxeko Osoko Bilkuren Aretoan, eta Plan Bereziaren nondik norakoak azaldu ziren. 

Lezoko Udalak, 2009ko apirilaren 27ko D09/00316 zenbakidun alkatetza-dekretuaren bidez, hauxe erabaki zuen: Lezoko Planeamenduko Arau Subsidiarioen 6. Industrialdeko Eraberritze Urbanistikoaren Plan Bereziaren Testu Bateginari hasierako onarpena ematea eta Plan Bereziaren Testu Bategina, Gipuzkoako Aldizkari Ofizialean eta zabalpen handieneko egunkarian edo egunkarietan argitaratu ondoren, jendaurrean berriro jartzea 20 egunetan, interesa zuten pertsona guztiek aztertzeko eta egokitzat jotzen zituzten alegazio guztiak aurkeztu ahal izateko. 

Erabaki hori 2009ko maiatzaren 6ko Gipuzkoako Aldizkari Ofizialean, 82. zenbakidun alean, eta prentsa idatzian argitaratu zen, eta jendaurreko epean bi alegazio aurkeztu ziren, hain zuzen ere, Josu Pikabea Lertxundik, Lezoko Ekologia Taldearen izenean, eta Iñigo Arruti Narbaizak, Transportes Tic, S.A.ren izenean, aurkeztutakoak.

Narbaizak informazio epea zabaltzea eskatu zuen. Lezoko Udalak, 2009ko maiatzaren 25eko 364/09 zenbakidun alkatetza-dekretuaren bidez, eskaera onartu eta 2009ko ekainaren 19ra arte luzatu zuen aipatutako epea. Erabaki hori 2009ko ekainaren 2ko Gipuzkoako Aldizkari Ofizialean, 100. zenbakidun alean argitaratu zen.

Halaber, Lezoko Udalak, 2009ko ekainaren 18ko 414/09 zenbakidun Alkatetza Dekretuaren bidez, Plan Bereziaren jendaurreko epea 2009ko uztailaren 17ra arte berriro luzatzea erabaki zuen.

Esan beharra dago, jendaurreko epearen bi luzapen horiek, Lezoko Udaletxeko Osoko Bilkuren Aretoan udal ordezkari tekniko eta politikoen eta 6. industrialdeko jabe gehienen, hau da, Transportes Tic, S.A.ren artean egindako bileren ondorio direla.

2009ko uztailaren 17an, Transportes Tic, S.A.k 6. Industrialdeko Eraberritze Urbanistikoaren Plan Bereziaren Testu Bategina ordenatzeko proposamen alternatibo bat aurkeztu zion Lezoko Udalari.

Luciano Pagaegik, garai hartan Eraberritze Urbanistikoaren Plan Bereziaren eta Testu Bateginaren idazleak, ingurumen aholkularitzak eta Lezoko Udaleko Hirigintzako Teknikariak aipatutako proposamenari buruzko txostena egin dute.

Txosten horien edukia eta 2/2006 Legearen 85., 97. eta 95. artikuluak kontuan hartuta, Alkatetzak uztailak 29ko 478/09 Dekretuaren  bitartez, besteak beste, erabaki zuen:

"LEHENA: Transportes Tic, S.A.k aurkeztutako alegazioa aintzat hartzea, hiri antolamendu berrian oinarrituta, eta betiere honako baldintza hauek kontuan hartuta:

1.- Aurreikusitako Sistema Lokalek 2/2006 Legearen 79. artikuluak -Lege horren beraren 57. artikuluarekin eta Premiazko Neurriei buruzko 105/2008 Dekretuaren 17. artikuluarekin lotuta dago- ezarritako gutxieneko baldintzak bete beharko dituzte.

2.- 6. Industrialdeko Eraberritze Urbanistikoaren Plan Berezian kontuan hartuko dira Ekogarapen, S.L. ingurumenari buruzko aholkularitza enpresak Lezoko Udalaren eskariz egindako txostenean proposatutako neurri zuzentzaileak, ikatza eta txatarra edo antzekoak biltzeari dagokionez.

3.- Emandako baimenak atzera bota izanagatiko kalte ordainak jasotzeko eta lagatako lursailak itzuliak izateko eskubideak Plan Bereziaren zehaztapenetatik kanpo daude, eta beste bide administratibo batzuetan ebatzi beharko dira.

4.- Industrialdearen urbanizazioaren ebaluazio ekonomikoa urbanizazio berriaren ondorioz sortuko diren eremu publiko berrietara egokitu beharko da.

5.- Jarduketa Sistema Hirigintzako Jarduketa Programan definitu beharko da.

6.- Urbanizazio pribatua eta industria lursail pribatu ez-eraikigarria mantentzea jabearen ardura izango da; antolamendu berriaren ondorioz sortuko diren jabetza publikoko lursailak, berriz, Lezoko Udalak mantendu beharko ditu.

7.- Hala Plan Bereziaren Testu Bateginean nola alegazioan aurkeztutako ordezko antolamenduan aurreikusitako bidearen ipar-mendebaldeko mugaren inguruko trazatua aldatu egingo da; horrenbestez, bidea Transportes Tic, S.A.k duen putzu edo urmaelaren ondotik joango da, eta ez industrialdearen mugatik.

8.- "Bide-alde" etxea eta hari atxikitako lursaila jarduketa isolatutzat hartuko da.

BIGARRENA: Lezoko Planeamenduko Arau Subsidiarioen 6. Industrialdeko Eraberritze Urbanistikoaren Plan Bereziaren Testu Bategina berriz ere onartzea, aintzat hartutako alegazioaren aldaketak eta goian adierazitako baldintzak kontuan hartuta. Hala, aldaketa eta baldintza horiek bertan behera utzi eta ordezkatu egingo dituzte haiekin kontraesanean dauden 6. Industrialdeko Eraberritze Urbanistikoaren Plan Bereziaren Testu Bateginaren edukiak."

Akordio honen iragarkia Gipuzkoako Aldizkari Ofizialean argitaratu zen 2009ko abuztuaren 7ko 147 zenbakidun alean. Prentsa idatzian ere argitaratu zen akordio hau, eta Planaren edukia Lezoko Udalak duen Web orrian ere ikusgai egon da. Plan Bereziaren Testu Bategina, goian azaldutako aldaketak eta baldintzak behin ezarrita, jendaurrean egon da  20 egunetan, interesa duten pertsona guztiek aztertzeko eta egokitzat jotzen dituzten alegazio guztiak aurkezteko aukera izan zezaten.

Horrela jendaurrean egon den epean bi alegazio aurkeztu dira, biak Transportes Tic, SAUren izenean aurkeztuak, bata abuztuaren 19an eta bestea 31an.

Abuztuaren 19an aurkezturiko alegazioan, Transportes Tic, SAUk eskatzen du, Lezoko gainontzeko industri poligonoetan bezala, plan bereziak aurreikusten dituen 15.395 m² eraikigarrietan, eraikitako azaleraren %30 okupazioa izango duten  solairuartekoak egiteko aukera izatea.

Eskatzen dutena jada aurreikusita dago onartu eta jendaurrean jarritako Plan Bereziaren azken testu bateginean, beraz alegazioa onartzea proposatzen da.

Abuztuaren 31ean aurkezturiko alegazioa, onarturiko Plan Bereziaren azken testu bateginari jarri zitzaizkion ingurumen alorreko baldintzei buruzkoa da. Alegazio honi Lezoko Udaleko ingurumen aholkulariak eginiko txostenean adierazten dena aintzat hartu beharko litzateke.

Beraz, Hirigintza, Obra eta Zerbitzuetako batzordeak 2009ko irailaren 30ean  egindako batzarraldian Haritz Salaberria, Jon Legorburu eta Iñigo Esnaolaren aldeko botoarekin eta Kepa Garbizu eta Roberto Sánchezen abstentzioarekin,

DIKTAMINATZEN DU

BAT: 6. Industrialdeko Eraberritze Urbanistikoaren Plan Bereziaren Testu  behin betiko onarpena ematea, ondorengo baldintzekin:

1.- Transportes Tic, SAUk, abuztuaren 19an aurkezturiko alegazioa onartzea.

2.- Transportes Tic, SAUk, abuztuaren 31 aurkeztu duen alegazioa onartzea, Lezoko Udaleko Ingurumen Aholkulariak idatziriko txostenean jasotzen diren baldintzekin. Baldintza hauek 6. Industrialdeko Eraberritze Urbanistikoaren Plan Bereziaren testuan txertatuko dira.

BI: Akordio hau eta Plan Bereziaren Hirigintza Araudiaren  testua Gipuzkoako Aldizkari Ofizialean argitaratzea.

HIRU: Akordio hau prentsa idatzian argitaratzea.

LAU: Akordio hau Plan Orokorra idazten ari den lan taldeari jakinaraztea."

Kepa Garbizuk dio aurrerapauso inportante eta txalotzekoa dela. Dena den, akats batzuk badituela, ez delako bateragarria idazten ari den hirigintza plan orokorrarekin eta ez datorrelako guztiz bat onartutako hitzarmen testuarekin. Dena den, alde bozkatuko dutela dio.

Roberto Sanchezek dio ez duela bat egiten ez proposamenaren helburuekin, ez prozedurarekin ezta azaltzeko moduarekin ere. Bere ustetan, benetako aukera Algeposa hortik kentzean datza eta, ez plan honek egingo duen moduan, bertan egonkortzean. Dio gobernu taldeak ez duela inolako estrategiarik gai honetan. Jon Legorbururen iritziz, ezjakintasunetik egindako kritika izan da hori.

Alkateak dio proposamena bateragarria dela idazten ari diren plan orokorrarekin, ez duelako oztopatzen han aurreikusitako etxebizitzak eraikitzeko esparrua.

Gaiaren inguruan eztabaida izan ondoren, bozkatu egin da diktamena eta onartu egin da aldeko zazpi botorekin eta aurkako boto batekin (Roberto Sanchez).

Hurrengo gaiarekin hasi baino lehen, Jesus Mari Martiarena zinegotzia sartu da berriz bilerara.
 

5.- Kirol, kultura eta gazteria zinegotzi delegatuaren dedikazio partziala aldatzeko diktamena (2009PE100005).

5.- Kirol, kultura eta gazteria zinegotzi delegatuaren dedikazio partziala aldatzeko diktamena (2009PE100005).

 

Alkateak azaldu du gaia. Honela dio Barne Batzordean onartutako diktamenak:

"Udal Osoko Bilkurak 2009ko ekainaren 19an egindako bilkuran, Kirol, Kultura eta Gazteria Delegatua den Iñigo Esnaola Arbizaren egun erdiko dedikazio partziala onartu zuen.

2009ko irailaren 16an, Iñigo Esnaola Arbizak, egun duen dedikazioa eta lan jarduna %23ra jaistea eskatu du. Lan jardunaren murrizketa 2009ko irailaren 16an sartuko litzateke indarrean eta 2010eko apirilaren 30a bitarte iraungo luke, berriro ere 2010eko maiatzaren 1ean egun indarrean duen lan dedikaziora itzuliz, hau da %50era.

Barne Batzordeak, 2009/09/30an egindako bileran, Haritz Salaberria eta Jon Legorbururen botoa alde dela eta Roberto Sánchezen  abstentzioarekin, hurrengo akordioa diktaminatu du, osoko bilkurak onar dezan:

BAT: Ontzat hartzea, Kirola, Kultura eta Gazteria zinegotzia den, Iñigo Esnaola Arbizaren dedikazioa eta lan jardunaren murrizketa. Lan jardunaren murrizketa 2009ko irailaren 16an sartuko litzateke indarrean eta egin beharreko lanaldia %23koa izango da. 

Aipatu dedikazio murrizketa 2010eko apirilaren 30a bitarte iraungo luke, berriro ere 2010eko maiatzaren 1etik aurrera egun duen %50era itzuliz.

BI: Akordio honen berri ematea interesatuei.

HIRU: Erabakiaren aurkako errekurtsoak:

a) Auzitara jo aurretik, eskatzaileak, hala nahi izanez gero, erabakia berraztertzeko errekurtsoa aurkez dezake 30/1992 Legearen arabera.

  • Horretarako, hilabeteko epea dauka, erabaki honen jakinarazpena jaso eta biharamunetik hasita.
  • Errekurtsoa aurkeztekotan Osoko Bilkurara jo behar da.

b) Bestela, administrazioarekiko auzi-errekurtsoa aurkez dezake zuzen-zuzenean.

  • Horretarako, bi hilabeteko epea dauka, erabaki honen jakinarazpena jaso eta biharamunetik hasita.
  • Errekurtsoa aurkeztekotan, EAEko Auzitegi Nagusiko administrazioarekiko auzitarako Donostiako epaitegira jo behar da."

Bozkatu eta diktamena onartu egin da: bost boto izan ditu aldeko eta lau abstentzio (Kepa Garbizu, Enrique Figueroa, Jesus Mari Martiarena eta Iñigo Esnaola). 

6.- 2009ko aurrekontua aldatzeko diktamena: Transferentziak 030007/2009 espedientea. (2009KO020004).

Alkateak azaldu du gaia. Honela dio Ogasun Batzordean onartutako diktamenak:

"Kreditu Aldaketaren espedientea egiten ari denez, 2009ko aurrekontuko gastuen aurrekontuko partiden arteko kreditu transferentziaz, 2009ko irailaren 7ko  D09/00550 dekretuaren bidez hasia, Kontuetako eta Ogasun batzordeak, 2009ko irailaren 30ean egindako bilkuran,  Haritz Salaberria, Jon Legorburu, Iñigo Esnaola eta Roberto Sánchez zinegotzien aldeko boto ponderatuekin eta Kepa Garbizu zinegotziaren abstentzioarekin, behean heldu den proposamena diktaminatu du osoko bilkurak onar dezan:

BAT: Kreditu Aldaketarako espedientea onartzea, gastuen aurrekontu partida batzuen artean kreditu-transferentziarengatik identifikazio zk. 30007/2009, 2009-09-07koa eta zenbatekoa 11.025€."

Diktamena onartu egin da aldeko sei boto eta hiru abstentzio (Kepa Garbizu, Enrique Figueroa eta Jesus Mari Martiarena).

7.- 2008ko kontu orokorraren behin betiko onespena emateko diktamena (2009KO080001).

Alkateak Ogasun batzordearen diktamena onartzea proposatu du. Honela dio diktamenak:

"Kontu eta Ogasuneko batzordearen lehendakariak eman du 2008ko Kontu Orokorraren espedientearen berri.

Espediente hori jendearen ezagutzarako ipinirik egon da araututako epean, eta inolako erreklamaziorik ez da haren aurka aurkeztu.

Beraz, kontu batzordeak espedientearen aldeko informea eman du hura behin-betiko onartzeko."

Diktamena onartu egin da: alde zortzi boto izan dira eta abstentzio bat (Roberto Sánchez).

8.- Alkatearen, Organo Kolegiatuetako udal-ordezkarien eta delegatuen txostenak.

Alkateak Oarsoaldea Garapen Agentziak abiatu berri duen Plan Estrategikoa burutzeko proiektuaren nondik norakoak azaldu ditu.

Jon Legorburuk egingo diren zenbait lanen berri eman du: Jaizkibel hiribideko autobus geltoki ingurua txukundu egingo da, Karlos Saldiseko plazako obrak azaroa bukaerako bukatuko dira, Guillermo de Lazon kalekoak azaroaren erdirako; eguneko zentroko lanak gaur hasi dira; Postetxea txukuntzeko lanak ere hasi dira eta abendu erdirako zerbitzua berriz martxan izango da, bi urtez itxita egon ondoren; Hirigintza plan orokorra abendurako egongo da prest.

Alkateak udal aurrekontuko kreditu aldaketa batzuen berri eman du (2009ko finantza eta aurrekontuan arloko informazioa, 2009KO01001, 2009KO01002, 2009KO09005, 2009KO09006, 2009KO09007 eta 2009KO09008). Halaber alkateak Gizarte Zerbitzuetako batzordeak irailaren 9an egin zuen bileraren berri eman du: alde batetik, bi langile berriren aurkezpena egin zen, gizarte zerbitzuetako arduradun berriarena, Olatz Alberdi eta gizarte langile berriarena, Eneritz Beloki. Eta bestaldetik, berdintasun plana egiteko asmoaren xehetasunak azaldu ziren.

Euskara gaiei dagokienez, alkateak dio herritarren partaidetzarako batzordeak jada 4. bilera egin duela eta Lezoko Euskara Biziberritze Plana abenduko plenorako aurkeztuko dela.

Iñigo Esnaolak dio Musika Eskolako Barne Araudia ari direla lantzen eta, ahal bada, abenduko bilkurarako aurkeztuko dela. Kirol arloan herritarren parte-hartzea bultzatu nahian, kirol eguna prestatzen ari direla abendurako; eta kiroldegia eta igerilekuak kudeatzen dituen Serviocio enpresak udalean aurkeztu dituen kontu auditatuen berri eman du. Kulturan, gabon inguruko ekitaldi eta festak prestatzen ari direla dio, Elias Salaberria lehiaketaren historiaren inguruko liburua idazteko, jai batzordearen funtzionamendu araudia zehazteko eta Mañontzi bertso eskola indartzeko ahaleginean dabiltzala ere.

9.- Galde-eskeak.

1.- Alkateak Kepa Garbizuk eginak dituen galderetako batzuen erantzunak idatziz pasa dizkio. Kepa Garbizuk dio eginda dituen galderetatik gutxi batzuen erantzuna jaso duela baina, hala ere, eskertu egin ditu.

2.- Jesus Mari Martiarenak galdetu du itzultzailea baja dagoenetik itzulpenak nola egiten diren eta hala egiteko diru kontsignaziorik badagoen udal aurrekontuetan.

Alkateak dio euskara dinamizatzaile eta kanpoko enpresa baten bidez egiten direla, eta euskara zerbitzua aztertzen ari dela nola segi lan hauekin.

3.- Kepa Garbizuk dio korporazioari ez zaiola informaziorik eman udal organoetan izan diren aldaketen inguruan.

Aktaren amaiera.

Beste aztergairik geratzen ez denez, alkate-lehendakariak 21:00etan eman dio buru bilkurari. Eta nik, idazkari naizen aldetik, akta 761.150.etik  761.161.era arteko zenbakiak dituzten orri ofizialetan jaso eta horren guztiaren fede ematen dut,  eta bilkuran izan diren zinegotzi guztiek izenpetu egin dute akta hau.


 

link 2009.eko Uztailaren 30ekoa
Data:2009-07-30
Agiri mota: Osoko Bilkuraren akta
Lasterbideak:
Mamia:

Lezoko Udaletxeko Biltzar Areto Nagusian, 2009ko uztailaren 30, 17:00etan, eratu da OSOKO UDALBATZA, EZOHIKOA egiteko xedez, lehen deialdian, Haritz Salaberria Goikoetxea alkatearen lehendakaritzapean eta ondorengo zinegotzi hauek bertan direla: Jon Legorburu Arrastua, Iñigo Esnaola Arbiza, María Pilar Legorburu Echegaray, Urko Lopetegi Campano, Jaione Lekuona Irazusta, eta Roberto Sánchez Sánchez.

Ez dira etorri: Irati Aranburu Salaberria, Kepa Garbizu Azkue, Enrique Figueroa Laboa, Jesús María Martiarena Jaca eta Miguel Antonio Arrizabalaga Brusín

Bertan da eta egintzaren fede eman du udal idazkari lanetan Aitor Iztuetak.

Alkate-lehendakariak osoko bilkurari hasira eman behar dionean Roberto Sánchezek eten egin du aurkezpena. Minutuko isilunea eskatzen du Mallorkan gertaturiko bi guardia zibilen hilketa dela eta.

Alkateak adierazten du erabat errespetatzen duela isilunea eta nahi duenak egin dezala, dena den argitzen du bestelako hilketak gertatzen direnean ez dela isilunerik egiten, baino egin nahi duenak egiteko eskubidea izango duela eta eskubide hori errespetatuko zaiola ere zehazten du.

Osoko bilkurari hasera eman aurretik Kepa Garbizu zinegotziak gaurko datarekin sarturiko idatzi baten berri ematen du Alkateak. Idatzi horretan ohiko bilkura izanik, bilkura hau orduz eta egunez kanpo deitu izana eta "Alkatearen, organo kolegiatuetako  udal-ordezkarien  eta Delegatuen txostenak " izeneko puntuak gai zerrendatik kentzeko eskubide ez duela adierazten du Kepa Garbizuk, besteak beste.

Alkateak argitzen du osoko bilkura hau ezohikoa dela, deialdian, akats baten ondorioz, "ohikoa" jartzen badu ere. Horrela idazkari lanetan ari denari galdetzen dio, ia ondoriorik izan dezakeen osoko bilkura hau, akats hori dela eta, aurrera eramateak hartzen diren akordioekiko.

Idazkari lanetan ari denak, lehenik eta behin barkamena eskatzen du akats honengatik eta  adierazten du egitatezko akats baten aurrean gaudela eta ez zuzenbidezko akats baten aurrean, beraz Administrazio Prozeduraren Legean adierazten den bezala egitatezko akats hauek edozein unetan zuzen ditzake administrazioak. Bestalde ezinezkoa da osoko bilkura hau ohikoa izatea, hain zuzen ere Lezoko udalbatzaren erabakia delako osoko bilkurak bi hilabetez behin, hilabete bikoitietan eta hilabeteko lehen astean izango direla, eta kasu honetan ez da  baldintza hauetako bat bera ere ematen. Hortaz gaurko osoko bilkura ohikoa izendatzea, gaurko eguna igandea izendatzea bezain besteko akatsa da eta bi kasuetan  ezinekoa .

Akatsa zuzendu ondoren eta gaurkoa ezohiko osoko bilkura dela  argi utzi ondoren, normaltasunez burutu daiteke bilkura  eta adierazitako arraioengatik erabat legezkotzat jotzen da.

1.- Aurrekontuaren aldaketa proposamena. Kreditu gehigarriak 00001-2009 (2009KO050001).

 

Lehen puntua hau tratatu aurretik urgentzia bozkatzea proposatzen da. Urgentziaren motibazioa honetan datza: aurrekontu aldaketa hau gaur hasten da izapidetzen eta aurrekontu orokorra onartzeko tramitazio berdina duenez , onarpena gauzatu ahal izateko jendaurreko epea eta guzti pasa behar du. Horrek derrigorrez luzatuko du tramitazioa eta aurrekontu aldaketa besteak beste S-1 sektoreko urbanizazioaren bigarren faseari ekiteko denez, hain zuzen gaurko osoko bilkurako bigarren puntua, lehen bai lehen onartzea komeni da obrari ekiteko.

Urgentziaren aldeko bozka ematen dute, zinegotzi guztiek Roberto Sánchezek izan ezik, honek abstentzioaren alde egin baitu.

 

Udala honen 2009ko ekitaldiko Aurrekontuaren barnean kreditu gehigarrien bidez kredituak aldatzeko izapidetzen den espedientea aztertu dugu

Aurrekontu partidetako kredituak gehitzeko proposamenak eta hauek finantzatzen dituzten baliabideak, eta txostenak, ziurtagiriak eta aipatutako agirian egindako gainerako jarduerak ere aztertu ditugu.

Gastuak burutzeko premia larria eta aipatutako gehikuntzak finantzatzen dituzten baliabideen eraginkortasuna behar bezala egiaztatuta geratu da eta kreditu aldaketa hori Aurrekontuaren garapena arintzeko eta eragiten dien zerbitzuen kudeaketa hobetzeko mesedegarria izango da.

Halaber, Kontuhartzaileak egin duen txostena ikusi ondoren, non jasota gerarazi baitu aipatutako espedientea aplikagarria zaion legezko araudiari egokitzen zaio.

Batzorde honek aipatutako espedientearen aldeko txostena eman eta bidezkotzat jo du Udalbatzarrak, kreditu gehikuntzen 4.322.821,22€ zenbatekoaz eta hauek finantzatzen dituzten baliabideen kopuru berdinean eta proposamenetan ageri den xehe-kapen berarekin. Aldeko bozka eman dute, zinegotzi guztiek Roberto Sánchezek izan ezik, honek abstentzioaren alde egin baitu.

2.- S-1 Sektoreko Urbanizazio Proiektuaren 2. faseko obrak kontratatzeko espedienteari hasiera eman eta Baldintza Plegua onartzeko proposamena (2009H0120001).

 

Puntu hau hau tratatu aurretik urgentzia bozkatzea proposatzen da. Urgentziaren motibazioa honetan datza:  S-1 sektoreko urbanizazioaren lehen fasea amaitzear da eta bigarrenari ekitea derrigorrezkoa da eremu horren exekuzioak aurrera egingo badu, horrela fase bat bukatu eta bestea ahalik eta azkarren hastea komeni da.

Urgentziaren aldeko bozka ematen dute, zinegotzi guztiek Roberto Sánchezek izan ezik, honek abstentzioaren alde egin baitu.

Jon Legorburuk gaia azaltzen du.

 

Lezoko Udalak 2006ko maiatzaren 22ko Tokiko Gobernu Batzordearen akordioaren bitartez S-1 Sektoreko Hiritartze Proiektuari behin betiko onarpena eman zion.

S-1 Sektorean etxebizitzak eraikiko direnez hiritartze proiektua faseetan gauzatzea zela zentzuzkoena erabaki zen. Horrela, Hiritartze Proiektu honi behin betiko onarpena eman ondoren, obra hauei zegokien lehen fasea onartu zen. Orain lehen fase amaitzear dagoela, bigarren fasearekin ekiteko garaia iritsi da.

Obra hauek Injelan, SLko ingeniaria den Antton Jaime Ugartek idatziriko Hiritartze Proiektuaren  arabera egingo dira. Bigarren faseari dagokion proiektua ere Antton Jaime berak idatzia da.

Kontratu hau Arlo Publikoko Kontratuen (APK) 30/2007 Legearen 6 artikuluan aurreikusitako obra kontratu bat da, beraz APK30/2007 Legearen lehen liburuan aurreikusitakoa kontuan izateaz gain, bigarren liburuaren I tituluan xedaturikoari ere jarraitu behar diogu.

Espediente motari dagokionez, ohikoa bezala  tramitatzea egoki irizten diot, presazkoa bezala izapidetzeko inongo arrazoi objektiborik ez dagoelako. Gainera lehiakortasuna murriztu baino ez luke egingo kasu honetan presazkoa kontratua izapidetzeak.

AKP 30/2007 Legearen 122., artikuluan ezarrita dagoenez, kontratu honen  esleipena egiteko jardunbide irekia, mugatua edo negoziatua erabili daiteke. Jardunbide irekian interesdun enpresari orok aurkez dezake proposamena, jardunbide mugatuan berriz Administrazioak espresuki hautaturiko enpresariak soilik aurkez dezakete proposamena, aurretik eskaera egin ondoren eta jardunbide negoziatuan enpresari desberdinekin negoziazio eta kontsulta egin ondoren Administrazioak hautaturiko enpresariari esleituko zaio. 154 eta 161 artikuluak xedatzen dutena kontuan izanik prozedura negoziatua baztertu egin beharko genuke.

Kontratu mota hau batere konplexua ez denez aipatu legearen 141 eta ondorengo artikuluan aurreikusitako jardunbide irekia erabiltzea aukeratu dut  osatu dudan administrazio-baldintza  zehatzen agirian. Dena den jardunbide mugatua ere posible da eta aukerazkoa da.

APK30/2007 Legearen 122, 126, 141 eta hurrengo   artikuluek xedatutakoarekin bat etorriz 2009ko uztailaren 30ko Hirigintza, Ingurumen, Obra eta Zerbitzuetako Batzordeak, Jon Legorburu, Haritz Salaberria eta Iñigo Esnaolaren aldeko botoarekin eta Kepa Garbizuren  Abstentzioarekin

DIKTAMINATZEN DU:

BAT:  S-1 Sektoreko  Hiritartze proiektuaren bigarren fasearen proiektua onartzea ondorengo baldintzekin:

1.- Onartzen den proiektua 2009ko uztailaren 30an sarrera emandakoa da, hain zuzen ere, Raimundo Mendiburu Abad, udal arkitekto aholkulariak uztailaren 27an egindako txostenaren eranskinean adierazitako aldaketak jasotzen dituena.

BI: S-1 Sektoreko  Hiritartze proiektuaren bigarren faseari dagozkion obren kontratazio espedientea hastea, lehiaketa ireki jardunbidearen bitartez.

HIRU: S-1 Sektoreko  Hiritartze proiektuaren bigarren faseari dagozkion obren kontratua arautuko duten Baldintza pleguak onartzea, ondorengo aldaketekin:

1.-   "3. Kontratuaren Prezioa" deritzon atalean Lizitazio prezioa BEZ GABE 2.283.490,31 € izango da.

2.- Kontratistei aurkezteko eskatzen zaien klasifikazioan, A taldean, 1 azpitaldean, kategoria b) izan beharrean c) izango da, aurrekontu igoerak klasifikazioaren aldaketa ekarri baitu.

LAU: Kontratu honetarako gastua onartzea.

BOST: Akordio hau obra hauen gastuari aurre egiteko derrigorrezkoa den aurrekontu gordailua kontratuaren behin betiko esleipena baion lehen izatera baldintzatzea da.

Alkateak proposatuta halaber, osoko bilkurak onartu du behin behineko esleipena eta behin betiko esleipena Tokiko Gobernu Batzarrari delegatzea. Aldeko bozka eman dute, zinegotzi guztiek Roberto Sánchezek izan ezik, honek abstentzioaren alde egin baitu.

 

Aktaren amaiera.

Beste aztergairik geratzen ez denez, alkate-lehendakariak 17:30etan eman dio buru bilkurari. Eta nik, idazkari naizen aldetik, akta 761.142.etik 761.145.ra arteko zenbakiak dituzten orri ofizialetan jaso eta horren guztiaren fede ematen dut,  eta bilkuran izan diren zinegotzi guztiek izenpetu egin dute akta hau.


 

link 2009.eko Uztailaren 3ekoa
Data:2009-07-03
Agiri mota: Osoko Bilkuraren akta
Lasterbideak:
Mamia: 

Lezoko Udaletxeko Biltzar Areto Nagusian, 2009ko uztailak 3, ostirala, 18:15etan, eratu da OSOKO UDALBATZA, EZOHIKOA egiteko xedez, lehen deialdian, Haritz Salaberria Goikoetxea alkatearen lehendakaritzapean eta ondorengo zinegotzi hauek bertan direla: Jon Legorburu Arrastua, Iñigo Esnaola Arbiza, María Pilar Legorburu Echegaray (bilera hasi eta gero etorri da), Urko Lopetegi Campano, Jaione Lekuona Irazusta, Kepa Garbizu Azkue, Enrique Figueroa Laboa eta Roberto Sánchez Sánchez.

Ez dira bileran izan Irati Aranburu Salaberria, Miguel Antonio Arrizabalaga Brusín eta Jesús María Martiarena Jaca. Azken hau, bilera aretoan izan da 18:00ak geroztik, baina atzerapena zela eta, alde egin du.

Bertan da eta egintzaren fede eman du udal idazkaria den Xabier Loiolak.

Alkateak barkamena eskatu du berandu hasi izanagatik. Maria Pilar Legorburu bidean omen da eta hura etorri zain egon delako atzeratu omen da Plenoaren hasiera.

Baita ere dio aparteko deialdia egin dela, deialdia ondoren diktaminatu diren proposamenekin, gai zerrendako gaiei azkar erantzun nahi zaielako. Deialdiko proposamenak aztertzeko eta bozkatzeko batzordeak egin direla dio alkateak, atzo Ogasun batzordea eta gaur Hirigintzakoa. Batzordeek proposamenak aldaketarik gabe onartu dituela dio alkateak. Azalpen hau ematen ari dela sartu da bilkuran Maria Pilar Legorburu zinegotzia. 

Kepa Garbizuk dio bere iritzia idatziz eman duela eta batzordeen diktamenak ez duela ezertarako balio, diktamena dagoenik ezin dela ere aipatu.

Alkateak dio proposamen bakoitzaren urgentzia bozkatu dela gaurko bilkuran, proposamenekin egin zelako deialdia, nahiz eta batzordeek bere oniritzia emana izan gaurko bilkura honen aurretik. Gogoratu dio Kepa Garbizuri alkate zen garaian egin zituela honelakoak.

Kepa Garbizuk dio urgentziaren arrazoia oporrak gainean izanik eta urte sasoi horretan erabaki batzuk beharrezko duten gehiengo osoa biltzea zailagoa duelako alkateak. Alkateak esan dio opor garaia gertu badago ere gaur erabakitzera ekarri diren gaiak lehen bai lehen atera behar direlako direla urgenteak.

1.- Lezoko AA.SS 27 zenbakidun aldaketaren formulazioa eta parte hartze programa onartzeko proposamena, Papresa, SAUren instalazioak handitzeko lur hiritargarri industriala klasifikatzeko eta sailkatzeko. (2009HO310003)

 

Alkateak azaldu du urgentziaren arrazoia, espedientea lehen bai lehen beste erakundeetara bidaltzea dagozkion txostenak egin ditzaten.  Kepa Garbizuk galdetu du zein arrazoi dagoen gaia urriko bilkurarako ez uzteko, deialdia egin zenean diktaminatu gabe zegoelako. Alkateak dio gaur goizean egin den Hirigintza Batzordean onartu dela diktamena.

Dena den gaiaren urgentzia bozkatu da eta onartu egin da aldeko sei botoekin eta aurkako hiru botoekin (Kepa Garbizu, Enrique Figueroa eta Roberto Sánchez).

 

Jon Legorburuk, gaur Hirigintza batzordean diktaminatutako proposamena azaldu dio osoko bilkurari. Honela dio batzordeak diktaminatutakoak:

Lezoko Udala Planeamenduko Arau Subsidiarioen berrikuspena izapidetzen ari da, Hirigintza Plan Orokor baten idazketaren bitartez.

Horrela, 2009ko ekainaren 10eko osoko bilkuran hartutako akordioaren bitartez Lezoko Udalak, Plan Orokorreko haserako onarpenerako dokumentua idazteko kontuan izan beharreko zehaztapen eta irizpideak onartu zituen.

Papresa, SAUk Lezoko Udalaren aurrean " Lezoko AA.SS 27 zenbakidun Aldaketa, Papresa, SAUren instalazioak handitzeko lur hiritargarri industriala klasifikatzeko eta sailkatzeko " dokumentua aurkeztu du.

2/2006 Lurzoru eta Hirigintza Legearen 103 eta hurrengo artikuluak 90 artikuluarekin batera xedatzen dutena kontuan izanik, Lezoko Udalari dagokio proposaturiko arau aldaketaren formulazioa.

Proposatzen den aldaketa Lezoko Udalak Plan Orokorrerako onarturiko irizpide eta zehaztapenekin bat datorrela kontuan izanik.

Aipatu 2/2006 Legearen 90 eta 108 artikuluan  jasotakoa kontuan hartuz 2009ko uztailaren 3ko Hirigintza, Ingurumen, Obra eta Zerbitzuetako Batzordeak, Jon Legorburu, Haritz Salaberria eta Iñigo Esnaolaren aldeko botoarekin eta Kepa Garbizuren  abstentzioarekin

DIKTAMINATZEN DU:

BAT: AA.SS 27 zenbakidun Aldaketa, formulatzea, Papresa, SAUren instalazioak handitzeko lur hiritargarri industriala klasifikatzeko eta sailkatzeko

BI: Babes zibil, ingurugiro, kultur ondare eta natur ingurunean eskumenak dituzten Eusko Jaurlaritzaren eta Foru Aldundiaren organoei bere ordenamenduarengatik errespetatuak izan behar duten ingurugiro, kultur ondare eta natur ingurunearen baldintzatzaileen eta egon litezkeen arriskuen berri eskatu. Behar bezalako justifikazio tekniko eta juridikoekin bi hilabete gaindituko ez dituen epearen barruan mango da.

HIRU: Espedientean jasotzen den Hiritarren Partehartze Programa onartzea.

LAU: Gipuzkoako Foru Aldundiko Garapen Iraunkorreko sailera, aipatu Arau aldaketaren ingurumen eraginaren azterketa bateratuari hasera emateko jakinarazpena igortzea.

 

Kepa Garbizuk bere harridura azaldu du proposamenak  Lezoko lur antolaketaren ezker abertzalearen ukitu ezina zen gunetako bat ukitzen duelako, Iratiko basoen pare kontsideratzen duten Herriondo ingurunea. Jaurlaritzak bultzaturiko PTS Agroforestal delakoari alegazioak egiteko ere Herriondo babestearen argudioa erabili omen du gobernu taldeak eta orain guztiz kontrakoa dakarrela bilkura honetara salatu du Kepa Garbizuk. Horrek bere arrazoia izango omen du dio Garbizuk. Dena den, gogoratu du Papresak iharduera ekonomikoaren gaineko zerga Errenterian ordaintzen duela eta zalantza batzuk zerrendatu ditu: osoko bilkurak ez daki dirutan nola itxi nahi den tratua, ia Isastiko Lopek aipatutako inguru horietatik doan herribidea nola geldituko den informaziorik ez dagoela dio, lur eremu guztia ez dela guztiz Papresarena, ez dela argitu dokumentuen tramitazioan abantzea egingo den. Baita ere galdetu du aldaketa honek Papresak aipatzen duen ziklo konbinatuko asmoarekin hartu emanik duen.

Hirigintza delegatuak, Jon Legorburuk, dio onarpen tramitazioan argituko direla zalantza guzti horiek. Dena den alkateak batzuk erantzun ditu: onarpen prozedura abantzetik hasi ordez hasierako onarpenetik hasiko dela, Herriondorekin orain arte izan den jarrera mantentzen dela, eta proposamen honekin gehiago babestuko dela inguru hori, industrial lur eremu berri honen iharduera ekonomikoen gaineko zerga Lezori ordainduko zaiola eta lur zoru legearen arabera udalari aprobetxamenduaren %15 dagokiola. Herribidearen kontuan ere udala gainean egongo dela dio alkateak.

Hirigintza Batzordeak diktaminatutako proposamena bozkatu da eta onartu egin da aldeko sei botoekin, aurkako bi (Kepa Garbizu eta Enrique Figueroarenak) eta abstentzio batekin (Roberto Sánchezena).

2.- 09/415 Alkatearen dekretua berreztea, zeinaren bidez EAEANn administrazioarekiko auzi-errekurtsoa jartzea erabaki den, Portuko Agintaritzako Kontseiluak apirilaren 28an hartutako akordioaren aurka, Portuko Plan Berezia berridaztea erabaki duena (2009H0450006).

 

Alkateak dio auzi errekurtsoa tartekatzeko epea zela eta, urgentziaz alkate dekretuz erabaki behar izan zuela errekurtsoa tarteratzea. Alkateak dio auzia Portu eremuko plan bereziaren idazketa nori dagokion argitzea dela, Aldundiarena edo udalena. Dena den gogoratu du osoko bilkurak gaia honen inguruan apirilaren 9an hartutako erabakia.

Kepa Garbizuk apirilaren 9ko bilkuran esandakoa errepikatu du, hau da, ahalmena argitzearen alde baina Aldundiak hasierako onarpena emango balio plan bereziari alegazioak aurkeztearen alde.

Gaia Hirigintza batzordean aztertu eta bozkatu da, ondorengo diktamena onartuz:

LRBRL 7/1985 Legearen 21.1, k) artikuluak xedatzen duena kontuan izanik 2009ko uztailaren 3ko Hirigintza, Ingurumena, Obra eta Zerbitzuetako Batzordeak Jon Legorburu, Haritz Salaberria eta Iñigo Esnaolaren aldeko botoarekin eta Kepa Garbizuren abstentzioarekin

DIKTAMINATZEN DU:

BAT: 09/415 Alkatearen dekretua berrestea: EAEn administrazioarekiko auzi-errekurtsoa jartzea, Portuko Agintaritzako Kontseiluak apirilaren 22an hartutako akordioaren aurka, zeinaren bidez Portuko Plan Berezia berridazten den .

 

Diktamena ahobatez onartu da.

3.-107 Poligonoko 2-A lursailaren jabari osoa besterentzeko kontratuaren behin behineko eta behin betiko esleipena Tokiko Gobernu Batzarrean delegatzeko proposamena (2009H0380004).

 

Alkateak dio ekainaren 1oeko osoko bilkuran, erabaki ez zen gaia dela, nahiz eta aurrez Hirigintza batzordean aipatu eta onartua izan. Honela dio diktamenak:

Lezoko Udalak 2009ko ekainaren 10an buruturiko Osoko Bilkuran  107 Industri Poligonoko konpentsazio proiektuko emaitzazko 2-Alursailaren jabetza osoa besterentzea erabaki zuen.

Lursail honen balioa kontuan izanik, bere kopuruagatik osoko bilkurari dagokio besterentzeren  erabakia hartzea.

Haatik, LRBRL 7/1985 Legearen 22.4 artikuluak xedatzen duena kontuan izanik 2009ko uztailaren 3ko Hirigintza, Ingurumena, Obra eta Zerbitzuetako Batzordeak Jon Legorburu, Haritz Salaberria eta Iñigo Esnaolaren aldeko botoarekin eta Kepa Garbizuren abstentzioarekin

DIKTAMINATZEN DU:

BAT: 107 Poligonoko 2-A lursailaren Jabari Osoa besterentzeko kontratuaren behin behineko eta behin betiko esleipena Gobernu Batzarran delegatzea.

 

Gaiaren urgentzia aldeko zortzi botorekin onartu da eta abstentzio batekin (Roberto Sánchez).

Kepa Garbizuk dio ados dagoela delegazioarekin beti ere osoko bilkurak onartutako baldintza agirien arabera egiten bada.

Diktamena bozkatu eta onartu egin da zortzi boto aldeko eta abstentzio batekin (Roberto Sánchez).

 

4.- Epe motzerako mailegua onartzeko proposamena.

 

Bilkura deialdia egin zenean oraindik batzordean diktaminatu gabe zegoenez, osoko bilkura deitu izana arrazoitu du alkateak. Alkateak dio gaiak presa duela, udalaren tesoreria arazoei lagundu ahal izango diolako. Urtero udalak egiten duen operazio bera dela, aurten baldintzak gogortu egin direlarik Hazienda batzordean azaldu den bezala, interes tipoa igo egin baita.

Gaia eztabaidatu eta bozkatzeko urgentzia bozkatu eta onartu egin da aldeko bost botokin eta hiru abstentziokin (Kepa Garbizu, Enrique Figueroa eta Roberto Sánchez).

Hazienda batzordeak diktaminatutako eta deialdiarekin batera bidalitako proposamenak honela dio:

 

Batzordeko lehendakariak aurkeztu du diktamen proposamena altxortegi-eragiketa bat ituntzeko, gehienez urtebeteko eperako, diruzaintzako behar iragankorrak betetzeko, Gipuzkoako Toki Ogasunak arautzen dituen uztailaren 5eko 11/1989 Foru Arauaren eta Gipuzkoako Lurralde Historikoko Toki Entitateen aurrekontuei buruzko, abenduaren 19ko, 21/2003 Foru Arauaren ildotik.

Diktamen proposamenak badu aginduzko bere txostena udal kontu-hartzaileak egina.

Proposamenaren xedea altxortegi-eragiketa bat ituntzea da, ezaugarri hauekin:

  • - Eragiketaren zenbatekoa: 1.000.000 €
  • - Entitate finantzaria: La Caixa.
  • - Epea: 12 hilabete.
  • - Xedea: Altxortegi-behar iragankorrak betetzea.
  • - Interesak: hiru hilero.
  • - Amortizazioa: bukaeran.
  • - Interes tipoa: Hiruhileko euribor +% 1,25 erabili den kopuruaren heinean kobratzen da.
  • - Erabiligabeko batez besteko saldoaren komisioa %0.
  • - Gaindituaren komisioa: % 0.

Haritz Salaberria, Jon Legorburu e Iñigo Esnaola zinegotzien aldeko botoekin eta Kepa Garbizu (EAJ-PNV) eta Roberto Sánchez zinegotzien abstentzioekin, Ogasun Batzordeak diktaminatu du osoko bilkurak onar dezan:

BAT: Altxortegi eragiketa  ituntzeko proposamena onartzea goian seinalaturiko zehazpenen arabera.

 

Kepa Garbizuk proposatu du hurrengoetarako beste banketxeen eskaintzak ere eskatzeko.

Hazienda batzordeak diktaminatutako eta deialdiarekin batera bidalitako proposamena bozkatu dira eta onartu egin da aldeko bost botokin eta hiru abstentziokin (Kepa Garbizu, Enrique Figueroa eta Roberto Sánchez).

5.-2009ko udal  aurrekontuaren aldaketa onartzeko proposamena: transferentziak, 030003/2009 espedientea (2009KO020003).

 

Alkateak dio ez dela gai urgentea baina ogasun batzordean aurkeztua eta azaldua dagoenez, bilkura hau aprobetxatuz kopuru txikia duen kreditu aldaketa onartzea proposatzen dio osoko bilkurari.

Honela dio deialdiarekin bidalitako proposamenak, atzoko Hazienda Batzordean diktaminatu zenak:

Kreditu Aldaketaren espedientea egiten ari denez, 2008ko aurrekontuko gastuen aurrekontuko partiden arteko kreditu transferentziaz, 2009ko ekainaren 11ko  D09/00400 dekretuaren bidez hasia, Ogasun eta Kontuetako Batzordeak, 2009ko maiatzaren 6an egindako bilkuran,  Haritz Salaberria, Jon Legorburu eta Iñigo Esnaola   zinegotzien aldeko boto ponderatuekin eta  Kepa Garbizu (EAJ/PNV) eta Roberto Sánchez  zinegotzien abstentzioarekin, behean heldu den proposamena diktaminatu du osoko bilkurak onar dezan:

BAT: Kreditu Aldaketarako espedientea onartzea, gastuen aurrekontu partida batzuen artean kreditu-transferentziarengatik identifikazio zk. 30003/2009, 2009-06-11koa eta zenbatekoa 1.800€.

 

 

PARTIDA

AZALPENA

FUNTZIONALA

GEHITU

GUTXITU

Kreditu

Ret.

357

Fondo Bibliografikoak

451.20

-1.590

66

Renting

Kopiagailua

451.20

-210

111

Prentsa eta argitalpenak

451.20

1800

GUZTIRA

1800

-1.800

Osoko bilkura egin zenean gaia diktaminatu gabe zegoenez, gaia eztabaidatu eta bozkatzeko urgentzia erabaki da lehenik, hura onartuz aldeko bost botokin eta hiru abstentziokin (Kepa Garbizu, Enrique Figueroa eta Roberto Sánchez).

Ondoren eduki bera duten proposamena eta diktamena bozkatu dira eta onartu egin da aldeko bost botokin eta hiru abstentziokin (Kepa Garbizu, Enrique Figueroa eta Roberto Sánchez).

Aktaren amaiera.

Beste aztergairik geratzen ez denez, alkate-lehendakariak 18:50etan eman dio buru bilkurari. Eta nik, idazkari naizen aldetik, akta 761.118.etik 761.123.ra arteko zenbakiak dituzten orri ofizialetan jaso eta horren guztiaren fede ematen dut,  eta bilkuran izan diren zinegotzi guztiek izenpetu egin dute akta hau.

Syndicate content